ବଡିଗାର୍ଡଙ୍କ ସହ ଦୁବାଇ ଶାସକଙ୍କ ରାଜକୁମାରୀ ପତ୍ନୀଙ୍କ ସମ୍ପର୍କ, ଚୁପ୍ ରହିବାକୁ ଦେଲେ ୧୨ କୋଟି
ଆବୁଧାବି: ଦୁବାଇର ଶାସକ ଶେଖ ମୋହମ୍ମଦ ବିନ ରଶିଦ ଅଲ୍ ମକତୁମଙ୍କ ରାଜକୁମାରୀ ପତ୍ନୀଙ୍କ ସମ୍ପର୍କ ତାଙ୍କ ବଡିଗାର୍ଡଙ୍କ ସହ ଥିଲା । ରାଜକୁମାରୀ ହୟା ତାଙ୍କ ବଡିଗାର୍ଡକୁ ଦୁହିଁଙ୍କ ସମ୍ପର୍କ ନେଇ ଚୁପ୍ ରହିବାକୁ ୧୨ କୋଟି ଟଙ୍କା ଦେଇଛନ୍ତି । ବ୍ରିଟେନରେ ଚାଲିଥିବା ଶୁଣାଣି ଆଧାରରେ ଅନ୍ତର୍ଜାତୀୟ ସ୍ତରରେ ଏ ଖବର ପ୍ରକାଶ ପାଇଛି । ଦୁବାଇର ଶାସକ ରାଜକୁମାରୀ ହୟାଙ୍କୁ ନଜଣାଇ ଶରିୟା ଆଇନ୍ ଅନୁଯାୟୀ ୨୦୧୯ ଫେବ୍ରୁଆରୀରେ ତଲାକ୍ ଦେଇଥିଲେ ।
ରିପୋର୍ଟ ଅନୁସାରେ, ରାଜକୁମାରୀ ହୟାଙ୍କ ବଡିଗାର୍ଡ ବିବାହିତ । କିନ୍ତୁ, ପରକୀୟା ପ୍ରୀତି ଯୋଗୁଁ ବଡିଗାର୍ଡଙ୍କ ବୈବାହିକ ଜୀବନ ବିଚ୍ଛେଦ ହୋଇଥିଲା । ରାଜକୁମାରୀ ହୟା ଦୁବାଇ ଛାଡ଼ି ବ୍ରିଟେନରେ ରହୁଛନ୍ତି । ଛୁଆଙ୍କ କଷ୍ଟୋଡି ନେଇ ରାଜକୁାମୀର ହୟା ବ୍ରିଟେନର ଅଦାଲତରେ ମକଦ୍ଦମା କରିଥିଲେ ଏବଂ ହୟାଙ୍କ ସପକ୍ଷରେ କୋର୍ଟ ନିଷ୍ପତ୍ତି ଶୁଣାଇଛନ୍ତି ।
ରାଜକୁମାରୀ ହୟା ତାଙ୍କ ବଡିଗାର୍ଡଙ୍କୁ ବେଶ୍ ଦାମୀ ଗିଫ୍ଟ ଦେଉଥିଲେ । ଗିଫ୍ଟରେ ୧୨ ଲକ୍ଷର ଘଣ୍ଟା ଓ ୫୦ ଲକ୍ଷ ଟଙ୍କାର ବନ୍ଧୁକ ସାମିଲ୍ ରହିଛି । ରାଜକୁମାରୀ ହୟା ଦୁବାଇର ଶାସକ ଶେଖ୍ ମୋହମ୍ମଦ ବିନ୍ ରଶିଦ୍ ଅଲ ମକତୁମଙ୍କ ଷଷ୍ଠ ଓ ସବୁଠୁ କମ୍ ବୟସର ପତ୍ନୀ ଥିଲେ । କୁହାଯାଉଛି ବଡିଗାର୍ଡ ସହ ହୟାଙ୍କ ସମ୍ପର୍କ ୨୦୧୬ରେ ଆରମ୍ଭ ହୋଇଥିଲେ । ସେବେଠୁ ବଡିଗାର୍ଡ ଜଣଙ୍କ ହୟାଙ୍କ ଲାଗି କାମ କରୁଥିଲେ ।
ରିପୋର୍ଟ ଅନୁସାରେ, ୪୬ ବର୍ଷୀୟ ରାଜକୁମାରୀ ହୟା ବ୍ରିଟେନର ୩୭ ବର୍ଷୀୟ ବଡିଗାର୍ଡ ରସେଲ ଫ୍ଲୱରଙ୍କ ସହିତ ୨ ବର୍ଷ ଧରି ସମ୍ପର୍କରେ ଥିଲେ । ଏହା ବି କୁହାଯାଉଛି ରାଜକୁମାରୀ ହୟା ଅନ୍ୟ ୩ ଜଣ ବଡିଗାର୍ଡଙ୍କୁ ରସେଲଙ୍କ ସହିତ ଥିବା ସମ୍ପର୍କ ନେଇ ଚୁପ୍ ରହିବାକୁ କୋଟି କୋଟି ଟଙ୍କା ଦେଇଛନ୍ତି ।
ରାଜକୁମାରୀ ହୟା ୨୦୧୮ରେ ଦୁବାଇ ଛାଡ଼ି ଲଣ୍ଡନରେ ରହୁଛନ୍ତି । ହୟା ଦୁଇ ଛୁଆଙ୍କ ମାଆ । ଦୁହିଁଙ୍କ ସମ୍ପର୍କ ନେଇ ରସେଲ କୌଣସି ପ୍ରତିକ୍ରିୟା ଦେଉନଥିବା ବେଳେ ରାଜକୁମାରୀ ହୟା ସମସ୍ତ ଦାବିକୁ ଖଣ୍ଡନ କରିଛନ୍ତି ।
