ଫେରିଲା ପୁରୁଣା ରୋଗ, ପୁଣି ତେଜିଲା କଂଗ୍ରେସର ସଭାପତି ପରିବର୍ତ୍ତନ ଦାବି

1 min read

ଭୁବନେଶ୍ୱର: କଂଗ୍ରେସରେ ପୁଣିଥରେ ଜୋର ଧରିଛି ନିରଞ୍ଜନ ହଟାଅ ଅଭିଯାନ । ରାଜଧାନୀରେ ଏକାଠି ହୋଇଛନ୍ତି ଅସନ୍ତୁଷ୍ଟ ନେତା ଓ କର୍ମୀ । ଭୁବନେଶ୍ୱର ପାନ୍ଥ ନିବାସରେ ବନ୍ଧୁ ମିଳନ ଉତ୍ସବ ନାଁରେ ନିରଞ୍ଜନ ବିରୋଧୀଙ୍କୁ ନେଇ ଏକ ବୈଠକ ବସିଥିଲା । ଯାହାର ନେତୃତ୍ୱ ନେଇଥିଲେ ପାରାଦୀପର କଂଗ୍ରେସ ନେତା ବାପି ସର୍ଖେଲ । ସମସ୍ତେ ଏକ ସ୍ୱରରେ ଦାବି କରିଛନ୍ତି, ‘ନିରଞ୍ଜନ ହଟାଅ, ପିସିସି ବଞ୍ଚାଅ’ । ନିରଞ୍ଜନ ପଟ୍ଟନାୟକଙ୍କ ବଦଳରେ କଟକ-ବାରବାଟୀ ବିଧାୟକ ମହମ୍ମଦ ମୋକିମଙ୍କୁ ପିସିସି ମୁଖିଆ କରିବାକୁ ଦାବି ଜୋର ଧରିଛି । ନଭେମ୍ବର ପ୍ରଥମ ସପ୍ତାହରେ ସମସ୍ତଙ୍କ ଦସ୍ତଖତ ସମ୍ବଳିତ ଏକ ଦାବିପତ୍ର ହାଇକମାଣ୍ଡ ସୋନିଆ ଗାନ୍ଧିଙ୍କୁ ପ୍ରଦାନ କରାଯିବାକୁ ନିଷ୍ପତ୍ତି ହୋଇଛି । ଯେଉଁଠି ମୋକିମ୍‌ଙ୍କୁ ପିସିସି ସଭାପତି କରାଯିବାର ଦୃଢ଼ ଦାବି ଉପସ୍ଥାପନ କରାଯିବ ।

congress Meeting

ଏହି ବୈଠକ ପରେ ପ୍ରତିକ୍ରିୟା ପ୍ରକାଶ କରିଛନ୍ତି ପିସିସି ସଭାପତି ନିରଞ୍ଜନ ପଟ୍ଟନାୟକ । କହିଛନ୍ତି, ସଭାପତି ହେବାକୁ ତାଙ୍କର ଲୋଭ ନାହିଁ । ସେ କେବେଠାରୁ ୨୦୧୯ ପରାଜୟର ଫଳାଫଳ ମୁଣ୍ଡେଇ ଇସ୍ତଫା ଦେଇସାରିଛନ୍ତି କିନ୍ତୁ ଦଳର ହାଇକମାଣ୍ଡ ତାକୁ ଗ୍ରହଣ କରୁନାହାନ୍ତି । ସେ ଆହୁରି କହିଛନ୍ତି ଯେ, ଯେଉଁମାନେ ପିସିସି ସଭାପତି ହେବାକୁ ଚାହୁଁଛନ୍ତି ସେମାନେ ତାଙ୍କୁ ଜଣାଇବା ଦରକାର । ସେ ସେମାନଙ୍କ ନାଁକୁ ଏଆଇସିସିକୁ ସୁପାରିସ କରିବେ, ନ ହେଲେ ସେମାନେ ଏଆଇସିସି ନିକଟରେ ଯାଇ କୁହନ୍ତୁ ବୋଲି ନିରଞ୍ଜନ କହିଛନ୍ତି ।

