ଦିଲ୍ଲୀ ମଦ ନୀତି ମାମଲା; ୮ମ ଥର ପାଇଁ କେଜ୍ରିୱାଲଙ୍କୁ EDର ସମନ
ନୂଆଦିଲ୍ଲୀ: ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲଙ୍କୁ ପୁଣିଥରେ ସମନ । ଦିଲ୍ଲୀ ମଦ ନୀତି ମାମଲାରେ ଅଷ୍ଟମ ଥର ପାଇଁ ତାଙ୍କୁ ସମନ କରିଛି ପ୍ରବର୍ତ୍ତନ ନିର୍ଦ୍ଦେଶାଳୟ।
ଆସନ୍ତା ମାର୍ଚ୍ଚ ୪ ତାରିଖରେ ହାଜର ହେବାକୁ ସମନ କରିଛି ଇଡି। ଏହାପୂର୍ବରୁ କେଜ୍ରିୱାଲଙ୍କୁ ୭ ଥର ସମନ କରିସାରିଛି ଇଡି। ସବୁ ଥର ସମନ ବେଆଇନ ବୋଲି ଦର୍ଶାଇ ଇଡିରେ ହାଜର ହୋଇନାହାଁନ୍ତି ଦିଲ୍ଲୀ ମୁଖ୍ୟମନ୍ତ୍ରୀ।
ଦିଲ୍ଲୀ ମଦ ନୀତିରେ ଅର୍ଥ ହେରଫେର ମାମଲାରେ ଇଡି କେଜ୍ରିୱାଲଙ୍କୁ ପଚରାଉଚରା ପାଇଁ ବାରମ୍ବାର ସମନ ପଠାଉଥିଲେ ବି ଏହାକୁ ଏଡାଉଛନ୍ତି ମୁଖ୍ୟମନ୍ତ୍ରୀ କେଜ୍ରିୱାଲ। ଇଡିର ସମନ ବେଆଇନ ଏବଂ ରାଜନୈତିକ ଉଦ୍ଦେଶ୍ୟ ପ୍ରଣୋଦିତ ବୋଲି ସେ କହିଛନ୍ତି। ଏହି ମାମଲା ଉପରେ ନିଜେ କୋର୍ଟରେ ପହଞ୍ଚିଛି ଆମ ଆଦମି ପାର୍ଟି। ତେଣୁ ମୁଖ୍ୟମନ୍ତ୍ରୀ କେଜ୍ରିୱାଲ ଇଡି କାର୍ଯ୍ୟାଳୟରେ ପହଞ୍ଚିବାର କୌଣସି ଆବଶ୍ୟକତା ନାହିଁ ବୋଲି ପ୍ରକାଶ କରିଛି ଦଳ।
