ଢେଙ୍କାନାଳ ଖଣି ଖାଦାନ ଉପରେ ପ୍ରଶାସନର ଚଢ଼ାଉ

ନନ୍ଦିଘୋଷ ବ୍ୟୁରୋ: ଢେଙ୍କାନାଳ ଖଣି ଖାଦାନ ଉପରେ ପ୍ରଶାସନର ସବୁଠାରୁ ବଡ ରେଡ। ଗନ୍ଦିଆ ତହସିଲ ନିହଲ ପ୍ରସାଦ ବେଆଇନ ପାହାଡ ଓ ପଥର ଖଣି ଗୁଡ଼ିକରେ ପ୍ରଶାସନର ଜୋରଦାର ଚଢ଼ାଉ । ତିନି ଦିନ ହେଲା ଚାଲିଛି ରେଡ । ଏଯାବତ ବେଆଇନ କାରବାର ଅଭିଯୋଗରେ ୬ ଜିଲ୍ଲାର ୨୧ ଖଣି ମାଫିଆଙ୍କୁ ପ୍ରଶାସନ ବାନ୍ଧିଲାଣି । ୧୭ ଟ୍ରକ୍ ସମେତ ଗୋଟିଏ କାର ଓ ବାଇକ୍ ଜବତ ହୋଇଛି । ସଂରକ୍ଷିତ ଜଙ୍ଗଲରେ ଥିବା ଖଣି ଖାଦାନରୁ ମାଫିଆ ଖଣି ଲୁଟ କରୁଥିବା ଅଭିଯୋଗ ହୋଇଥିଲା । ୧୬୩ ଧାରା ଜାରି ସତ୍ତ୍ବେ ନିଶ୍ଚିନ୍ତା ପାହାଡକୁ କାଟି କଳା ପଥର ଲୁଟ କରୁଥିଲେ ଢେଙ୍କାନାଳ ସମେତ କେନ୍ଦୁଝର, ମୟୂରଭଞ୍ଜ, ଯାଜପୁର,କଟକ,ଖୋର୍ଦ୍ଧା,ଓ ଭଦ୍ରକ ଖଣି ମାଫିଆ । ଏହାପରେ ଏନଜିଟି ନିର୍ଦ୍ଦେଶରେ ସ୍ଥାନୀୟ ପ୍ରଶାସନର ତିନିଟି ବିଭାଗ ରେଡ ଆରମ୍ଭ କରିଥିଲେ । ଏଥିରେ ପୋଲିସ ସହ ରାଜସ୍ବ  ଓ ବନ ବିଭାଗ ସାମିଲ ଅଛନ୍ତି । ଏକସାଙ୍ଗରେ ୯୦ ଜଣ କର୍ମଚାରୀ ରେଡ କରୁଛନ୍ତି । ଜିଲ୍ଲାପାଳ କହିଛନ୍ତି, ଏହି ଚଢାଉ ଜିଲ୍ଲାର ପ୍ରତ୍ଯେକ ଅଞ୍ଚଳରେ ହେବ । ଆଠଟି ତହସିଲରେ ଥିବା ବେଆଇନ ଖଣି କ୍ରସର ଗୁଡ଼ିକରେ ରେଡ ହେବ। ଖଣି ମାଫିଆଙ୍କୁ ସାବାଡ କରାଯିବ ବୋଲି କହିଛନ୍ତି ଜିଲ୍ଲାପାଳ ।