ନନ୍ଦିଘୋଷ ବ୍ୟୁରୋ : ଏକ ଆଶ୍ଚର୍ଯ୍ୟଜନକ ଘଟଣା ସାମ୍ନାକୁ ଆସିଛି, ଯାହା ଡାକ୍ତର ଓ ପରିବାର ସଦସ୍ୟଙ୍କୁ ଆଶ୍ଚର୍ଯ୍ୟ କରିଦେଇଛି। ଜଣେ ୩୫ବର୍ଷୀୟ ଯୁବକଙ୍କ ପେଟରୁ ବାହାରିଲା ଷ୍ଟିଲ୍ ଚାମଚ, ଟୁଥବ୍ରଶ୍ ଏବଂ କଲମ। ସେ ଅସହ୍ୟ ପେଟ ଯନ୍ତ୍ରଣା ଅନୁଭବ କରିବାରୁ ତାଙ୍କ ପରିବାର ଲୋକ ତାଙ୍କୁ ତୁରନ୍ତ ହସ୍ପିଟାଲକୁ ନେଇଯାଇଥିଲେ। ହସ୍ପିଟାଲ ପହଞ୍ଚିବା ପରେ ଡାକ୍ତର ତାଙ୍କର ଅଲ୍ଟ୍ରାସାଉଣ୍ଡ କଲେ । ଏହି ରିପୋର୍ଟ ସମସ୍ତଙ୍କୁ ଆଶ୍ଚର୍ଯ୍ୟ କରିଦେଲା। ରିପୋର୍ଟରେ ତାଙ୍କ ପେଟ ଭିତରେ ଅନେକ ପ୍ରକାରର ଜିନିଷ ଥିବାର ଜଣାପଡିଥିଲା ।
ଏହା ପରେ ଡାକ୍ତରୀ ଦଳ ତୁରନ୍ତ ଏକ ଅସ୍ତ୍ରୋପଚାର କରିବାକୁ ନିଷ୍ପତ୍ତି ନେଲେ । ଏହି ଅସ୍ତ୍ରୋପଚାର ପ୍ରାୟ ପାଞ୍ଚ ଘଣ୍ଟା ଧରି ଚାଲିଥିଲା। ଏହି ଜଟିଳ ଅସ୍ତ୍ରୋପଚାର ପରେ ଡାକ୍ତରମାନେ ତାଙ୍କ ପେଟରୁ ୨୯ଟି ଷ୍ଟିଲ୍ ଚାମଚ, ୧୯ଟି ଟୁଥବ୍ରଶ୍ ଏବଂ ଦୁଇଟି କଲମ ସଫଳତାର ସହ ବାହାର କଲେ। ଉତ୍ତର ପ୍ରଦେଶର ହାପୁର ଜିଲ୍ଲାରେ ଘଟିଛି ଏହି ଘଟଣା । ଯୁବକ ଜଣକ ଏବେ ସମ୍ପୂର୍ଣ୍ଣ ସୁସ୍ଥ ହୋଇ ଘରକୁ ଫେରିଛନ୍ତି ।
ଡାକ୍ତରମାନେ ରୋଗୀଙ୍କ ଆଚରଣକୁ ମାନସିକ ରୋଗ ବୋଲି କହିଛନ୍ତି। ବିଶେଷଜ୍ଞମାନେ କହିଛନ୍ତି ଯେ ଏହି ମାମଲା ଟ୍ରାଇକୋଟିଲୋମାନିଆ କିମ୍ବା ପିକା ଡିସଅର୍ଡର ସହିତ ଜଡିତ ହୋଇପାରେ, ଏହା ଏକ ଗମ୍ଭୀର ମାନସିକ ରୋଗ । ଏହି ରୋଗରେ ଆକ୍ରାନ୍ତ ବ୍ୟକ୍ତି ଖାଦ୍ୟ ଠାରୁ ଦୂରେଇ ଅଖାଦ୍ୟ ଜିନିଷ ଖାଇଥାନ୍ତି । ଏଥିରେ ମାଟି, ଚକ୍, ବରଫ, କେଶ, ସାବୁନ, ରଙ୍ଗ, ପୋଷାକ, କାଗଜ, ପାଉଁଶ ଏବଂ ମାଟି ଭଳି ଜିନିଷ ମଧ୍ୟ ଅନ୍ତର୍ଭୁକ୍ତ ହୋଇପାରେ।
