କେନ୍ଦ୍ର ସରକାରଙ୍କ ପ୍ରସ୍ତାବ ଉପରେ ସଂଯୁକ୍ତ କିଷାନ ମୋର୍ଚ୍ଚାର ଆଲୋଚନା
ନୂଆଦିଲ୍ଲୀ: ଦିଲ୍ଲୀ ସୀମାରେ ଚାଲିଥିବା ଅନ୍ନଦାତାଙ୍କ ଆନ୍ଦୋଳନର ଅବସାନ ଘଟିପାରେ । ବର୍ତ୍ତମାନ କେନ୍ଦ୍ର ସରକାରଙ୍କ ପ୍ରସ୍ତାବ ଉପରେ ଚାଷୀ ସଂଗଠନର ଆଲୋଚନା ଚାଲୁଥିବାରୁ ଏଭଳି ଆଶା କରାଯାଉଛି । ଏଥିସହିତ କୃଷି ଆଇନ ପ୍ରତ୍ୟାହାର ନେଇ ସଂସଦରେ ପ୍ରକ୍ରିୟା ଗ୍ରହଣ କରାଯିବା ପରେ ଆନ୍ଦୋଳନରୁ ଓହରିବା ନେଇ ଚାଷୀମାନଙ୍କ ବଡ଼ ଗୋଷ୍ଠୀ ମନବଳାଇଥିବା କୁହାଯାଉଛି । କୃଷକ ସଂଗଠନ ବୈଠକରେ ପରେ ଏହି ଆନ୍ଦୋଳନକୁ ସମାପ୍ତ କରିବାକୁ ଘୋଷଣା କରାଯାଇପାରେ ।
କେନ୍ଦ୍ର ସରକାରଙ୍କ ପ୍ରସ୍ତାବ ଅନୁଯାୟୀ ସଂଯୁକ୍ତ କୃଷକ ମୋର୍ଚ୍ଚାର ୫ଜଣ ସଦସ୍ୟଙ୍କୁ ଏମ୍ଏସପି ଉପରେ ଗଠିତ ହେବାକୁ ଥିବା କମିଟିରେ ସାମିଲ କରାଯିବ । ଅନ୍ୟ ପକ୍ଷରେ ସରକାର ୧ବର୍ଷ ମଧ୍ୟରେ କୃଷକ ବିରୋଧରେ ଦାୟର ମାମଲାକୁ ମଧ୍ୟ ଫେରାଇ ନେବାକୁ ପ୍ରସ୍ତାବ ରହିଛି । ଏହା ବ୍ୟତୀତ ଏହି ପ୍ରସ୍ତାବରେ ପଞ୍ଜାବ ମଡେଲ ଉପରେ କ୍ଷତିପୂରଣ ଦେବା ନେଇ ମଧ୍ୟ କୁହାଯାଇଛି । ତେବେ ଲଖମିପୁର ଖେରୀ ମାମଲା ଓ ବିଜୁଳି ବିଲ୍ ନେଇ କୌଣସି ସକାରାତ୍ମକ ଆଲୋଚନା ହୋଇନାହିଁ ।
ସୂଚନା ଯୋଗ୍ୟ ଯେ, ବିବାଦୀୟ ତିନି କୃଷି ଆଇନ ପ୍ରତ୍ୟାହାର ସତ୍ତ୍ୱେ ଅନ୍ୟାନ୍ୟ ଦାବିରେ ଅଟଳ ରହିିଛନ୍ତି କୃଷକ । ମୃତ ଚାଷୀଙ୍କ ପରିବାରକୁ ଉଚିତ୍ କ୍ଷତିପୂରଣ ପ୍ରଦାନ, ଏମ୍ଏସପି ଆଇନ୍ ସିଦ୍ଧ୍ କରାଯିବା ସହିତ ଅନ୍ୟାନ୍ୟ ଦାବିରେ ଅଟଳ ଅଛନ୍ତି କୃଷକ । ଏହାସହ ଗୋଟିଏ ବର୍ଷ ଆନ୍ଦୋଳନ ଭିତରେ ୭୦୦ କୃଷକଙ୍କ ମୃତ୍ୟୁକୁ ନେଇ ସଂଗଠନ ସରକାରଙ୍କୁ ଦୋଷୀ ବୋଲି କହିଛି । ଏହାସହ ଲଖିମପୁର ଠାରେ କୃଷକମାନଙ୍କ ହତ୍ୟାକୁ କେନ୍ଦ୍ର ସରକାରଙ୍କ ଅହଂକାର ବୋଲି କହିଛି ସଂଗଠନ । ମୋର୍ଚ୍ଚା ତରଫରୁ ଲଖିମପୁର ହିଂସା ପ୍ରସଙ୍ଗରେ କେନ୍ଦ୍ରମନ୍ତ୍ରୀ ଅଜୟ ମିଶ୍ରାଙ୍କ ଇସ୍ତଫା ଦାବି କରିଛି ।
