ଦୁଇ ଗୋଷ୍ଠୀର ନେତାଙ୍କ ସହ ଆଲୋଚନା କଲେ ଉପ- ମୁଖ୍ୟମନ୍ତ୍ରୀ କେଭି ସିଂହଦେଓ ଏବଂ ମନ୍ତ୍ରୀ ଗୋକୁଳାନନ୍ଦ ମଲ୍ଲିକ । ମାଲକାନଗିରିରେ ଶାନ୍ତି ଫେରାଇବା ପାଇଁ ଦୁଇ ପକ୍ଷର ନେତା ମାନଙ୍କୁ ନେଇ, ମାଲକାନଗିରି ଜିଲ୍ଲାପାଳଙ୍କ କାର୍ଯ୍ୟାଳୟରେ ଗୋଟିଏ ବୈଠକ କରିଛନ୍ତି । ଏହି ବୈଠକରେ ଦୁଇ ପକ୍ଷର ବିଭିନ୍ନ ଅଭିଯୋଗ ଓ ଦାବି ଗୁଡ଼ିକ ଶୁଣି ଅଭିଯୋଗ ଓ ସମସ୍ୟାର ସମାଧାନ ପାଇଁ ପଦକ୍ଷେପ ନିଆଯିବ ବୋଲି କେଭି ସଂଦେଓ ଆଶ୍ଵାସନା ଦେଇଛନ୍ତି । ଏଥିରେ ମାଲକାନଗିରି ବିଧାୟକ ନରସିଂହ ମାଡକାମି,ଏ ଡି ଜି ସଞ୍ଜିବ ପଣ୍ଡା, ଜିଲ୍ଲାପାଳ ସୋମେଶ ଉପାଧ୍ୟାୟ ଓ ଆରକ୍ଷୀ ଅଧିକ୍ଷକ ବିନୋଦ ପାଟିଲ ଏଚ ଯୋଗ ଦେଇଥିଲେ । ସେପଟେ ସମ୍ପୂର୍ଣ୍ଣ ଜିଲାରେ ପୁଣି ୧୨ ଘଣ୍ଟା ବଢ଼ିଲା ଇଣ୍ଟରନେଟ କଟକଣା । ଆଜି ମଧ୍ୟରାତ୍ରୀ ୧୨ଟା ପର୍ଯ୍ୟନ୍ତ ରହିବ ଇଣ୍ଟରନେଟ କଟକଣା । ଗତକାଲି ମହିଳାଙ୍କ କଟାମୁଣ୍ଡ ମିଳିଥିଲା । କଟା ମୁଣ୍ଡ ମିଳିବା ପରେ ଅନ୍ତିମ ସଂସ୍କାର ହୋଇଥିବା ଶବ ନିକଟରେ ମୁଣ୍ଡକୁ ପୋତାଯାଇଛି । ମୁଣ୍ଡ ବିହୀନ ଶବ ଉଦ୍ଧାର ପରେ ଆରମ୍ଭ ହୋଇଥିଲା ହିଂସାକାଣ୍ଡ । ଏମଭି ୨୬ ଓ ରାଖେଲଗୁଡା ଗାଁ ମଧ୍ୟରେ ଆରମ୍ଭ ହୋଇଥିଲା ସଂଘର୍ଷ । ହେଲେ ଶାନ୍ତି କମିଟିର ବୁଝାମଣା ପରେ ଏବେ ଧିରେ ପରିସ୍ଥିତିରେ ଆସୁଛି ସୁଧାର । ତେବେ ଘଟଣା ସ୍ଥଳରେ ଏବେ ବି ମୁତୟନ ରହିଛନ୍ତି ୧୫ ପ୍ଲାଟୁନ କେନ୍ଦ୍ରୀୟ ଫୋର୍ସ, ୨୦ ପ୍ଲାଟୁନ ପୋଲିସ । ଘଟଣାର ସ୍ଥିତି ଅନୁଧ୍ୟାନ କରିଛନ୍ତି ପୋଲିସ ଡିଜି । କ୍ଷତିଗ୍ରସ୍ଥ ଲୋକଙ୍କୁ ଖାଦ୍ୟ ଓ କମ୍ବଳ ଯୋଗାଇଛି ପ୍ରଶାସନ । ସେପଟେ ମହିଳାଙ୍କୁ ହତ୍ୟା ଘଟଣାରେ ଜଣେ ଅଭିଯୁକ୍ତ ଗିରଫ ହୋଇଛି । ଗିରଫ ଅଭିଯୁକ୍ତ ହେଲା ଏମଭି ୨୬ର ସୁଖରଞ୍ଜନ ମଣ୍ଡଳ।
