ହେଲମେଟ୍ ନପିନ୍ଧି ଗାଡ଼ି ଚଳାଇଲେ ୩ ମାସ୍ ପାଇଁ ବାତିଲ୍ ହେବ ଲାଇସେନ୍ସ
ଭୁବନେଶ୍ୱର: ଅମାନିଆ ଗାଡ଼ି ଚାଳକ ସାବଧାନ । ଟ୍ରାଫିକ ନିୟମ ମାନିବା ସହ ହେଲମେଟ ପିନ୍ଧି ଗାଡ଼ି ଚଲାନ୍ତୁ । ନହେଲେ ୩ ମାସ ପାଇଁ ବାତିଲ୍ ହେବ ଡ୍ରାଇଭିଂ ଲାଇସେନ୍ସ । ଏଥିସହ ହଜାରେ ଟଙ୍କା ଜରିମାନା ମଧ୍ୟ ଦେବାକୁ ପଡ଼ିବ । ଏନେଇ ବାଣିଜ୍ୟ ଓ ପରିବହନ ବିଭାଗର ପ୍ରମୁଖ ସଚିବ ମଧୁସୂଦନ ପାଢୀ ରାଜ୍ୟ ସରକାରଙ୍କ ତରଫରୁ ପୋଲିସ ଡିଜିଙ୍କୁ ନିର୍ଦ୍ଦେଶ ଦେଇଛନ୍ତି । ଏଥିସହ ଯାନବାହାନ ନିୟମକୁ କଡ଼ାକଡ଼ି ଭାବେ ପାଳନ କରିବାକୁ କୁହାଯାଇଛି ।
ଦୁଇ ଚକିଆ ଯାନ ପାଇଁ ୨୦୧୯ରେ ୪୬୮୮ଟି ସଡ଼କ ଦୁର୍ଘଟଣା ହୋଇଥିବା ବେଳେ ୨୩୯୮ ଜଣଙ୍କର ମୃତ୍ୟୁ ହୋଇଛି । ମୃତକଙ୍କ ମଧ୍ୟରେ ୨୧୫୬ ଜଣ ଲୋକ ହେଲମେଟ ପିନ୍ଧି ନଥିଲେ ବୋଲି ଜଣାପଡ଼ିଛି । ଯାହାକୁ ଅତି ଗୁରୁତର ସହ ନେଇଛନ୍ତି ରାଜ୍ୟ ସରକାର । ଗତ ବର୍ଷ ୮ ଲକ୍ଷ ୫୦ ହଜାର ଲୋକ ଟ୍ରାଫିକ୍ ନିୟମ ଭାଙ୍ଗିଥିବା ସରକାର କହିଛନ୍ତି । ଗତ ୯ତାରିଖରେ ସୁପ୍ରିମକୋର୍ଟଙ୍କ ଦ୍ୱାରା ନିଯୁକ୍ତ କମିଟି ଟ୍ରାଫିକ୍ ନିୟମକୁ ନେଇ ସମୀକ୍ଷା ବୈଠକ କରିଥିଲେ ।
