ଦିଲ୍ଲୀର ପ୍ରଦୂଷଣ ସ୍ଥିତି ଜୀବନ ପ୍ରତି ବଢାଉଛି ବିପଦ

ନୂଆଦିଲ୍ଲୀ: ରାଜଧାନୀ ଦିଲ୍ଲୀରେ ବଢ଼ୁଛି ବାୟୁ ପ୍ରଦୂଷଣ । ଗତକାଲି ଦିଲ୍ଲୀର ଏୟାର କ୍ୱାଲିଟି ଇଣ୍ଡେକ୍ସ ବା AQI ୪୫୦ ପାର୍‌ ହୋଇଥିବା ବେଳେ ଆଜି ବି ୪ଶହ ଉପରେ ରହିଛି । ଦିନକୁ ଦିନ ସଙ୍ଗୀନ ହେଉଛି ଦିଲ୍ଲୀ ବାୟୁର ସ୍ଥିତି । ଦିଲ୍ଲୀର କେତେକ ସ୍ଥାନରେ ରାସ୍ତା ସ୍ପଷ୍ଟଭାବେ ଦେଖାଯାଉନଥିବା ବେଳେ ଘନ କୁହୁଡ଼ି ଦେଖାଦେଉଛି । ଫଳରେ ଯାତାୟାତରେ ବାଧା ଉପୁଜିବା ସହ ଆଗାମୀ ଦିନରେ ଶୀତ ଯୋଗୁଁ ଆହୁରି ବାଧା ଉପୁଜିବ ବୋଲି କୁହାଯାଉଛି ।

ଏକ ଅନୁସନ୍ଧାନ ଅନୁଯାୟୀ, ୨୦୧୬ ରୁ ୨୦୧୯ ମସିହା ମଧ୍ୟରେ ମାତ୍ର ୪ ଦିନ ସୁସ୍ଥ ଜଳବାୟୁ ଥିବାବେଳେ ୩୬୬ ଦିନ ସର୍ବାଧିକ ପ୍ରଦୂଷିତ ହୋଇଥିବା ଜଣା ପଡିଛି । ପ୍ରଦୂଷଣ ହେତୁ ଲୋକମାନେ ନିଶ୍ୱାସ ପ୍ରଶ୍ୱାସ ନେବାରେ ଅସୁବିଧାର ସମ୍ମୁଖୀନ ହେଉଛନ୍ତି । ଯେଉଁଥିପାଇଁ ସ୍ୱାସ୍ଥ୍ୟବସ୍ଥା ମଧ୍ୟ ବିଗିଡିବାରେ ଲାଗିଛି । ପ୍ରଦୂଷଣ ଯୋଗୁଁ କରୋନା ସଂକ୍ରମଣ ବଢିବାର ମଧ୍ୟ ସମ୍ଭାବନା ଅଧିକ ରହିଛି ।

ସ୍ୱାସ୍ଥ୍ୟ ମନ୍ତ୍ରଣାଳୟ ପକ୍ଷରୁ ସୂଚନା ଦିଆଯାଇଛି ଯେ, ପ୍ରଦୂଷଣ ଯୋଗୁଁ ଭାରତରେ ୧୨.୫ ପ୍ରତିଶତ ଲୋକ ମୃତ୍ୟୁବରଣ କରନ୍ତି । ଏହା ବ୍ୟତୀତ ବିଶ୍ୱର ୩୦ଟି ପ୍ରଦୂଷିତ ସହର ତାଲିକା ମଧ୍ୟରେ ଭାରତର ୨୧ ଟି ସହର ରହିଛି । ଦିଲ୍ଲୀରେ ଏୟାର କ୍ୱାଲିଟି ଖରାପ ହୋଇଥିବାରୁ ଜୀବନ ପ୍ରତି ବିପଦ ବଢିବାରେ ଲାଗିଛି । ସେଥିପାଇଁ ପ୍ରତିବର୍ଷ ୧୦,୦୦୦ ରୁ ୩୦,୦୦୦ ଲୋକଙ୍କର ମୃତ୍ୟୁ ହେଉଛି । ଏକ ରିସର୍ଚ୍ଚ ଅନୁସାରେ ପ୍ରଦୂଷଣ ସମସ୍ୟାର ସମ୍ମୁଖୀନ ହେଉଥିବା ଉତ୍ତର ଭାରତର ଅଞ୍ଚଳରେ ମହାମାରୀର ସଂଖ୍ୟା ଏବଂ ମୃତ୍ୟୁ ହାରକୁ ନେଇ ଚିନ୍ତା ବଢିଛି ।