ଅଖିଳେଶ- କେଜ୍ରିଓ୍ବାଲଙ୍କ ପ୍ରସ୍ତୁତ କରିଛନ୍ତି କି ନୂଆ ରାଜନୈତିକ ସମୀକରଣ ? ଦିଲ୍ଲୀ ନିର୍ବାଚନ ପୂର୍ବରୁ ବଢ଼ିଲା ଚର୍ଚ୍ଚା

ନନ୍ଦିଘୋଷ ବ୍ୟୁରୋ: ଘୋଷଣା ହୋଇନି ଦିଲ୍ଲୀ ନିର୍ବାଚନ ତାରିଖ କିନ୍ତୁ ଆଗୁଆ ନିଜର ରଣନୀତି ପ୍ରସ୍ତୁତ କରିଛି ଆପ । ତାରିଖ ଘୋଷଣା ହେବା ପ୍ରାର୍ଥୀ ତାଲିକା ଘୋଷଣା କରି ସରପ୍ରାଇଜ କାର୍ଡ ଖେଳିବାକୁ ଯୋଜନା କରିଛି ଆପ୍ । ତେବେ ଦିଲ୍ଲୀରେ ଇଣ୍ଡିମେଣ୍ଟ ବଦଳରେ ଏକାକି ନିର୍ବାଚନ ଲଢ଼ିବା ପାଇଁ ଦଳ ଫୁଲ ଦମରେ ରହିଛି । କଂଗ୍ରେସ ସହ ମିଶିବା ପରିବର୍ତ୍ତେ ଏକାକି ପ୍ରାର୍ଥୀ ଘୋଷଣା କରିଛି ଆମ ଆଦମୀ ପାର୍ଟି । ସେପଟେ ଏବେ ଆପକୁ ସମର୍ଥନ ପାଇଁ ବାହାରିଛନ୍ତି ସମାଜବାଦୀ ନେତା ଅଖିଳେଶ ଯାଦବ । ଯାହାକୁ ନେଇ ରାଜନୈତିକ ମହଲରେ ଏକ ନୂଆ ଚର୍ଚ୍ଚା ଦେଖିବାକୁ ମିଳିଛି । ଦିଲ୍ଲୀର ୭୦ ଆସନରେ ଆପ ନିଜର ପ୍ରାର୍ଥୀ ତାଲିକା ଘୋଷଣା କରିଥିବାବେଳେ ସୋମବାର ଥାୟାରାଜ ଷ୍ଟାଡିୟମରେ ଏକ କାର୍ଯ୍ୟକ୍ରମର ଆୟୋଜନ କରିଥିଲା । ଯେଉଁଥିରେ ଅଖିଳେଶ ଯାଦବ ଯୋଗ ଦେଇଥିଲେ । ଯେଉଁଥିରୁ ରାଜନୈତିକ ମହଲରେ ଚର୍ଚ୍ଚା ହେଉଛି କି ଏକ ନୂଆ ଯୋଜନାରେ ପ୍ରସ୍ତୁତ ରହିଛନ୍ତି ଅଖିଳେଶ- କେଜ୍ରିଓ୍ବାଲ ।

ଆପ କଂଗ୍ରେସ ସହ ମେଣ୍ଟକୁ ସିଧାସଳଖ ମନା କରିଥିବାବେଳେ ଏବେ ଇଣ୍ଡିମେଣ୍ଟର ପ୍ରମୁଖ ନେତା ଅଖିଳେଶ ଯାଦବ କଂଗ୍ରେସ ବଦଳରେ ଆପର ସମର୍ଥନ ପାଇଁ ଆଗେଇ ଆସିଛନ୍ତି । ୨୦୨୪ ନିର୍ବାଚନରେ ଫଳାଫଳ ଆସିବା ପରେ ଇଣ୍ଡି ମେଣ୍ଟଠାରୁ ସମଦୂରତା ରକ୍ଷା କରୁଛନ୍ତି କେଜ୍ରିଓ୍ବାଲ । ଅନ୍ୟପଟେ ଅଖିଳେଶ ଯାଦବ ମଧ୍ୟ ଏବେ ଧିରେ ଧିରେ ଦୂରେଇ ଯାଉଥିବା ମଧ୍ୟ ଚର୍ଚ୍ଚା ଆରମ୍ଭ ହୋଇଛି । କୁହାଯାଉଛି କି, ଇଣ୍ଡି ମେଣ୍ଟର ନେତୃତ୍ବ ମମତା ବାନାର୍ଜୀ ଦେବାକୁ ପ୍ରୟାସ ହେଉଛି । ଆଉ କଂଗ୍ରେସ ପାଇଁ ଇଣ୍ଡି ମେଣ୍ଟର ଆସନ ମଧ୍ୟ କମୁଥିବା କିଛି ନେତା ନିଜର ପ୍ରତିକ୍ରିୟାରେ କହି ସାରିଛନ୍ତି । କାରଣ ରାହୁଲଙ୍କ ନେତୃତ୍ବକୁ ନେଇ ଛୋଟ ଏବଂ ବଡ଼ ଦଳମାନେ ମଧ୍ୟ ପ୍ରଶ୍ନ ଉଠାଇଛନ୍ତି । ଦୁଇଟି ନିର୍ବାଚନ ସମୟରେ କଂଗ୍ରେସ ଦିଲ୍ଲୀରେ ଖାତା ଖୋଲିନାହିଁ । ଆଉ ଏବେ ଏଭଳି ସ୍ଥିତିରେ ରାଜଧାନୀରେ କଂଗ୍ରେସର ସ୍ଥିତି କଣ ହେବ ତାକୁ ନେଇ ସାଧାରଣରେ ଉଠିଛି ପ୍ରଶ୍ନ ।