ଗୋଲାମୁଣ୍ଡାରୁ ହାତୀ ଛୁଆର ମୃତଦେହ ଉଦ୍ଧାର
ବାରିପଦା: ମୟୂରଭଞ୍ଜ ଜିଲ୍ଲାରୁ ଏକ ମାଇ ହାତୀ ଛୁଆର ମୃତଦେହ ଉଦ୍ଧାର କରାଯାଇଛି । ମୃତ ହାତୀ ଛୁଆର ବୟସ ଦୁଇ ବର୍ଷ ହେବ ବୋଲି ଅନୁମାନ କରାଯାଉଛି । ବାଙ୍ଗିରିପୋଷି ରେଞ୍ଜ ଅଧୀନସ୍ଥ ଗୋଲାମୁଣ୍ଡା ନିକଟରେ ଛୁଆ ହାତୀର ମୃତଦେହ ଠାବ କରାଯାଇଛି ।
ତେବେ କେମିତି ହାତୀ ଛୁଆର ମୃତ୍ୟୁ ଘଟିଲା ଜଣାପଡିନାହିଁ । ମୃତଦେହ ଜବତ କରିବା ପରେ ବନ ବିଭାଗ ପକ୍ଷରୁ ବ୍ୟବଚ୍ଛେଦ ବ୍ୟବସ୍ଥା କରାଯାଉଛି । ବ୍ୟବଚ୍ଛେଦ ରିପୋର୍ଟ ଆସିବା ପରେ ମୃତ୍ୟୁର କାରଣ ଜଣାପଡିବ ।
ସୂଚନାଯୋଗ୍ୟ, କିଛିଦିନ ହେଲା ଶିମିଳିପାଳ ଅଭୟାରଣ୍ୟର ପାଦଦେଶର ବାଙ୍ଗିରିପୋଷି ରେଞ୍ଜ ଅଞ୍ଚଳରେ ଏକ ହାତୀ ପଲ ବୁଲାବୁଲି କରୁଥିଲେ । ଏହି ମୃତ ଛୁଆଟି ଉକ୍ତ ହାତୀ ପଲର ହୋଇଥାଇ ପାରେ ବୋଲି ଅନୁମାନ କରାଯାଉଛି ।
