ଶତ୍ରୁଙ୍କ ଯମଦୂତ ‘ପ୍ରହାର’, ୨୫୦ ସେକେଣ୍ଡରେ ନଷ୍ଟ କରିବ ୧୫୦ କିଲୋମିଟର ଦୂରର ଟାର୍ଗେଟ୍

ବାଲେଶ୍ୱର: ସର୍ଟ ରେଞ୍ଜ, ସଲିଡ୍ ପ୍ରୋପେଲାଣ୍ଟ, ରୋଡ୍-ମୋବାଇଲ୍ ବାଲିଷ୍ଟିକ୍ ମିସାଇଲ୍ ‘ପ୍ରହାର’ର ପରୀକ୍ଷଣ ସଫଳ ହୋଇଛି । ଆଜି ଚାନ୍ଦିପୁର କ୍ଷେପଣାସ୍ତ୍ର ଘାଟିରେ ୩ ନମ୍ବର ଲଞ୍ଚପ୍ୟାଡରୁ ଅପରାହ୍ଣ ୩ଟା ୯ରେ ‘ପ୍ରହାର’ର ଉତକ୍ଷେପଣ ହୋଇଥିଲା । ଭୂ-ପୃଷ୍ଠରୁ ଆକାଶକୁ ଲକ୍ଷ୍ୟଭେଦ କରିପାରୁଥିବା ସ୍ୱଦେଶୀ ଜ୍ଞାନକୌଶଳରେ ନିର୍ମିତ ମିସାଇଲ ‘ପ୍ରହାର’ ।

ପ୍ରହାର କ୍ଷେପଣାସ୍ତ୍ରକୁ ପ୍ରଥମଥର ପାଇଁ ୨୦୧୧ ଜୁଲାଇ ୨୧ ତାରିଖରେ ଓ ଦ୍ୱିତୀୟଥର ୨୦୧୮ ମସିହା ସେପ୍ଟେମ୍ବର ୨୦ ତାରିଖରେ ପରୀକ୍ଷା କରାଯାଇଥିଲା । ଉଭୟ ପରୀକ୍ଷା ସଫଳ ହୋଇଥିଲା । ‘ପ୍ରହାର’ ଟାର୍ଗେଟ୍‌କୁ ୧୦ ମିଟର ଦୂରତା ମଧ୍ୟରେ ହିଟ୍‌ କରିବାରେ ସକ୍ଷମ ହୋଇଥିଲା । ମିସାଇଲର ଲମ୍ବ ୭.୩୨ ମିଟର ଥିବା ବେଳେ ଓଜନ ୧୨୮୦ କିଲୋଗ୍ରାମ୍ ।

ଏହା ୨୫୦ ସେକେଣ୍ଡ ମଧ୍ୟରେ ଶବ୍ଦର ବେଗ ଠାରୁ ୩ ଗୁଣ ଅଧିକ ବେଗରେ ଗତିକରି ୧୫୦ରୁ ୨୦୦ କିଲୋମିଟର ମଧ୍ୟରେ ଟାର୍ଗେଟକୁ ନଷ୍ଟ କରିବାର କ୍ଷମତା ରଖିଛି । ‘ପ୍ରହାର’ କ୍ଷେପଣାସ୍ତ୍ରରେ ୨୦୦ରୁ ୫୦୦ କିଲୋଗ୍ରାମ୍ ପର୍ଯ୍ୟନ୍ତ ଉଭୟ ପାରମ୍ପରିକ ଓ ଆଣବିକ ଯୁଦ୍ଧାସ୍ତ୍ର ବ୍ୟବହାର କରାଯାଇ ପାରିବ । ସଫଳ ପରୀକ୍ଷଣ ପାଇଁ ଡିଆରଡିଓକୁ ଶୁଭେଚ୍ଛା ଜଣାଇଛନ୍ତି ମୁଖ୍ୟମନ୍ତ୍ରୀ ।

Congratulate @DRDO_India and @indiannavy on the successful flight testing of Vertical Launch Short Range Surface to Air Missile (VL-SRSAM) from ITR Chandipur, off the coast of #Odisha. #DRDO

— Naveen Patnaik (@Naveen_Odisha) December 7, 2021

ଆଜି ଉତକ୍ଷେପଣ ପାଇଁ ସୁରକ୍ଷା ଦୃଷ୍ଟିରୁ ଲଞ୍ଚପ୍ୟାଡର ୭ କିଲୋମିଟର ପର୍ଯ୍ୟନ୍ତ ସମୁଦ୍ର ଭିତରକୁ ମତ୍ସ୍ୟଜୀବୀ ମାନଙ୍କୁ ଯିବାକୁ ବାରଣ କରାଯାଇଥିଲା । ଲଞ୍ଚପ୍ୟାଡର ଅଢେଇ କିଲୋମିଟର ବ୍ୟାସାର୍ଦ୍ଧ ମଧ୍ୟରେ ଥିବା ଗୁଡ଼ୁପାହି, କୁସୁମୁଳିପାହି, ଭୀମପୁରପାହି, ସାହାଦାନଗରପାହି ଗାଁର ୬ ହଜାରରୁ ଅଧିକ ଲୋକଙ୍କୁ ଅସ୍ଥାୟୀ ଶିବିରକୁ ସ୍ଥାନାନ୍ତର କରାଯାଇଥିଲା ।