ବିଷ ବାୟୁରେ ଅଣନିଶ୍ବାସୀ ଦିଲ୍ଲୀବାସୀ, ଥମୁନି ପ୍ରଦୂଷଣ

ନୂଆଦିଲ୍ଲୀ: ଦିଲ୍ଲୀରେ ଥମୁନି ବାୟୁ ପ୍ରଦୂଷଣ । ଆଜିବି ଖରାପ ସ୍ଥିତିରେ ରହିଛି ବାୟୁର ଗୁଣବତ୍ତା ମାନ । ଜାତୀୟ ରାଜଧାନୀ ଦିଲ୍ଲୀରେ ଏୟାର କ୍ବାଲିଟି ଇଣ୍ଡେକ୍ସ ୩୯୮ ରେକର୍ଡ ହୋଇଛି। ଗତକାଲି ତୁଳନାରେ କିଛି ସ୍ଥାନରେ ବାୟୁରମାନରେ ସାମାନ୍ୟ ସୁଧାର ଆସିଥିଲେ ମଧ୍ୟ ଖରାପ ସ୍ଥିତିରେ ରହିଛି । ବିଷ ବାୟୁରେ ଅଣନିଶ୍ବାସୀ ହୋଇ ପଡିଛନ୍ତି ରାଜଧାନୀବାସୀ ।

କେବଳ ଦିଲ୍ଲୀ ନୁହଁ ଆଖପାଖ ରାଜ୍ୟରେ ମଧ୍ୟ ପ୍ରଦୂଷଣର ମାତ୍ରା ବଢିଛି । ହରିୟାଣା, ଉତ୍ତରପ୍ରଦେଶ, ରାଜସ୍ଥାନର ଅନେକ ସ୍ଥାନରେ ପ୍ରଦୂଷଣର ମାତ୍ରା ଅତି ଖରାପ ସ୍ଥିତିରେ ରହିଛି । ବାୟୁର ମାନରେ ସୁଧାର ଆସୁନଥିବାରୁ କେନ୍ଦ୍ରର ସହାୟତା ଲୋଡ଼ିଲେ ଦିଲ୍ଲୀ ପରିବେଶ ମନ୍ତ୍ରୀ ଗୋପାଳ ରାୟ । କଟକଣାକୁ ନେଇ ଗ୍ରେଡେଡ ରେସପନ୍ସ ଆକ୍ସନ ପ୍ଲାନ୍ GRAP ନିୟମକୁ କଡ଼ାକଡ଼ା ଭାବେ ଲାଗୁ କରିବାକୁ ୬ ଜଣିଆ କମିଟି ଗଠନ କରାଯାଇଛି । ପରିବେଶ ବିଭାଗ ସଚିବଙ୍କ ନେତୃତ୍ବରେ ଏହି କମିଟି ଗଠନ କରାଯାଇଛି।  ଦିଲ୍ଲୀରେ ପ୍ରଦୂଷଣ ବଢିଥିବାରୁ ମୁଖ୍ୟତଃ ଶିଶୁଙ୍କ ସ୍ବାସ୍ଥ୍ୟ ଉପରେ ଏହାର ଅଧିକ କୁପ୍ରଭାବ ପଡୁଛି । ସେହିପରି ବରିଷ୍ଠ ନାଗରିକ ମଧ୍ୟ ପ୍ରଦୂଷଣକୁ ନେଇ ହନ୍ତସନ୍ତ ହେଉଛନ୍ତି । ଖୋଲା ଆକାଶରେ ବୁଲିବା ସେମାନଙ୍କ ଲାଗି କଷ୍ଟକର ହୋଇପଡିଛି । ପ୍ରଦୂଷଣ ଯୋଗୁଁ ଅନେକ ଶ୍ବାସ ଜନିତ ରୋଗର ଶିକାର ହେଉଛନ୍ତି।