ଦୁଇ ବର୍ଷର ପୁଅକୁ ବାଲକୋନିରୁ ଫିଙ୍ଗିଦେଲା ବାପା

ନୂଆଦିଲ୍ଲୀ: ଦାମ୍ପତ୍ୟ କଳିରୁ ଅଘଟଣ । ଦିଲ୍ଲୀରେ ସ୍ୱାମୀ-ସ୍ତ୍ରୀ ଝଗଡ଼ା ପରେ ଉତ୍ତ୍ୟକ୍ତ ମଦ୍ୟପ ସ୍ୱାମୀ ଦୁଇ ବର୍ଷର ପୁଅକୁ ବାଲକୋନିରୁ ଫିଙ୍ଗିଦେଲା । ତିନି ମହଲା କୋଠାରୁ ଫିଙ୍ଗି ଦେଇ ନିଜେ ମଧ୍ୟ ତଳକୁ ଡେଇଁପଡ଼ିଥିଲା ସ୍ବାମୀ । ଫଳରେ ଗୁରୁତର ଆହତ ହୋଇ ବାପା ଓ ପୁଅ ଏବେ ଏମ୍ସରେ ଭର୍ତ୍ତି ହୋଇଛନ୍ତି । ଦିଲ୍ଲୀ କାଲକାଜୀରେ ଗତରାତିରେ ଏହି ଅଘଟଣ ଘଟିଛି ।

ସ୍ୱାମୀ ମନ ସିଂ ଓ ସ୍ତ୍ରୀ ପୂଜା ଘରୋଇ କଳିରୁ ଅଲଗା ଅଲଗା ରହୁଛନ୍ତି । ପୂଜା ତାଙ୍କ ଦୁଇ ପିଲାଙ୍କୁ ଧରି ଜେଜେମାଆଙ୍କ ପାଖରେ ରହୁଛନ୍ତି । ଗତକାଲି ରାତିରେ ମନ ସିଂ ପୂଜାଙ୍କ ଘରକୁ ଆସିଥିଲେ । ସେଠାରେ କୌଣସି କାରଣରୁ ଉଭୟଙ୍କ ମଧ୍ୟରେ ବଚସା ହୋଇଥିଲା । ତା’ପରେ ଉତ୍ତ୍ୟକ୍ତ ମନ ସିଂ ଦୁଇ ବର୍ଷର ପୁଅକୁ ୨୧ ଫୁଟ ତଳକୁ ଫିଙ୍ଗି ଦେଇ ନିଜେ ଡେଇଁ ପଡ଼ିଥିଲେ । ମଦ ପିଇ ମନ ସିଂ ଘରକୁ ଆସି ପୂଜାଙ୍କ ସହ ଝଗଡ଼ା କରିଥିବା କହିଛନ୍ତି ପୂଜାଙ୍କ ଜେଜେମାଆ । ଏନେଇ ଏକ ହତ୍ୟା ଉଦ୍ୟମ ମାମଲା ରୁଜୁ ହୋଇଛି ବୋଲି ପୋଲିସ କହିଛି ।