ବିନାଶ ମୁହାଁ ବିଶ୍ବ ; ଡୁମ୍ସଡେ କ୍ଲକରୁ ୧୦ସେକେଣ୍ଡ କମ୍ କରିଛନ୍ତି ବୈଜ୍ଞାନିକ

ନୂଆଦିଲ୍ଲୀ: ବିନାଶ ମୁହାଁ ବିଶ୍ବ । ଆଉ ଅଳ୍ପ ଦୂରରେ ବିଧ୍ବଂସ । ଡୁମ୍ସଡେ କ୍ଲକରୁ ୧୦ସେକେଣ୍ଡ କମ୍ କରିଛନ୍ତି ବୈଜ୍ଞାନିକ । ତିନି ବର୍ଷ ଧରି ଡୁମ୍ସଡେ କ୍ଲକରେ ପୃଥିବୀ ଧ୍ବଂସ ହେବାକୁ ଆଉ ଶହେ ସେକେଣ୍ଡ ରହିଥିବା ବେଳେ ୨୦୨୩ରେ ଏଥିରୁ ୧୦ସେକେଣ୍ଡ କମାଇ ଦିଆଯାଇଛି । ଘଣ୍ଟାରେ ସମୟ ଯେତେ କମିବ ପରାମାଣୁ ଯୁଦ୍ଧ ଆଡକୁ ପୃଥିବୀ ସେତେ ଆଗକୁ ବଢ଼ିବ ବୋଲି ପରମାଣୁ ବୈଜ୍ଞାନିକ କହିଛନ୍ତି ।

ଆମେରିକାର ଓ୍ବାସିଂଟନ ଡିସିରେ ବାର୍ଷିକ ଡୁମ୍ସଡେ କ୍ଲକର ଘୋଷଣା କରି ପୃଥିବୀ ବିଧ୍ବଂଶ ଆଡକୁ ବଢୁଛି ବୋଲି ବୈଜ୍ଞାନିକ କହିଛନ୍ତି । ୧୯୪୭ରୁ ଚାଲୁଥିବା ଏହି ଘଣ୍ଟା ବିନାଶଠାରୁ ପୃଥିବୀ କେତେ ଦୂରରେ ଅଛି ତାହା ଜଣାଇଥାଏ । ବୁଲେଟିନ ଅଫ ଦି ଆଟୋମିକ ସାଇଣ୍ଟିଷ୍ଟରେ ଋଷ-ୟୁକ୍ରେନ ଯୁଦ୍ଧ, କୋଭିଡ ମହାମାରୀ, ଜଳବାୟୁ ପରିବର୍ତ୍ତନ ଆଦିକୁ ବଡ଼ ସଙ୍କଟ ବୋଲି କହିଛନ୍ତି ।

ଗତ ତିନି ବର୍ଷ ଧରି ଘଣ୍ଟାରେ ମଧ୍ୟରାତ୍ର ହେବାକୁ ଶହେ ସେକେଣ୍ଡ ଥିବା ବେଳେ ଏବର୍ଷ ସେଥିରୁ ୧୦ସେକେଣ୍ଡ କମ୍ କରିଛନ୍ତି ପରମାଣୁ ବିଜ୍ଞାନୀ । ବିଶ୍ବ ଏବେ ଅଦ୍ଭୁତପୂର୍ବ ସଙ୍କଟର ସାମ୍ନା କରୁଛି । ଡୁମ୍ସଡେ କ୍ଲକରେ ସମୟ ବଢ଼ାଇବା ପାଇଁ ଋଷ-ୟୁକ୍ରେନ ଯୁଦ୍ଧର ସମାଧାନ ଯଥାଶୀଘ୍ର ବାହାର କରିବାକୁ ପରାମର୍ଶ ଦେଇଛନ୍ତି ବୁଲେଟିନ ଅଫ ଆଟୋମିକ ସାଇଣ୍ଟିଷ୍ଟର ସିଇଓ ରଚେଲ ବ୍ରୋନସନ ।