ପୁରୁଷ ବେଶରେ ଆସି ହୀରା ମୁଦି ଲୁଟିନେଲେ ଯୁବତୀ
ପୁରୀ: ଯୁବକ ବେଶରେ ମାତିଲେ ଯୁବତୀ ଲୁଟେରା । ହାଫ୍ ପ୍ୟାଣ୍ଟ୍, ଗଞ୍ଜି ପିନ୍ଧି ବେକରେ ଗାମୁଛା ପକାଇ ଡିକି ଭାଙ୍ଗି ଲୁଟିନେଲା ହୀରା ମୁଦି । ସିସିଟିଭି ଯାଞ୍ଚ ବେଳେ ପ୍ରଥମେ ଯୁବକ ବୋଲି ସନ୍ଦେହ ସୃଷ୍ଟି ହୋଇଥିବା ବେଳେ ପରେ ସେ ଜଣେ ଯୁବତୀ ବୋଲି ଜଣାପଡ଼ିଥିଲା । ତେବେ ଏହି ଘଟଣାର ଅଧିକ ତଦନ୍ତ ପୁରୀ କୁମ୍ଭାରପଡ଼ା ପୋଲିସ କରୁଛି ।
ସୂଚନା ଅନୁସାରେ ଶନିବାର ଭୋରରୁ ପୁରୀ ବ଼ଡ଼ଦାଣ୍ଡରେ ଜଣେ ଘରୋଇ ବ୍ୟାଙ୍କ କର୍ମଚାରୀଙ୍କ ଗାଡି ଡିକି ଭାଙ୍ଗି ହୀରା ମୁଦି ଲୁଟ୍ କରିଥିଲେ ଲୁଟେରା । ୧୫ ଦିନିଆ କ୍ୟାମ୍ପ ପାଇଁ ସରିତା ଓ ତାଙ୍କ ୨ ଜଣ ସହକର୍ମୀ ଗତ ୨୨ ତାରିଖରେ ପୁରୀ ଆସିଥିବା ବେଳେ ବଡ଼ଦାଣ୍ଡ ମାର୍କେଟ ଛକ ନିକଟ ଏକ ଲଜ୍ରେ ରହିଥିଲେ । ତେବେ ଗତ ଶୁକ୍ରବାର ରାତିରେ ଲଜ୍ ସମ୍ମୁଖରେ ସରିତା ତାଙ୍କ ମୋପେଡ ଗାଡି ପାର୍କିଂ କରି ଲଜକୁ ଯାଇଥିବା ବେଳେ ଗାଡ଼ି ଡିକିରେ ତାଙ୍କ ପର୍ସ ଛାଡ଼ି ଯାଇଥିଲେ । ପର୍ସରେ ହୀରା ମୁଦି ଥିଲା । ତେବେ ଏହି ଚୋରିର ଦୃଶ୍ୟ ଲଜରେ ଲାଗିଥିବା ସିସିଟିଭିରେ କଏଦ ହୋଇଛି ।
