ବିଧାୟକଙ୍କୁ ଏସି ବେଡ୍, ନିଆଁରେ ପୋଡ଼ି ଯାଇଥିବା ନାବାଳିକାଙ୍କୁ କ୍ୟାବିନରୁ କାଢ଼ିଦେଲେ ଡାକ୍ତରଖାନା କର୍ତ୍ତୃପକ୍ଷ
ଦେବଗଡ଼: କିଏ ଆଗ ? ଜନ ପ୍ରତିନିଧି ନା ଜନତା ? ଗିରଫ ବିଧାୟକଙ୍କ ପାଇଁ କୁନି ଝିଅକୁ ଯନ୍ତ୍ରଣା ମୁହଁକୁ ଠେଲିଦେଲେ ଡାକ୍ତରଖାନା କର୍ତ୍ତୃପକ୍ଷ । ଗିରଫ ହୋଇଥିବା ବିଧାୟକ ସୁବାସ ଚନ୍ଦ୍ର ପାଣିଗ୍ରାହୀଙ୍କୁ ଏସି ବେଡ୍ ଯୋଗାଇ ଦେବାକୁ ଯାଇ ନିଆଁରେ ପୋଡ଼ିଯାଇ ଗୁରୁତର ଥିବା ନାବାଳିକାକୁ କ୍ୟାବିନରୁ ବାହାର କରି ଦିଆଯାଇଥିବା ଅଭିଯୋଗ ହୋଇଛି । ଦେବଗଡ଼ ବାରକୋଟ ବ୍ଲକ ଚକ୍ରପାଲି ଗାଁର ୭ବର୍ଷର ଝିଅ ସ୍ନେହାଁ ଗତ ଜାନୁଆରୀ ମାସରେ ପୋଡ଼ି ଯାଇ ଗୁରୁତର ହୋଇଥିଲେ । ଅସହ୍ୟ ଗୀଷ୍ମ ପ୍ରବାହରେ ଛଟପଟ ହୋଇ ଜିଲ୍ଲା ପ୍ରଶାସନର ସହାୟତାରେ ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି ହୋଇଥିଲେ ସ୍ନେହାଁ ।
ସେଠାରେ ଶୀତତାପ ନିୟନ୍ତ୍ରିତ କକ୍ଷରେ ତାଙ୍କର ଚିକିତ୍ସା ଜାରି ରହିଥିଲା । ତେବେ ଗିରଫ ବିଧାୟକ ସୁବାସ ପାଣିଗ୍ରାହୀ ଅସୁସ୍ଥ ହୋଇ ଡାକ୍ତରଖାନାରେ ଭର୍ତ୍ତି ହେବାରୁ ସ୍ନେହାଁଙ୍କୁ ଉକ୍ତ କ୍ୟାବିନରୁ ବାହାର କରି ବିଧାୟକଙ୍କୁ ଦିଆଯାଇଥିବା ଅଭିଯୋଗ ହୋଇଛି । ବିଧାୟକଙ୍କ ପାଇଁ ଜଣେ ଗୁରୁତର ନାବାଳିକାଙ୍କୁ କ୍ୟାବିନରୁ ବାହାରି କରିଦେବା ଘଟଣାକୁ ସବୁଠି ନିନ୍ଦା କରାଯାଇଛି । ଅନ୍ୟପଟେ ଏକ ସ୍ୱେଛାସେବୀ ଅନୁଷ୍ଠାନ ସ୍ନେହାଁକୁ ଏସି କ୍ୟାବିନରେ ଭର୍ତ୍ତି କରି ସମସ୍ତ ଖର୍ଚ୍ଚ ବହନ କରିଛନ୍ତି । ସ୍ନେହାଁର ସ୍ୱାସ୍ଥ୍ୟାବସ୍ଥା ଭଲ ଥିବାରୁ ତାକୁ ସାଧାରଣ କ୍ୟାବିନକୁ ସ୍ଥାନାନ୍ତର କରାଯାଇଥିବା କହିଛନ୍ତି ମେଡିକାଲ ସୁପରିଟେଣ୍ଡେଣ୍ଟ ।
