କମ୍ପ୍ରମାଇଜ କଲେ ମଣ୍ଡିରେ ଉଠୁଛି ଚାଷୀଙ୍କ ଧାନ, ନହେଲେ…

ଭଦ୍ରକ: ଭଦ୍ରକ ଜିଲ୍ଲା ଚାନ୍ଦାବାଲିରେ ଧାନ ମଣ୍ଡିରେ ବ୍ୟାପକ ଅବ୍ୟବସ୍ଥା । ଧାନ ବିକ୍ରି ପାଇଁ ମିଲ୍ ଆଗରେ ଶହ ଶହ ଗାଡ଼ିର ଲମ୍ବା ଲାଇନ । ଯିଏ ଯେତେ କମ୍ପ୍ରମାଇଜ କରିପାରିଲା, ସେ ସେତେ ଆଗରେ ଧାନ ବିକ୍ରି କରିପାରିଲା । ଆଉ ଯିଏ ସରକାରୀ ନିୟମକୁ ଅଡ଼ି ବସିଲା, ଧାନ ବିକ୍ରି କରିବା ତା ପାଇଁ ସ୍ୱପ୍ନ ପାଲଟି ଯାଉଛି । ଆଉ କଟନି ଛଟନି କଥା ନକହିଲେ ଭଲ । ଯୋଗାଣ ମନ୍ତ୍ରୀ କହୁଛନ୍ତି ଯେଉଁ ମଣ୍ଡିରେ କଟନି ଛଟନି ହେଉଛି, ତା’ହାର ତାଲିକା ଦେଲେ କାର୍ଯ୍ୟାନୁଷ୍ଠାନ ହେବ । ହେଲେ ଏଠାରେ ଯୋଗାଣ ମନ୍ତ୍ରୀଙ୍କ ବୟାନ ପ୍ରହସନ ପାଲଟି ଥିବା ଅଭିଯୋଗ ହେଉଛି ।

ଯେଉଁ ମଣ୍ଡିରେ କଟନି ଛଟନି ହେଉଛି ତା’ର ଲିଷ୍ଟ ଦେଲେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଯୋଗାଣ ମନ୍ତ୍ରୀ କହୁଛନ୍ତି । ଚାନ୍ଦବାଲି ବ୍ଲକରେ ମୋଟ ୨୬ଟି ମଣ୍ଡିରେ ଚାଷୀଙ୍କଠାରୁ ଧାନ କ୍ରୟ କରାଯାଉଛି । ହେଲେ ବାତ୍ୟା ଦାନାର ଦ୍ୱାହି ଦେଇ ପ୍ରଶାସନର ଇଙ୍ଗିତରେ ସବୁଠି ୮ରୁ ୧୨ କେଜି ପର୍ଯ୍ୟନ୍ତ ଧାନ କଟାଯାଉଥିବା ଚାଷୀ ଅଭିଯୋଗ କରିଛନ୍ତି । ବିରୋଧ କଲେ, ମେସିନରେ ପକାଇ ୨୦ କେଜିରୁ ଅଧିକ ଧାନ କଟାଯିବାର ଚାଷୀକୁ ଧମକ ଦିଆଯାଉଛି । ଫଳରେ ବାଧ୍ୟ ହୋଇ ମୁଣ୍ଡ ନୂଆଁଉଛନ୍ତି ଚାଷୀ । ମିଲର ଆଉ ଆଫିସର ଫାଇଦାରେ ରହୁଥିବା ବେଳେ ସରକାରଙ୍କ ଘୋଷଣା ପ୍ରହସନ ପାଲଟିଛି ।

ମଣ୍ଡିରେ ସରକାରଙ୍କ ଧାନ କିଣା ଟାର୍ଗେଟ ଅଧା ହୋଇନି । ମିଲରଙ୍କ ମାନମାନି ଯୋଗୁଁ ପ୍ରତି ମଣ୍ଡିରେ ପଡ଼ି ରହିଛି ଶହ ଶହ କ୍ଵିଣ୍ଟାଲ ଧାନ । କିଛି ମଣ୍ଡିକୁ ମିଲର ଗନି ବ୍ୟାଗ ଯୋଗାଇ ପାରୁ ନଥିବା ଅଭିଯୋଗ ହୋଇଛି । ସେପଟେ ଟୋକନ କଟିଯିବା ଭୟରେ ଚାଷୀ ବାଧ୍ୟ ହୋଇ ଚଢ଼ା ଦରରେ ବାହାରୁ ଗନି ବ୍ୟାଗ କିଣି ଧାନ ମଣ୍ଡିକୁ ନେଉଛନ୍ତି । ସେପଟେ ନିଜ ଖର୍ଚ୍ଚରେ ମିଲ ନିକଟରେ ଗାଡ଼ି ପହଞ୍ଚାଇ ଦେଲେ ଜରି ବ୍ୟାଗ ଗ୍ରହଣ କରାଯାଉଛି । ଫଳରେ ମିଲରଙ୍କ ଗାଡ଼ି ଖର୍ଚ୍ଚ ବଞ୍ଚିବା ସହ ଗନି ବ୍ୟାଗ ଖର୍ଚ୍ଚ ମଧ୍ୟ ବଞ୍ଚିଯାଉଛି । ଏଥିରୁ ମୁନାଫା ନେଉଛନ୍ତି ମିଲର ଓ ଅଫିସର । ମାତ୍ର ଧାନ ମିଲ୍ ଆଗରେ ୩ରୁ ୪ ଦିନ ଗାଡ଼ିରେ ଧାନ ଲଦି ଅପେକ୍ଷା କରିବା ଯୋଗୁଁ ତଣ୍ଡ ଗଣୁଛି ଚାଷୀ ।

କେବଳ ଭାଷଣରେ ସୀମିତ ରହିଛି ସରକାରଙ୍କ ଚାଷୀଙ୍କ ପ୍ରତି ଦରଦ, ବାସ୍ତବ ସ୍ଥିତି କିନ୍ତୁ ପୂରା ଅଲଗା । ଚାଷୀମାନେ ଭୟରେ ଅଛନ୍ତି । ମିଲର ଓ ଅସାଧୁ କର୍ମଚାରୀଙ୍କ ଉପରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଦାବି କରିଛନ୍ତି ଚାନ୍ଦବାଲି ବିଧାୟକ ।

ଧାନ କିଣା ଆରମ୍ଭରୁ ଚାଲିଛି କଟନି ଛଟନି । ଚାଷୀ ମଧ୍ୟ ଅଭିଯୋଗ କରି ଆସୁଛନ୍ତି । ସେପଟେ ମନ୍ତ୍ରୀ କହୁଛନ୍ତି ଦୃଢ଼ କାର୍ଯ୍ଯାନୁଷ୍ଠାନ ହେବ । ତେବେ ମନ୍ତ୍ରୀଙ୍କ କଥା କେବେ କାମରେ ପରିଣତ ହେଉଛି, ଚାଷୀଙ୍କୁ ସୁବିଧା ମିଳୁଛି, ତାହାକୁ ଦେଖିବାକୁ ରହିଲା ।