ଦିଲ୍ଲୀ ବିସ୍ଫୋରଣ ପଛରେ ଇରାନ୍ ହାତ, ଲଫାପାରେ ଲେଖା ଅଛି ‘ଇଏ ତ ବାସ୍ ଟ୍ରେଲର’
ନୂଆଦିଲ୍ଲୀ: ଶୁକ୍ରବାର ଦିଲ୍ଲୀ ଇସ୍ରାଏଲ୍ ଦୂତାବାସ ନିକଟରେ ହୋଇଥିବା ବିସ୍ଫୋରଣ ପଛରେ ଇରାନର ହାତ ଥିବା ସନ୍ଦେହ କରାଯାଉଛି । ବିସ୍ଫୋରଣ ସ୍ଥଳରୁ ମିଳିଥିବା ଲଫାପାରେ ଏହା ତ କେବଳ ଟ୍ରେଲର ବୋଲି ଲେଖା ଯାଇଥିବା ସୂତ୍ରରୁ ଜଣାପଡ଼ିଛି । ଲଫାପାରେ ଇରାନର କାସିମ ସୁଲେମାନି ଏବଂ ଇରାନର ବରିଷ୍ଠ ଆଣବିକ ବୈଜ୍ଞାନିକ ମୋହସେନ ଫଖ୍ରିଜାଦେହଙ୍କ କଥା ଉଲ୍ଲେଖ ଅଛି । ଉଭୟଙ୍କ ମୃତ୍ୟୁ ଗତବର୍ଷ ହୋଇଥିଲା ।
୨୦୨୦ ଜାନୁଆରୀ ୩ରେ ତତ୍କାଳୀନ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ନିର୍ଦ୍ଦେଶରେ ଏୟାରଷ୍ଟ୍ରାଇକ୍ ହୋଇଥିଲା । ବାଗଦାଦ ନିକଟରେ ଆମେରିକା ସେନାର ଏୟାଇଷ୍ଟ୍ରାଇକରେ ନିହତ ହୋଇଥିଲା ସୋଲେମାନି । କାସିମ ସୁଲେମାନି ଇରାନ ମିଲିଟାରୀରର ଶକ୍ତିଶାଳୀ କମାଣ୍ଡର ଥିଲା ।
ସେହିଭଳି ୨୦୨୦ ନଭେମ୍ବର ୨୭ରେ ଇରାନର ବରିଷ୍ଠ ଆଣବିକ ବୈଜ୍ଞାନିକ ମୋହସେନ ଫଖ୍ରିଜାଦେହଙ୍କୁ ହତ୍ୟା କରାଯାଇଥିଲା । ତେହରାନରେ ସାଟେଲାଇଟ୍ ପରିଚାଳିତ ମେସିନ ଗନ୍ ଦ୍ୱାରା ତାଙ୍କୁ ହତ୍ୟା କରାଯାଇଥିଲା । ଏଥିପାଇଁ ଇସ୍ରାଏଲକୁ ଦାୟୀ କରିଥିଲା ଇରାନ୍ ।
ଯଦିଓ ଶୁକ୍ରବାର ଦିଲ୍ଲୀର ଇସ୍ରାଏଲ୍ ଦୂତାବାସ ଘଟଣାରେ ବିଶେଷ ବଡ଼ଧରଣର କ୍ଷତି ହୋଇନାହିଁ । ତଥାପି ଏହାକୁ ଗୁରୁତ୍ୱର ସହ ନେଇଛନ୍ତି କେନ୍ଦ୍ର ସରକାର । ଏହା ପୂର୍ବରୁ ୨୦୧୨ରେ ଇସ୍ରାଏଲର ଏକ କାରରେ ବିସ୍ଫୋରଣ ହୋଇଥିଲା । ଯେଉଁଥିରେ ୨ ଇରାନ୍ ନାଗରିକ ସାମିଲ୍ ଥିଲେ । ୨ ଆକ୍ରମଣକାରୀ ଦିଲ୍ଲୀର ପାହଡ଼ଗଞ୍ଜ ହୋଟେଲରେ ରହି ବିସ୍ଫୋରଣ କରିବା ପରେ ଇରାନ୍ ଖସି ପଳାଇଥିଲେ । ଏବେ ଯାଏ ତଦନ୍ତକାରୀ ସଂସ୍ଥା ଉଭୟଙ୍କୁ ଖୋଜୁଛି ।
ଶୁକ୍ରବାର ହୋଇଥିବା ବିସ୍ଫୋରଣକୁ ଆତଙ୍କବାଦୀଙ୍କ ଆକ୍ରମଣ ବୋଲି କହିଛି ଇସ୍ରାଏଲ୍ । ସୂତ୍ର ଅନୁସାରେ, ବିସ୍ଫୋରଣ ସ୍ଥଳରୁ ମିଳିଥିବା ଲଫାପାର ଟଚ୍ ଡିଏନଏ କରାଯିବ । ମିଳିଥିବା ସୂଚନା ଅନୁସାରେ, ବୋମାରେ ଅମୋନିୟମ ନାଇଟ୍ରେଟର ବ୍ୟବହାର କରାଯାଇଥିଲା । ଏଥିରେ ଛୋଟ ଛୋଟ ବଲ୍ ବେୟରିଙ୍ଗ ସହ ସଫ୍ଟ ଡ୍ରିଙ୍କ କେନର ବ୍ୟବହାର ହୋଇଛି ।
