ଭୁବନେଶ୍ୱର: ଲଘୁଚାପ ପରେ କମିଲା ଶୀତ। ଉପାନ୍ତରୁ ଉପକୂଳ ଘନ କୁହୁଡିର ଆସ୍ତରଣ। ଶୀତ ଲହରୀରେ ବ୍ରେକ୍, ଫେରିଲା କୁହୁଡି। ରାଜଧାନୀରେ ଘନ କୁହୁଡିର ଆସ୍ତରଣ। ସକାଳ ୬ଟାରେ ମୁହଁକୁ ମୁହଁ ଦିଶୁନି। ଯାତାୟତରେ ସମସ୍ୟା ହେଉଥିବା ବେଳେ ଗାଡିଚାଳକ ଗାଡି ଲାଇଟ୍ ଦେଇ ଯାଆସ କରୁଛନ୍ତି। କୁହୁଡିର ମୋଟା ଆସ୍ତରଣ ଦେଖିବାକୁ ମିଳିଛି ରାଜଧାନୀ ଭୁବନେଶ୍ୱରରେ। ସେପଟେ ରାଜ୍ୟରେ କମିଛି ବର୍ଷା। ଅଧିକାଂଶ ଜିଲ୍ଲାରେ ଆକାଶ ମେଘାଛନ୍ନ ରହିଛି। ସୃଷ୍ଟି ହୋଇଥିବା ଲଘୁଚାପ ଆଜି ଅଧିକ ଘନୀଭୂତ ହୋଇ ଓ୍ୱେଲମାର୍କ ଲୋ-ପ୍ରେସରରେ ପରିଣତ ହେବ।
ଏହା ପ୍ରଭାବରେ ୧୭ ଏବଂ ୧୮ ତାରିଖରେ ଦକ୍ଷିଣ ଓଡ଼ିଶାରେ ପ୍ରବଳରୁ ଅତି ପ୍ରବଳ ବର୍ଷା ହେବାର ସମ୍ଭାବନା ରହିଛି। ୧୭ ତାରିଖରେ ପ୍ରବଳ ବର୍ଷା ପାଇଁ ଗଞ୍ଜାମ ଏବଂ ଗଜପତି ଜିଲ୍ଲାକୁ ୟେଲୋ ଆଲର୍ଟ ଜାରି କରାଯାଇଥିବା ବେଳେ ୧୮ ତାରିଖରେ ଦକ୍ଷିଣ ଓଡ଼ିଶାର ୫ଟି ଜିଲ୍ଲା ଯଥା ଗଞ୍ଜାମ, ଗଜପତି, ରାୟଗଡା, କୋରାପୁଟ ଏବଂ ମାଲକାନଗିରିକୁ ସତର୍କତା ଜାରି କରାଯାଇଛି। ଉପକୂଳ ଓଡ଼ିଶାର ଜିଲ୍ଲା ଗୁଡିକରେ ପାଗ କୋହଲା ରହିବା ସହ କିଛି ସ୍ଥାନରେ ବର୍ଷା ହେବାର ସମ୍ଭାବନା ରହିଛି। ସମୁଦ୍ର ଅଶାନ୍ତ ରହିବା କାରଣରୁ ମତ୍ସଜୀବୀଙ୍କୁ ସମୁଦ୍ର ମଧ୍ୟକୁ ଯିବାକୁ ବାରଣ କରାଯାଇଛି।
