ଜେଲରୁ ମୁକୁଳିଲେ କେଜରିୱାଲ, ସ୍ଵାଗତ କରିବାକୁ ଶହ ଶହ ସମର୍ଥକଙ୍କ ଭିଡ଼

ନୂଆଦିଲ୍ଲୀ: ଜେଲରୁ ମୁକୁଳିଲେ କେଜରିୱାଲ। ପ୍ରାୟ ୬ ମାସ ପରେ ଜେଲରୁ ବାହାରିଲେ ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜରିୱାଲ। ଦିଲ୍ଲୀ ମଦ ନୀତି ମାମଲାରେ ଦିଲ୍ଲୀର ତିହାର ଜେଲରୁ ବାହାରିଲେ ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜରିୱାଲ। ସକାଳେ ଜାମିନ ମଞ୍ଜୁର କରିଥିଲେ ସୁପ୍ରିମକୋର୍ଟ। ଜେଲରୁ ମୁକୁଳିବା ପରେ ତିହାର ଜେଲ ବାହାରେ ଶତାଧିକ ସଂଖ୍ୟାରେ କର୍ମୀ ଓ ସମର୍ଥକ ନିଜର ନେତା ଅରବିନ୍ଦ କେଜରିୱାଲଙ୍କୁ ସ୍ଵାଗତ କରିଥିଲେ। ଜେଲରୁ ବାହାରିବା ପରେ କର୍ମୀ ଓ ସମର୍ଥକଙ୍କୁ ସମ୍ବୋଧିତ କରିଛନ୍ତି ମୁଖ୍ୟମନ୍ତ୍ରୀ ଅରବିନ୍ଦ କେଜରିୱାଲ। କହିଛନ୍ତି ମୋ ଜୀବନ ଦେଶବାସୀଙ୍କ ପାଇଁ ସମର୍ପିତ। ମୋର ରକ୍ତର ପ୍ରତ୍ୟେକ କଣ ଦେଶବାସୀଙ୍କ ଲାଗି ଉତ୍ସର୍ଗୀକୃତ। ଏ ଲଢେଇ ସବୁବେଳେ ଜାରି ରହିବ। ମୁକୁଳିବା ପରେ ମୋର ମନୋବଳ ଆହୁରି ଶହେ ଗୁଣା ବୃଦ୍ଧି ପାଇଛି ବୋଲି କହିଛନ୍ତି କେଜରିୱାଲ। ଜେଲରୁ ବାହାରିଥିବାରୁ ଭଗବାନଙ୍କୁ ସେ ଧନ୍ୟବାଦ ଦେଇଛନ୍ତି। କେଜରିୱାଲ ଜେଲରୁ ବାହାରିବା ପରେ ବାଜା, ବାଣ ନାଚଗୀତରେ କମ୍ପୁଛି ପରିସର। ଅର୍ଥ ହେରଫେର ମାମଲାରେ ଗିରଫ କରିଥିଲା ସିବିଆଇ।
ପୂର୍ବରୁ ଦିଲ୍ଲୀ ମଦ ନୀତି ନେଇ ଇଡିର ମାମଲାରେ ଜାମିନ ପ୍ରଦାନ କରିଥିଲେ ସୁପ୍ରିମକୋର୍ଟ। ଗତ ମାର୍ଚ୍ଚ ୨୧ରେ ଗିରଫ ହୋଇଥିଲେ ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜରିୱାଲ। ଜୁନ ୨୫ରେ କେଜ୍ରିୱାଲଙ୍କୁ ଗିରଫ କରିଥିଲା ସିବିଆଇ। ଦିଲ୍ଲୀ ମଦନୀତି ମାମଲାରେ ଗତବର୍ଷ ଫେବୃଆରୀ ୨୬ରେ ଗିରଫ ହୋଇଥିବା ମନୀଷ ସିସୋଦିଆଙ୍କୁ ଗତ ଅଗଷ୍ଟ ୯ରେ ଜାମିନ ଦେଇଥିଲେ ସୁପ୍ରିମକୋର୍ଟ। ଗତବର୍ଷ ଅକ୍ଟୋବର ୪ରେ ଗିରଫ ସଞ୍ଜୟ ସିଂଙ୍କୁ ଏପ୍ରିଲ ୩ରେ ମିଳିଥିଲା ଜାମିନ। ସେହିପରି ଗତ ମାର୍ଚ୍ଚ ୧୫ରେ ଗିରଫ ବିଆରଏସ ନେତ୍ରୀ କେ. କବିତାଙ୍କୁ ଗତ ଅଗଷ୍ଟ ୨୭ରେ ସୁପ୍ରିମକୋର୍ଟ ଦେଇଥିଲେ ଜାମିନ।