ବୟସର ଅପରାହ୍ନରେ ନେଇଛନ୍ତି ସ୍ୱାମୀଙ୍କ ସ୍ୱପ୍ନକୁ ପୁରା କରିବାର ପଣ
ଝାରସୁଗୁଡ଼ା: ଦେହରେ ବହୁଛି ଦେଶ ପ୍ରେମର ରକ୍ତ। ନାରୀ ଶିକ୍ଷାର ପ୍ରସାର ପାଇଁ ଉତ୍ସର୍ଗୀକୃତ। ମହିଳାଙ୍କୁ ମୁଖ୍ୟସ୍ରୋତରେ ସାମିଲ କରିବା ତାଙ୍କର ମୂଳ ଲକ୍ଷ୍ୟ। ଝାରସୁଗୁଡ଼ା ଜିଲ୍ଲା ତିଲିଆ ପଞ୍ଚାୟତ ଫଟାପାଲି ଗାଁର ପ୍ରଫୁଲ୍ଲ ଗୁପ୍ତା। ସଂଗ୍ରାମୀ ସ୍ୱାମୀଙ୍କ ଦେହାନ୍ତ ପରେ, ଅଧୁରା ସ୍ୱପ୍ନକୁ ପୂରଣ କରିବାକୁ ଆଗେଇ ଆସିଥିଲେ ସେ। ଲକ୍ଷ୍ୟଥିଲା ନାରୀ ଶିକ୍ଷାର ପ୍ରଚାର ଓ ପ୍ରସାର। ମହିଳାଙ୍କୁ ଉଚ୍ଚଶିକ୍ଷିତ କରିବାକୁ ଗଢିଥିଲେ ବାଳିକା ଉଚ୍ଚ ବିଦ୍ୟାଳୟ। ଆଉ ମାଗଣାରେ ଛାତ୍ରୀଙ୍କୁ ଦେଉଥିଲେ ଶିକ୍ଷା। ମାତ୍ର ପ୍ରଫୁଲ୍ଲ ଗୁପ୍ତା ଶଯ୍ୟାଶୟୀ ହେବା ପରେ ଏବେ ଏହି ବିଦ୍ୟାଳୟ ଅନିଶ୍ଚିତତା ଭିତରେ ରହିଛି।
୨୦୦୦ ମସିହାରୁ ତିଆରି ହୋଇଥିବା ଅର୍ଜନ ଗୁପ୍ତା ବାଳିକା ଉଚ୍ଚ ବିଦ୍ୟାଳୟ ସଫଳତାର ଶୀର୍ଷରେ ପହଁଚିଛି। ମାତ୍ର ଏହି ସ୍କୁଲଟି ସରକାରୀ ଅନୁଦାନ ପାଇ ନଥିବାରୁ ଛାତ୍ରୀମାନେ ବିଭିନ୍ନ ସୁବିଧାରୁ ବଂଚିତ ହେଉଛନ୍ତି। ସେପଟେ ଜିଲ୍ଲା ଶିକ୍ଷାଧିକାରୀ କହିଛନ୍ତି, ସ୍କୁଲର ଉପସ୍ଥାନ ଉତ୍ତମ ରହିଛି, ଗ୍ରାଣ୍ଡ୍ ପାଇଁ ସମସ୍ତ ରିପୋର୍ଟ ସରକାରଙ୍କ ନିକଟକୁ ପଠାଇ ଦିଆଯାଇଛି।
ସ୍କୁଲରେ ଭଲ ପାଠ ପଢାଯାଉଥିବାରୁ ସମସ୍ତ ଛାତ୍ରୀ ୯୦ ପ୍ରତିଶତ ଉପରେ ମାର୍କ ରଖୁଛନ୍ତି। ତେବେ ଏହି ବିଦ୍ୟାଳୟକୁ ସରକାରୀ ଅନୁଦାନ ପାଇଁ ଦାବି କରିଛନ୍ତି ଗ୍ରାମବାସୀ।
