ନୂଆଦିଲ୍ଲୀ: ବିଷ ବଳୟରେ ଜାତୀୟ ରାଜଧାନୀ ଦିଲ୍ଲୀ। କିଛି ସ୍ଥାନରେ ବାୟୁର ମାନ ୪୦୦ ପାର କରିଛି। ଦେଶର ଟପ୍ ୧୦ ପ୍ରଦୂଷିତ ସହର ତାଲିକା ମଧ୍ୟରେ ଏକ ନମ୍ବର ସ୍ଥାନରେ ରହିଛି ଦିଲ୍ଲୀ। ଗ୍ଯାସ ଚାମ୍ବର ପାଲଟିଛି ଦିଲ୍ଲୀ। ଦିଲ୍ଲୀ ଏନସିଆରରେ ସ୍ଥିତି ବହୁତ ଖରାପ ରହିଛି। ଦିଲ୍ଲୀର ଅନେକ ସ୍ଥାନରେ ଏକ୍ଯୁଆଇ ୪୨୫ ରହିଥିଲା।
ଲଗାତାର ଆନନ୍ଦବିହାର ପ୍ରଦୂଷିତ ଅଂଚଳ ଭାବେ ପରିଗଣିତ ହୋଇଛି। ଏଠାରେ ସବୁଠାରୁ ଅଧିକ ପ୍ରଦୂଷଣ ରହିଛି। ବଜିରପୁରରେ ମଧ୍ୟ ଅଧିକ ପ୍ରଦୂଷଣ ରହିଛି।ଦ୍ଵାରକା, ଅଲୀପୁରରେ ମଧ୍ୟ ସ୍ଥିତି ଗମ୍ଭୀର ରହିଛି। ସେପଟେ ନଡା ଜାଳିବା ଉପରେ ଅଧିକ କଠୋର ହେଲେ ସରକାର। ନଡ଼ା ଜାଳିଲେ ଦେବାକୁ ହେବ ଡବଲ ଜରିମାନା ।
ଦିଲ୍ଲୀରେ ବଢୁଥିବା ପ୍ରଦୂଷଣକୁ ଦେଖି ଏଭଳି ନିଷ୍ପତ୍ତି ନେଇଛନ୍ତି ସରକାର। ପ୍ରଦୂଷଣ ପାଇଁ ପଡୋଶୀ ରାଜ୍ୟରେ ନଡ଼ା ଜାଳିବାକୁ ଦାୟୀ କରାଯାଉଛି। ନଡ଼ା ଜାଳୁଥିବା ବ୍ୟକ୍ତିଙ୍କୁ ଦୁଇ ଗୁଣା ଜୋରିମାନା ଦେବାକୁ ନିର୍ଦେଶ ଦିଆଯାଇଛି। ନିୟମ ଅନୁସାରେ ୫ ଏକରରୁ ଅଧିକ ଜମି ଥିବା କୃଷକଙ୍କୁ ୩୦ ହଜାର ଟଙ୍କା ଜରିମାନା ଦେବାକୁ ପଡିବ। ସେହିପରି ୨ ଏକରରୁ କମ୍ ଜମି ଥିବା କୃଷକଙ୍କୁ ଜରିମାନା ୫ ହଜାର ଟଙ୍କା ଏବଂ ୨ ରୁ ୫ ଏକର ମଧ୍ୟରେ ଜମି ପାଇଁ ୧୦ ହଜାର ଟଙ୍କା ଜରିମାନା ଦେବାକୁ ହେବ।
