ଆତ୍ମହତ୍ୟା କରିବା ପାଇଁ ଧମକ ଦେଲେ କୃଷି ନେତା ରାକେଶ ଟିକାୟତ

ନୂଆଦିଲ୍ଲୀ: ଦିଲ୍ଲୀରେ କୃଷକଙ୍କ ଟ୍ରାକ୍ଟର ପରେଡ୍ ସମୟରେ ଘଟିଥିବା ହିଂସାକୁ ନେଇ ଚାରିଆଡେ ହଇଚଇ ସୃଷ୍ଟି ହୋଇଛି । ଏପରିକି ଗାଜିପୁର ବର୍ଡରରେ ବହୁ ପୋଲିସ କର୍ମୀଙ୍କୁ ମୁତୟନ କରାଯାଇଥିବା ବେଳେ ଧାରଣାସ୍ଥଳରୁ ହଟିବା ଲାଗି ଉତ୍ତରପ୍ରଦେଶ ସରକାର କୃଷକ ମାନଙ୍କୁ ନିର୍ଦ୍ଦେଶ ଦେଇଛନ୍ତି ।

ଉତ୍ତର ପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥଙ୍କ ନିର୍ଦ୍ଦେଶ କ୍ରମେ ଏଭଳି ନିଷ୍ପତ୍ତି ନେଇଛି ଗାଜିପୁର ପ୍ରଶାସନ।  ଏଭଳି ସମୟରେ ଚାଷୀ ନେତା ରାକେଶ ଟିକାୟତ ଆତ୍ମହତ୍ୟା କରିବା ଲାଗି ଧମକ ଦେଇଛନ୍ତି । ସେ କାନ୍ଦି କାନ୍ଦି କହିଛନ୍ତି ଯେ ‘‘ଯଦି ୩ ନୂଆ କୃଷି ବିଲକୁ ପ୍ରତ୍ୟାହାର କରାନଯାଏ ତାହେଲେ ଆତ୍ମହତ୍ୟା କରିବି। ଯଦି ମୋତେ କିଛିବି ହୁଏ ତାହେଲେ ପ୍ରଶାସନ ଦାୟୀ ରହିବ । ମୁଁ କୃଷକଙ୍କ ଜୀବନକୁ ବର୍ବାଦ ହେବାକୁ ଦେବିନି । ଚାଷୀ ମାନଙ୍କୁ ଜାଣିଶୁଣି ମାରିବାକୁ ଷଡଯନ୍ତ୍ର କରାଯାଉଛି’’।

ଖାଲି ଏତିକି ନୁହେଁ ବିଜେପି ଉପରେ ଆରୋପ ଲଗାଇ ଏହି ଚାଷୀ ନେତା ଜଣକ କହିଛନ୍ତି ଯେ ପୋଲିସ ସହ ବିଜେପି ବିଧାୟକ ମାନେ ସାମିଲ ହୋଇଛନ୍ତି । ଏବେ ସେମାନଙ୍କ ଗୁଣ୍ଡାଗର୍ଦ୍ଦି ଚଳିବ ନାହିଁ ।

ତେବେ ଏନେଇ ଗାଜିପୁର ବର୍ଡରରେ ମୁତୟନ ଥିବା ପ୍ରିତ ବିହାରର ଏସପି ବିରେନ୍ଦ୍ର ପୁଞ୍ଜ କହିଛନ୍ତି ଯେ କୃଷକ ମାନଙ୍କୁ ଆପଣା ଛାଏଁ ଧାରଣା ସ୍ଥଳ ଛାଡିଦେବା ଉଚିତ୍ । ଆମେ ପୂର୍ବରୁ ଶାନ୍ତି ପାଇଁ ଅପିଲ୍ କରିଥିଲୁ । ଆଉ ଏବେ ବି କରୁଛୁ ।

ଅଧିକ ପଢନ୍ତୁ- କୃଷକ ଆନ୍ଦୋଳନ; ଗାଜିପୁର ସୀମାରୁ ଚାଷୀଙ୍କୁ ହଟାଇବା ପାଇଁ ନିର୍ଦ୍ଦେଶ

ସେପଟେ ହିଂସା ଘଟଣାକୁ ନେଇ ପ୍ରଶାସନକୁ ସମାଲୋଚନା କରିଛନ୍ତି ଚାଷୀ ନେତା। ଲାଲକିଲ୍ଲାରେ ଯେଉଁ ଘଟଣା ଘଟିଲା ତାହାର ଯାଞ୍ଚ କରନ୍ତୁ ସୁପ୍ରିମକୋର୍ଟ । ଏଥିରେ ସଂପୃକ୍ତ ବ୍ୟକ୍ତିଙ୍କ ଦୁଇ ମାସର କଲ୍ ଡିଟେଲ୍ସ ଯାଞ୍ଚ କରାଯାଉ । ହିଂସା ନୁହେଁ ଅହିଂସା ମାର୍ଗ ଥିଲା ଚାଷୀଙ୍କ ଲକ୍ଷ୍ୟ ।