ଆନ୍ଦୋଳନ ନାଁରେ ଆତଙ୍କ ରଚିଲେ ଡ୍ରାଇଭର, ଛତ୍ରପୁରରେ ପୋଲିସଙ୍କୁ ଗୋଡ଼ାଇ ଗୋଡ଼ାଇ ପିଟିଲେ ଡ୍ରାଇଭର

ଗଞ୍ଜାମ: ରାଜରାସ୍ତାରେ ଡ୍ରାଇଭରଙ୍କ ଗୁଣ୍ଡାଗିରି । ଆନ୍ଦୋଳନ ନାଁରେ ଆତଙ୍କ ରଚିଲେ ଡ୍ରାଇଭର । ଗଞ୍ଜାମ ଜିଲ୍ଲା ଛତ୍ରପୁର ପୋକଡ଼ିବନ୍ଧରେ ପୋଲିସଙ୍କୁ ଗୋଡ଼ାଇ ଗୋଡ଼ାଇ ପିଟିଲେ ଡ୍ରାଇଭର । ଆକ୍ରମଣରେ ୬ରୁ ଅଧିକ ପୋଲିସ କର୍ମଚାରୀ ଆହତ ହୋଇଛନ୍ତି । ଡ୍ରାଇଭରଙ୍କ ମରଣାନ୍ତକ ଆକ୍ରମଣରେ ପୋଲିସଙ୍କ ମୁଣ୍ଡ ଫାଟିଯାଇଛି । ପୋକଡ଼ିବନ୍ଧ ଛକ ନିକଟର ରାଜରାସ୍ତା ଉପରେ ଆନ୍ଦୋଳନ କରିବା ବାହାନାରେ ବାହାର ରାଜ୍ୟର ଗାଡ଼ିକୁ ଅଟକାଉଥିଲେ । ପୋଲିସ ଅଟକାଇବାରୁ ମରଣାନ୍ତକ ଆକ୍ରମଣ କରିଥିଲ ଡ୍ରାଇଭର ।

ଏହି ଆକ୍ରମଣରେ ଗୋଳନ୍ଥରା ଥାନା ଆଇଆଇସି ବିବେକାନନ୍ଦ ମହନ୍ତ ଗୋପାଳପୁର ଏସଆଇ ମହେନ୍ଦ୍ର ବେହେରା ଗୁରୁତର ହୋଇଛନ୍ତି । ସମସ୍ତଙ୍କୁ ଏମକେସିଜି ମେଡିକାଲରେ ଭର୍ତ୍ତି କରାଯାଇଛି । ଘଟଣା ପରେ ପୋଲିସ ଆଇଜି, ବ୍ରହ୍ମପୁର ଓ ଗଞ୍ଜାମ ଏସପି, ସବୁ ଥାନାର ଆଇଆଇସି ପହଞ୍ଚିଛନ୍ତି । ଘଟଣାସ୍ଥଳରେ ବ୍ୟାପକ ପୋଲିସ୍ ମୁତୟନ କରାଯାଇଛି । ଡ୍ରାଇଭରଙ୍କୁ ଦେଖିବାମାତ୍ରେ ଗିରଫ କରାଯାଉଛି ।