ହାତର ଯାଦୁ ଆଗରେ ହାର ମାନିଛି ଅକ୍ଷମତା, ଆଖି ସାମ୍ନାରେ ଆଙ୍କୁଛନ୍ତି ଅବିକଳ ନକଲ

ଜୟପୁର: ସାଧନା ପାଖରେ ହାର ମାନିଛି ଅକ୍ଷମତା । ସେ ନିଜେ ସ୍ପଷ୍ଟ କଥା କହିପାରନ୍ତି ନାହିଁ କି ଶୁଣିପାରନ୍ତି ନାହିଁ । ହେଲେ ଅଳ୍ପ ସମୟରେ ଏମିତି ଚିତ୍ର ଆଙ୍କିଦିଅନ୍ତି ଯାହା ଜୀବନ୍ତ ମନେ ହୁଏ । ଅବୁଝା ଅକୁହା ମଣିଷର ଏ ଜିବନ୍ତ ଚିତ୍ର ଦେଖିବାକୁ ମିଳିଛି ଜୟପୁର ବାରିଣିପୁଟ ଗ୍ରାମର ଦିବ୍ୟାଙ୍ଗ ସୁଧାକରଙ୍କ ନିକଟରେ ।

ଚିତ୍ରକଳାରେ ଜୀବନ୍ତ କାରୁକାର୍ଯ୍ୟ । ଥରେ ଦେଖିଲେ ଆଖି ଫେରେନାହିଁ । ପେନସିଲ ଆର୍ଟଠୁ ଆରମ୍ଭ କରି କଲର ଆର୍ଟ ବା ପଟ୍ଟଚିତ୍ର ଓ ଥ୍ରିଡି ଆର୍ଟ ଭଳି ପ୍ରତିଟି ଚିତ୍ର ବେଶ ଆକର୍ଷଣିୟ । କେତେବେଳେ ରାସ୍ତା କଡ଼ କାନ୍ଥରେ ତ କେତେବେଳେ ମନ୍ଦିର କାନ୍ଥରେ ସୁନ୍ଦର ସୁନ୍ଦର ଚିତ୍ର ଆଙ୍କିପାରୁଛନ୍ତି । ଆମେ କହୁଛୁ ଜୟପୁର ବାରିଣିପୁଟର ଦିବ୍ୟାଙ୍ଗ ସୁଧାକରଙ୍କ କଥା । ଦୁଇ ମିନଟ ମଧ୍ୟରେ ଆଖି ସାମ୍ନାରେ ଆଙ୍କିଦେଇପାରନ୍ତି ଅବିକଳ ନକଲ । କେବଳ ସେତିକି ନୁହେଁ କାଠ ଓ ସୋଲୋରେ ବି ତିଆରି କରନ୍ତି ଅନେକ ଚିତ୍ର । ୪୦ ପ୍ରତିଶତ ମୁକ ଓ ବଧିର ହୋଇଥିଲେ ବି ନିଜ ଚିତ୍ରକଳା ଆଗରେ ହାର ମାନିଛି ତାଙ୍କ ସବୁ ଅକ୍ଷମତା । ଯାହାକି ତାଙ୍କୁ ସ୍ୱାବଲମ୍ଭୀ କରିଛି ।

ଦିବ୍ୟାଙ୍ଗ ସୁଧାକର ଯେତେବେଳେ ପଞ୍ଚମ ପାଠ ପଢୁଥିଲେ ସେତେବେଳେ ଏକ ଅଜଣା ରୋଗରେ ପୀଡ଼ିତ ହୋଇ ନା ଠିକରେ କଥା କହିପାରିଲେ ନା ଶୁଣିପାରିଲେ । କିନ୍ତୁ ଭଲ ଚିତ୍ର ଆଙ୍କିପାରୁଥିବାରୁ ଘରେ ଚୁପ ନବସି ନିଜର କଳା ଉପରେ ଅଧିକ ଫୋକସ କରି କଳାକେନ୍ଦ୍ରରେ ଶିକ୍ଷା ଗ୍ରହଣ କଲେ । ନିଜର ଏହି ପ୍ରତିଭାକୁ ନେଇ ଚର୍ଚ୍ଚା ସାଙ୍ଗକୁ ଜିନ ପରିବାରକୁ ଚଳେଇ ସ୍ୱାବଲମ୍ଭୀ ହୋଇପାରିଛନ୍ତି ସୁଧାକର । ଦିବ୍ୟାଙ୍ଗ ହୋଇ ହାରିନାହାନ୍ତି  ବରଂ ନିଜେ ସୁନ୍ଦର ଚିତ୍ର କରି ନିଜେ ସ୍ୱାବଲମ୍ଭୀ ହେବା ସହ ଅନ୍ୟମାନଙ୍କ ପାଇଁ ଉଦାହରଣ ପାଲଟିଛନ୍ତି ସୁଧାକର ।

(ଜୟପୁରରୁ ହୃଷୀକେଶ ମିଶ୍ର)