ଜିଲ୍ଲା ସଭାପତି ପରିବର୍ତ୍ତନ ଓ ନୂଆ କମିଟିକୁ ନେଇ ରାଜ୍ୟ କଂଗ୍ରେସରେ ଗୋଳମାଳିଆ ସ୍ଥିତି

ଭୁବନେଶ୍ବର: ୧୦ ଜିଲ୍ଲାର ଜିଲ୍ଲା ସଭାପତି ପରିବର୍ତ୍ତନ ଓ ନୂଆ କମିଟିକୁ ନେଇ ରାଜ୍ୟ କଂଗ୍ରେସ ରାଜନୀତି ଗୋଳିଆ । ବିଶେଷ କରି କୋରାପୁଟ ଜିଲ୍ଲା କଂଗ୍ରେସ ସଭାନେତ୍ରୀ ପଦରୁ ମୀନାକ୍ଷୀ ବାହିନୀପତି ହଟିବା ପରେ ଏହାକୁ ନେଇ ଉଷ୍ଣ ହୋଇଛି ରାଜନୀତି । ଏନେଇ ସ୍ଥାନୀୟ ସାଂସଦଙ୍କୁ ଟାର୍ଗେଟ କରିଛନ୍ତି ମୀନାକ୍ଷୀ । ଏହି ପ୍ରସଙ୍ଗରେ ଦଳର ବିଧାୟକମାନେ ବି ଭିନ୍ନ ଭିନ୍ନ ମତ ରଖିଛନ୍ତି । ବରିଷ୍ଠ ବିଧାୟକ ସୁରେଶ ରାଉତରାୟ କହିଛନ୍ତି- ମୀନାକ୍ଷୀଙ୍କ ପ୍ରତି କରାଯାଇଛି ଅନ୍ୟାୟ । ଆଲୋଚନା ଜରିଆରେ ବିଧାୟକ ତାରା ପ୍ରସାଦ ବାହିନୀପତି ଏହାର ସମାଧାନ କରିବେ ।

ଅନ୍ୟପଟେ ସଭାନେତ୍ରୀ ପଦରୁ ମୀନାକ୍ଷା ଯିବା ଠିକ୍ ବୋଲି ଯୁକ୍ତି କରିଛନ୍ତି ବିଧାୟକ ମହମ୍ମଦ ମୋକିମ ଓ ସନ୍ତୋଷ ସିଂ ସାଜୁଲା । ମୋକିମଙ୍କ କହିବା କଥା- ଜଣେ ନାରୀନେତ୍ରୀଙ୍କୁ ଜିଲ୍ଲାସ୍ତରରୁ ଆଣି ରାଜ୍ୟ ସଂଗଠନର ଦାୟିତ୍ବ ଦିଆଯାଇଛି । ସେହିପରି ମୀନାକ୍ଷୀଙ୍କ ନିଯୁକ୍ତି ନେଇ ଯଦି କୌଣସି ଦଳୀୟ ବିଶୃଙ୍ଖଳା ଦେଖାଯାଏ ତେବେ ଶୃଙ୍ଖଳାଗତ କାର୍ଯ୍ୟାନୁଷ୍ଠାନ ନିଆଯିବ ବୋଲି କହି ତାରାଙ୍କୁ ସତର୍କ କରାଇଛନ୍ତି ସାଲୁଜା ।

ବେଶ୍ କିଛିଦିନ ଧରି କୋରାପୁଟ ଜିଲ୍ଲା ସଭାପତି ପଦକୁ ନେଇ ବିଧାୟକ ତାରା ପ୍ରସାଦ ବାହୀନପତି ଓ ସାଂସଦ ସପ୍ତଗିରି ଉଲାକା ମଧ୍ୟରେ ବିବାଦ ଲାଗି ରହିଥିଲା । ଅନ୍ୟପଟେ ବିଧାୟକ ମହମ୍ମଦ ମୋକିମ କାରଣ ଦର୍ଶାଅ ନୋଟିସର ଜବାବ ଦେଇଛନ୍ତି । ସେ ଜଣେ ଶୃଙ୍ଖଳିତ କର୍ମୀ ଓ କୌଣସି ବିଶୃଙ୍ଖଳା କରି ନଥିବା କହିଛନ୍ତି ମୋକିମ ।