NCB ସମନ ଜାରି ପରେ ଦୀପିକାଙ୍କ ମ୍ୟାନେଜର କରିସ୍ମା ଗାଏବ

ମୁମ୍ୱାଇ: ବଲିଉଡ ଅଭିନେତ୍ରୀ ଦୀପିକା ପାଦୁକୋନଙ୍କ ମ୍ୟାନେଜର କରିସ୍ମା ପ୍ରକାଶଙ୍କୁ ନରକୋଟିକ୍ସ କଣ୍ଟ୍ରୋଲ ବ୍ୟୁରୋ (ଏନସିବି) ପଚରାଉଚରା ପାଇଁ ସମନ ଜାରି କରିଥିଲା । ଏନସିବି ସମନ ଜାରି କରିବା ପରେ କରିସ୍ମାଙ୍କର କୌଣସି ପତା ମିଳୁନାହିଁ । ଏନସିବି ଅଧିକାରୀମାନେ ସୋମବାର ଏହି ସୂଚନା ଦେଇଛନ୍ତି । ଉଲ୍ଲେଖନୀୟ ଯୋଗ୍ୟ ଯେ, ଅଭିନେତା ସୁଶାନ୍ତ ସିଂ ରାଜପୁତଙ୍କ ମୃତ୍ୟୁ ମାମଲାରେ ଏନସିବି ଡ୍ରଗ୍ ଆଙ୍ଗେଲର ଅନୁସନ୍ଧାନ କରୁଛି ।

ଅନୁସନ୍ଧାନ ଜଡିତ ଜଣେ ଏନସିବି ଅଧିକାରୀ କହିଛନ୍ତି ଯେ, ତାଙ୍କୁ ଅକ୍ଟୋବର ମାସ ୨୭ ତାରିଖରେ ଏନସିବିରେ ହାଜର ହେବାକୁ କୁହାଯାଇଥିଲା। ତାଙ୍କୁ ଏବେ ଟ୍ରେସ କରିବାରେ ଅଧିକାରୀମାନେ ଅସଫଳ ହୋଇଛନ୍ତି । ଏଯାଏଁ ଏହା ନିଶ୍ଚିତ ହୋଇନାହିଁ ଯେ, କ୍ୱାନ ଟ୍ୟାଲେଣ୍ଟ ମ୍ୟାନେଜମେଣ୍ଟର କର୍ମଚାରୀଙ୍କୁ ମଧ୍ୟ ପଚରାଉଚରା ପାଇଁ ଡକାଯାଇଛି।

ଗତ ମାସରେ, ଏନସିବି ଦୀପିକାଙ୍କ ଘରୁ ୧.୭ ଗ୍ରାମ ଚରସ ଏବଂ କିଛି ବୋତଲ CBD ତେଲ ଜବତ କରିଥିଲା । ଏହା ପରେ ତାଙ୍କୁ ସମନ ଜାରି କରିଥିଲା। ଏହାପୂର୍ବରୁ ଦୀପିକା ଏବଂ କରିସ୍ମା ପ୍ରକାଶ ଥରେ ଏନସିବି ସମ୍ମୁଖରେ ହାଜର ମଧ୍ୟ ହୋଇଥିଲେ। କରିସ୍ମା ପ୍ରକାଶଙ୍କୁ ଏଜେନ୍ସି ପଚରାଉଚରା ପାଇଁ ପୁଣି ଡାକିଥିଲା । ହେଲେ ସେବେଠୁ ସେ ଗାଏବ ଅଛନ୍ତି । ଦୀପିକାଙ୍କ ବ୍ୟତୀତ ଏନସିବି ବଲିଉଡ ଅଭିନେତ୍ରୀ ଶ୍ରଦ୍ଧା କପୁର ଏବଂ ସାରା ଅଲି ଖାନଙ୍କୁ ମଧ୍ୟ ପଚରାଉଚୁରା କରିଛି। ଏନସିବି ଏହି ତିନୋଟି ଅଭିନେତ୍ରୀଙ୍କ ଫୋନ୍ ଜବତ କରି ଫୋରେନସିକ୍ ବିଭାଗକୁ ଯାଞ୍ଚ ପାଇଁ ପଠାଇଛି।