ଅଷ୍ଟଶମ୍ଭୁଙ୍କର ସହର ସୁବର୍ଣ୍ଣପୁରରେ କଟକଣା, ମନ୍ଦିରରେ ଜାଗର ଦୀପ ଜାଳିପାରିବେନି ଭକ୍ତ
ସୁବର୍ଣ୍ଣପୁର: ଅଷ୍ଟଶମ୍ଭୁଙ୍କ ସହର ସୁବର୍ଣ୍ଣପୁରରେ ଆଜି କୋଭିଡ କଟକଣା ମଧ୍ୟରେ ପାଳିତ ହେଉଛି ମହାଶିବରାତ୍ରୀ । ଶ୍ରଦ୍ଧାଳୁମାନେ ତେଲନଦୀ ମହାନଦୀ ଓ କର୍ପୁର ନଦୀର ତ୍ରୀବେଣୀ ସଂଗମରେ ସ୍ନାନ କରିବା ସହିତ ଇଷ୍ଟଦେବ ସୁବର୍ଣ୍ଣମେରୁ ବାବା ଓ ରାମେଶ୍ୱର ବାବାଙ୍କୁ ଦର୍ଶନ କରିଛନ୍ତି । ସହରର ଅନ୍ୟତମ ଶୈବ ପୀଠ ଗୋକର୍ଣ୍ଣେଶ୍ୱର, ସୋମନାଥ, ଲୋକନାଥ ଆଦି ଶୈବପୀଠରେ ଶ୍ରଦ୍ଧାଳୁମାନଙ୍କ ଆଗମନ ହେଉଛି ।
କରୋନା କଟକଣାକୁ ଆଖି ଆଗରେ ରଖି ମନ୍ଦିର କମିଟି ପକ୍ଷରୁ ଭକ୍ତମାନଙ୍କର ଦର୍ଶନ ପାଇଁ ବ୍ୟାପକ ସୁବିଧା କରାଯାଇଛି । ଏହାସହ ସଂଧ୍ୟାରେ ଭକ୍ତମାନେ ନିଜ ଘରେ ରହି ଜଗାର ଦୀପ ଜାଳନ୍ତୁ ବୋଲି ପ୍ରଶାସନ ପକ୍ଷରୁ ପରାମର୍ଶ ଦିଆଯାଇଛି । ମନ୍ଦିରରେ ଦୀପ ଜାଳିବାକୁ ହେଲେ ସେବାୟତମାନଙ୍କ ଦ୍ୱାରା ଜାଳିବା ପାଇଁ କୁହାଯାଇଛି ।
ସେହିପରି ଜିଲ୍ଲାର ପ୍ରସିଦ୍ଧ ଶୈବପୀଠ ଚରଦାର କପିଳେଶ୍ୱର, ବୈଦ୍ୟନାଥର କୋଶଳେଶ୍ୱର, ଚମ୍ପାମାଳର ଚମ୍ପେଶ୍ୱର, ବିଶିପଡାର କପିଳେଶ୍ୱର, ବୀରମହାରାଜପୁରର ଗୋଧନେଶ୍ୱର ଆଦି ପୀଠରେ ମଧ୍ୟ କୋଭିଡ୍ କଟକଣା ମଧ୍ୟରେ ମହା ଶିବରାତ୍ରି ପାଳିତ ହେଉଛି । ଆଜି ରାତି ଦ୍ୱିତୀୟ ପ୍ରହରରେ ବାବା ସୁବର୍ଣ୍ଣମେରୁଙ୍କ ପୀଠରେ ମହାଦୀପ ଉଠିବା ପାଇଁ ନୀତି ନିର୍ଘଣ୍ଟ କରାଯାଇଛି । ତେବେ ଚଳିତ ବର୍ଷ କରୋନା କଟକଣା ଯୋଗୁଁ ବିଶେଷ ଭକ୍ତଙ୍କ ସମାଗମ ହେଉ ନ ଥିବା ଦେଖିବାକୁ ମିଳିଛି ।
