ନନ୍ଦିଘୋେଷ ବ୍ୟୁରୋ: ଦିଲ୍ଲୀବାସୀ ମାନିଲେନି। କଟକଣା ସତ୍ତ୍ଵେ ଗତକାଲି ମନଇଚ୍ଛା ବାଣ ଫୁଟାଇଲେ। ତାର ପରିଣାମ ଆଜି ଦେଖିବାକୁ ମିଳିଛି। ଆଜି ସକାଳୁ ଦିଲ୍ଲୀରେ ବାୟୁର ମାନ ଅତି ଖରାପ ସ୍ତରକୁ ଖସିଛି। ଭୟଙ୍କର ପ୍ରଦୂଷଣ। ବାୟୁର ମାନ ମନିଟରିଂ କରୁଥିବା ୪୦ଟି ସ୍ଥାନ ମଧ୍ୟରୁ ଅଧିକ ଜାଗାରେ ବାୟୁ ଅତି ଖରାପ ବୋଲି କୁହାଯାଇଛି। ଏପରି ସ୍ଥିତି ଯେ, ଆଜି ସକାଳୁ ଦିଲ୍ଲୀ ପ୍ରବଳ ଧୂଆଁର ଆସ୍ତରଣ ଭିତରେ ରହିଥିଲା। ସକାଳେ ଦିଲ୍ଲୀରେ ଏୟାର କ୍ଵାଲିଟି ଇନଡେକ୍ସ ଥିଲା ୩୬୦ । ଏହାକୁ ଅତି ଖରାପ ବୋଲି କୁହାଯାଇଥାଏ।
ଏପରିକି ଆନନ୍ଦ ବିହାର ଓ ଆରକେ ପୁରମ ଅଞ୍ଚଳରେ ସ୍ଥିତି ଆହୁରି ସାଂଘାତିକ। ଏଠାରେ AIQ ରହିଛି ୩୯୫। ସୋନିଆ ବିହାର, ପଂଜାବୀ ବାଗ, ନର୍ଥ କ୍ୟାମ୍ପସ, ବାୱାନା, ଜାହାଙ୍ଗିରପୁରୀ, ରୋହିନୀ, ଅଶୋକ ନଗର, ନେହରୁ ନଗର ଅଞ୍ଚଳରେ ବି ୩୮୦ରୁ ଅଧିକ ରହିଛି। ଏପରି ବାୟୁ ପ୍ରଦୂଷଣ ମଣିଷର ସ୍ଵାସ୍ଥ୍ୟ ପକ୍ଷେ ବହୁତ କ୍ଷତିକାରକ। ଯଦି କାହାର ଶ୍ଵାସଗତ କିମ୍ଵା ଛାତି ରୋଗ ଅଛି, ତା ପାଇଁ ଆହୁରି ସଂଗୀନ। ଶୀତ ଦିନେ ଦିଲ୍ଲୀରେ ବାୟୁ ପ୍ରଦୂଷଣ ହୋଇଥାଏ। ପଂଜାବ ଓ ହରିୟାଣାରେ ଏହି ସମୟରେ ନଡ଼ା ପୋଡ଼ି ଯୋଗୁଁ ଦିଲ୍ଲୀରେ ବାୟୁ ପ୍ରଦୂଷଣ ଆହୁରି ବଢ଼ିଥାଏ।