ନିରଞ୍ଜନଙ୍କ ନାଁରେ ଅଭିଯୋଗ
୧୯’ ମହାସମର ପରେ ବିଜେପୁର ଉପ ନିର୍ବାଚନରେ ଦଳର ନୈରାଶ୍ୟଜନକ ପ୍ରଦର୍ଶନକୁ ନେଇ କ୍ଷୁବ୍ଧ କଟ୍ଟର କଂଗ୍ରେସୀ । ଏକଦା ଦଳର ଗଡ଼ ଥିବା ବିଜେପୁରରୁ ମାତ୍ର ୫ହଜାର ୮୭୩ ଖଣ୍ଡ ଭୋଟ୍‌ ପାଇ ଅମାନତ ହରାଇଛି କଂଗ୍ରେସ । ୨୦୧୯ର ଭୋଟ୍‌ ହାର ବି ୨୦୧୪ ତୁଳନାରେ ୨୬ରୁ ୧୬ ପ୍ରତିଶତକୁ ଖସି ଆସିଛି । ବିରୋଧୀ ଦଳ ମାନ୍ୟତା ହରାଇ ତିନି ନମ୍ବରକୁ ଚାଲିଯାଇଛି ଦଳ । ଦୁର୍ବଳ ବ୍ୟକ୍ତିଙ୍କୁ ଟିକଟ୍‌ ଦେବା, ଟିକଟ୍‌ ବଣ୍ଟନରେ ପ୍ରିୟାପ୍ରୀତି ତୋଷଣ, ଯୁବ ନେତୃତ୍ୱଙ୍କୁ ଅଣେଦଖା, ଏକଦା କଂଗ୍ରେସର ଗଡ଼ ଥିବା ପ୍ରଦେଶକୁ ସାଇନ ବୋର୍ଡ ପାର୍ଟିରେ ପରିଣତ କରିବା ଭଳି ଅଭିଯୋଗ ରହିଛି ନିରଞ୍ଜନଙ୍କ ନାଁରେ ।

କାହିଁକି ମୋକିମ୍‌ ହେବେ ପିସିସି ସଭାପତି ?

ଉପକୂଳ ଓଡ଼ିଶାରେ କଂଗ୍ରେସ ନୈରାଶ୍ୟଜନକ ପ୍ରଦର୍ଶନ କରିଥିବା ବେଳେ ବାରବାଟୀ-କଟକରେ ହାତର ମାନ ରଖିଥିଲେ ମହମ୍ମଦ ମୋକିମ । ବିଜେଡି ହେଭିଓ୍ୱେଟ ଦେବାଶିଷ ସାମନ୍ତରାୟଙ୍କୁ ହରାଇ ବୁଡ଼ି ଯାଉଥିବା କଂଗ୍ରେସ ଡଙ୍ଗାର ସାହାରା ପାଲଟିଥିଲେ । ଯୁବ ନେତୃତ୍ବ, ସର୍ବଜନ ଗ୍ରହଣୀୟ ଚେହେରା, ଦକ୍ଷ ସଂଗଠକ ହିସାବରେ ମୋକିମଙ୍କର ଏକ ଭଲ ପରିଚୟ ରହିଛି । ଏଥିସହ ପରିବାରବାଦର ଦାଗ ବି ଲାଗିନି ତାଙ୍କ ଦେହରେ । ହରିଆଣା ଓ ମହାରାଷ୍ଟ୍ରରେ ବିନା ପ୍ରଚେଷ୍ଟାରେ ଭଲ ଫଳାଫଳ ଦେଖି ଏବେ ଉତ୍ସାହିତ କଂଗ୍ରେସ । ବିଶେଷକରି ହରିଆଣା ରେଜଲ୍ଟ ଦଳକୁ ଆତ୍ମସମୀକ୍ଷା କରି ଅଧିକ ସଂଗଠିତ ହେବାକୁ ଇନ୍ଧନ ଯୋଗାଇଛି । ଯାହାର ଇଫେକ୍ଟ ପଡ଼ିଛି ଓଡ଼ିଶାରେ । କୁହାଯାଉଛି ମୋକିମଙ୍କ ନେତୃତ୍ବରେ ରାଜ୍ୟରେ କଂଗ୍ରେସକୁ ଉଠାଇବା ପାଇଁ ଏହା ହେବ ଶେଷ ପ୍ରୟାସ । ଯେଉଁଥିପାଇଁ ଅପେକ୍ଷା କରିଛନ୍ତି ଆରମ୍ଭରୁ କଂଗ୍ରେସରେ ଥିବା କିଛି ନେତା ଓ କର୍ମୀ । ଅନ୍ୟପଟେ ଏ ସଂପର୍କରେ ମୋକିମଙ୍କର କିଛି ପ୍ରତିକ୍ରିୟା ମିଳିପାରିନି ।

                                                                                                                                                                         -ଅବିନାଶ ଷଡ଼ଙ୍ଗୀ ')}

[DISPLAY_ULTIMATE_SOCIAL_ICONS]
Opn Commnet Area

Leave a Reply

Your email address will not be published.