ଚାଷୀଙ୍କ ପାଇଁ ଦାଉ ସାଜିଲା ଅଦିନିଆ ବର୍ଷା, କେମିତି ସୁଝିବେ ଋଣ?

ଧର୍ମଗଡ଼: ଅଦିନିଆ ବର୍ଷା ଯୋଗୁଁ ନଷ୍ଟ ହୋଇଗଲା କପା । କଳାହାଣ୍ଡି ଜିଲ୍ଲାର ଧଳା ସୁନା କୁହାଯାଉଥିବା କପା ଚାଷରେ କ୍ଷତି l ବର୍ଷକର ଚାଷକୁ ନଷ୍ଟ ହେବାର ଦେଖି ଚାଷୀକୂଳ ହତାଶ । ପରିବାର ପ୍ରିତିପୋଷଣଙ୍କୁ ନେଇ ଚିନ୍ତାରେ ଚାଷୀ ।କେମିତି ସୁଝିବେ ଋଣ ସେଇ ଚିନ୍ତା ।

ଅଦିନିଆ ବର୍ଷା ଯୋଗୁ ନଷ୍ଟ ହେଲା କପା । କଳାହାଣ୍ଡି ଗୋଲାମୁଣ୍ଡାରେ ଏକର ଏକର ଜମିରେ କପା ଫସଲ ନଷ୍ଟl ବର୍ଷକର ରୋଜଗାରକୁ ନଷ୍ଟ ହେବା ଦେଖି ହତାଶ ଚାଷୀ । ଚଳିତ ବର୍ଷ ଧାନ ତୁଳନାରେ ଅଧିକ ହେକ୍ଟର ଜମିରେ କପା ଚାଷ ହୋଇଥିଲା।  ପାଖା ପାଖି  20ହଜାରରୁ ଉର୍ଦ୍ଧ୍ବ ହେକ୍ଟର ଜମିରେ ହୋଇଥିଲା କପା ଚାଷ l ହେଲେ କୋହଲା ପାଗ ସାଂଗକୁ ଅଦିନିଆ ଝିପିଝିପି ବର୍ଷା ସବୁକିଛି ଉଜାଡି ଦେଇଛି । କ୍ଷେତକୁ ଦେଖି ଚିନ୍ତାରେ ଚାଷୀ ।

ବିଗତ ବର୍ଷ ମାନଙ୍କରେ ଏହି ଅଞ୍ଚଳରେ ଉନ୍ନତ ମାନର କପା ବିଦେଶକୁ ରପ୍ତାନି ହେଉଥିଲା । କପା ବିକ୍ରି କରି ଚାଷୀ ଭଲ ରୋଜଗାର କରୁଥିଲା । ଚଳିତ ବର୍ଷ ମଧ୍ୟ ଧାର କରଜ କରି ଚାଷୀ କପା ଚାଷ କରିଥିଲେ । ଲକ୍ଷ୍ୟ ଥିଲା ଭଲ ରୋଜଗାର ହେବ । କିନ୍ତୁ ଠିକ ଅମଳ ବେଳକୁ ବର୍ଷା ଦାଉ ସାଧିଲା। 50 ପ୍ରତିଶତ ଚାଷ ନଷ୍ଟ ହୋଇଗଲାl ମୁଣ୍ଡ ଝାଳ ତୁଣ୍ଡରେ ମାରି ଚାଷ କରିଥିବା ଚାଷୀ କେମିତି ପରିବାର ପ୍ରତିପୋଷଣ କରିବ ଏବେ ସେଇ ଚିନ୍ତାl ଅନ୍ୟପଟେ କପା ନଷ୍ଟ ବାବଦରେ ଚାଷୀ କ୍ଷତିପୂରଣ ପାଇବେ ବୋଲି ଜୁନାଗଡ଼ ବିଧାୟକ କହିଛନ୍ତି l