ଅଚଳ ହେଲା ଡବଲ ଇଞ୍ଜିନ୍ର ‘ଡବଲ୍ ଡେକର’ ବସ୍: ଗ୍ୟାରେଜରେ ହାୱା ଖାଉଛି ଗେରୁଆ ଡବଲ ଡେକର ବସ୍
ଭୁବନେଶ୍ବର: ଅଚଳ ହୋଇ ଯାଇଛି ଡବଲ ଇଞ୍ଜିନ୍ର ‘ଡବଲ୍ ଡେକର’ ବସ୍ । ଗଲା ୫ ଦିନ ହେଲା ରାଜ୍ୟ ସରକାରଙ୍କ ଗେରୁଆ ଡବଲ ଡେକର ବସ୍ ଗ୍ୟାରେଜରେ ହାୱା ଖାଉଛି । ସର୍ଟ ସର୍କିଟ୍ କାରଣରୁ ବସର କିଛି ଗୁରୁତ୍ଵପୂର୍ଣ୍ଣ ଯନ୍ତ୍ରାଂଶ ପୋଡ଼ିଯାଇଥିବା ଜଣାପଡ଼ିଛି । ଫଳରେ ବସଟି ସମ୍ପୂର୍ଣ୍ଣ ଅଚଳ ହୋଇଯାଇଛି । ବସ୍ ଅଚଳ ହୋଇଥିଲେ ମଧ୍ୟ ସୌଭାଗ୍ୟବଶତଃ କାହାରି କୌଣସି କ୍ଷତି ହୋଇନାହିଁ । ଫଳରେ ରାଜ୍ୟ ସରକାରଙ୍କ ଡବଲ ଡେକର ବସ୍ ଚଳାଚଳ ବହୁ ଆଡମ୍ବର, ଲଘୁକ୍ରିୟାରେ ପରିଣତ ହୋଇଛି । ଖବର ଅନୁଯାୟୀ, ଅଚଳ ବସକୁ ମରାମତି ପାଇଁ ପାହାଳ ସ୍ଥିତ ଅଶୋକ ଲେଲାଣ୍ଡ ୱାର୍କସପକୁ ନିଆଯାଇଛି । ସର୍ଟ ସର୍କିଟ୍ କାରଣରୁ ବିଭିନ୍ନ ସମୟରେ ଯାନବାହନ ରାସ୍ତା ଉପରେ ଜଳି ଯାଉଥିବାର ଅନେକ ଦୃଷ୍ଟାନ୍ତ ଥିବାରୁ ଏହି ବସ୍ ଯାତ୍ରୀମାନେ ନିଶ୍ଚିତ ବିପଦରୁ ବର୍ଷି ଯାଇଛନ୍ତି। ବସ୍ ମରାମତି ପାଇଁ କେତେ ଦିନ ସମୟ ଲାଗିବ ଓ ଏହା କେତେ ପରିମାଣରେ କ୍ଷତିଗ୍ରସ୍ତ ହୋଇଛି ତାହା ଜଣାପଡ଼ିନଥିବା ବେଳେ ମରାମତି ପରେ ଏହା ତୁରନ୍ତ ରାସ୍ତାରେ ଗଡ଼ିପାରିବ କି ନାହିଁ ତାକୁ ନେଇ ମଧ୍ୟ ଆଶଙ୍କା ସୃଷ୍ଟି ହୋଇଛି ।
