ରାଜଧାନୀରେ କାୟା ବିସ୍ତାର କରୁଛି ଓମିକ୍ରନ, ୪ ନୂଆ ଆକ୍ରାନ୍ତ ଚିହ୍ନଟ
1 min read
ନୂଆଦିଲ୍ଲୀ: ଦିନକୁ ଦିନ ଦେଶେ କାୟା ବିସ୍ତାର କରୁଛି ଓମିକ୍ରନ। କରୋନା ଦ୍ୱିତୀୟ ଲହରରେ ସବୁଠୁ ଅଧିକ ପ୍ରଭାବିତ ହୋଇଥିବା ମହାରାଷ୍ଟ୍ର ଓ ଦିଲ୍ଲୀରେ ଓମିକ୍ରନ କେସ୍ ବଢ଼ିବାରେ ଲାଗିଛି। ଆଜି ରାଜଧାନୀ ଦିଲ୍ଲୀରେ ୪ ନୂଆ ଓମିକ୍ରନ ଷ୍ଟ୍ରେନ୍ ଆକ୍ରାନ୍ତ ଚିହ୍ନଟ ହୋଇଛନ୍ତି । ଏହାକୁ ମିଶାଇ ରାଜଧାନୀରେ ମୋଟ ଆକ୍ରାନ୍ତଙ୍କ ସଂଖ୍ୟା ୧୦ ଛୁଇଁଛି ।
ଏହି ୪ ନୂଆ ଆକ୍ରାନ୍ତଙ୍କ ମଧ୍ୟରୁ ୩ ଜଣ ନୂଆଦିଲ୍ଲୀର LNJP ହସ୍ପିଟାଲରେ ଚିକିତ୍ସାଧୀନ ଥିବା ବେଳେ ଜଣେ ଡିସଚାର୍ଜ ହୋଇଛନ୍ତି ବୋଲି ଦିଲ୍ଲୀ ସ୍ୱାସ୍ଥ୍ୟମନ୍ତ୍ରୀ ସତୈନ୍ଦ୍ର ଜୈନ୍ କହିଛନ୍ତି । LNJP ହସ୍ପିଟାଲରେ ଓମିକ୍ରନ ଭାରିଆଣ୍ଟ ଆକ୍ରାନ୍ତଙ୍କ ଲାଗି ଏକ ସ୍ୱତନ୍ତ୍ର ୱାର୍ଡ କରାଯାଇଛି । ଏଥିରେ ବେଡ୍ ସଂଖ୍ୟା ୪୦ରୁ ୧୦୦କୁ ବୃଦ୍ଧି କରାଯାଇଛି ।
ସୂଚନା ମୁତାବକ ଏବେ ସୁଦ୍ଧା ୧୧ ରାଜ୍ୟରେ ଓମିକ୍ରନ ଆକ୍ରାନ୍ତ ଠାବ ହୋଇଛନ୍ତି। ଦେଶେ ମୋଟ ଆକ୍ରାନ୍ତଙ୍କ ସଂଖ୍ୟା ୭୩ ହୋଇଥିବା ବେଳେ ସଂକ୍ରମଣ ସଂଖ୍ୟାରେ ସବୁଠୁ ଉପରେ ରହିଛି ମହାରାଷ୍ଟ୍ର । ମହାରାଷ୍ଟ୍ରରେ ୩୨ କେସ୍ ରିପୋର୍ଟ ହୋଇଛି । ସେହିଭଳି ରାଜସ୍ଥାନରେ ୧୭ ଓମିକ୍ରନ ଆକ୍ରାନ୍ତ ଚିହ୍ନଟ ହୋଇଛନ୍ତି । ସଂକ୍ରମଣ ସଂଖ୍ୟାରେ ତୃତୀୟରେ ରହିଛି ଦିଲ୍ଲୀ । କେରଳ, ଗୁଜରାଟ, କର୍ଣ୍ଣାଟକ, ତେଲେଙ୍ଗାନା, ଆନ୍ଧ୍ରପ୍ରଦେଶ, ଚଣ୍ଡିଗଡ଼, ତାମିଲନାଡୁ ଓ ପଶ୍ଚିମବଙ୍ଗରେ ବି ଓମିକ୍ରନ ଆକ୍ରାନ୍ତ ଚିହ୍ନଟ ହୋଇଛନ୍ତି।
