ମେକ୍ ଇନ୍ ଇଣ୍ଡିଆ ଆପ୍ ଚ୍ୟାଲେଞ୍ଜ ଆରମ୍ଭ କଲେ ସରକାର, ଜାଣନ୍ତୁ କେଉଁ ପ୍ରକାରର ଆପ୍ ଉପରେ ରହିଛି ନଜର
ନୂଆଦିଲ୍ଲୀ: ଜାତୀୟ ସୁରକ୍ଷା ଓ ବ୍ୟବହାରକାରୀଙ୍କ ବ୍ୟକ୍ତିଗତ ତଥ୍ୟ ପ୍ରଭାବିତ ହେଉଥିବା କାରଣ ଦର୍ଶାଇ ଭାରତ ଚାଇନାର ୫୯ ଆପକୁ ବ୍ୟାନ କରିଛି । ତେବେ ବ୍ୟାନ କରିବା ପରେ ଭାରତୀୟ ବଜାରରେ ଏହାର ବିକଳ୍ପର ଆବଶ୍ୟକତା ମଧ୍ୟ ଅନୂଭୁତ ହେଲାଣି । ଏଣୁ ବ୍ୟାନ କରିବା ଯେତିକି ଗୁରୁତ୍ୱପୂର୍ଣ୍ଣ ତା’ଠାରୁ ଅଧିକ ଗୁରୁତ୍ୱପୂର୍ଣ୍ଣ ହେଉଛି ଦେଶରେ ସେଗୁଡିକର ବିକଳ୍ପ ପ୍ରସ୍ତୁତ କରିବା । କେନ୍ଦ୍ର ସରକାର ମଧ୍ୟ ଏହି ଆଭିମୁଖ୍ୟ ସହ ସମର୍ଥନ ଜଣାଇଛନ୍ତି । ସରକାରଙ୍କ ତରଫରୁ ଏକ ମେକ୍ଇନ୍ ଇଣ୍ଡିଆ ଆପ୍ ଇନୋଭେସନ୍ ଚ୍ୟାଲେଞ୍ଜ ଆରମ୍ଭ କରଯାଇଛି । ଦେଶ ମଧ୍ୟରେ ସମସ୍ତ ଆଇଟି ଉଦ୍ୟୋଗ ପ୍ରତିଦ୍ୱନ୍ଦିତାକୁ ଆସିବା ପାଇଁ ସରକାର ଆହ୍ୱାନ ଦେଇଛନ୍ତି ।
59 Chinese Apps – Blocked
‘Make in India’ App Innovation Challenge – On #AatmanirbharBharat pic.twitter.com/eI3d4poc9e
— BJP (@BJP4India) July 10, 2020
ତେବେ ଭାରତୀୟ ଜନତା ପାର୍ଟିର ଅଫିସିଆଲ୍ ସାଇଟରେ ଏନେଇ ଏକ ଫଟୋ ପୋଷ୍ଟ କରାଯିବା ସହ ପ୍ରଧାନମନ୍ତ୍ରୀଙ୍କର ଏହି ପଦକ୍ଷେପକୁ ସ୍ୱାଗତ କରିଯାଇଛି । ସୂଚନା ଅନୁଯାୟୀ ସରକାର ୮ଟି ଶ୍ରେଣୀର ଆପ୍ ବିକଶିତ କରିବା ପାଇଁ ଆଇଟି ଫାର୍ମମାନଙ୍କୁ ଚ୍ୟାଲେଞ୍ଜ ଦେଇଛନ୍ତି । ଶ୍ରେଣୀଗୁଡିକ ହେଲେ- ସ୍ୱାସ୍ଥ୍ୟ, ଗେମିଂ, ନ୍ୟୁଜ୍, କୃଷି, ଶିକ୍ଷା, ମନୋରଞ୍ଜନ, ସାମାଜିକ ଗଣମାଧ୍ୟମ ଓ ଉଦ୍ୟୋଗ ସହ ସଂପୃକ୍ତ ଆପ୍ ।
ଉଲ୍ଲେଖଯୋଗ୍ୟ ଯେ ଚାଇନା ଆପ୍ ଦେଶରେ ବ୍ୟାନ ହେବା ପରେ ଅନେକ ଭାରତୀୟ ଆପ୍ ସମୟକ୍ରମେ ଧିରେ ଧିରେ ଭାଇରାଲ ହେବାରେ ଲାଗିଛି । ଏଭଳି ଅନେକ ଆପ୍ ଯାହା ଚୀନ୍ ଆପର ଲୋକପ୍ରିୟତା ଚାପରେ ଦବି ଯାଇଥିଲା, ସେଗୁଡିକ ଏବେ ସାଧାରଣ ଲୋକଙ୍କ ନଜରକୁ ଆସୁଛି । ଏହାର ସୁଯୋଗ ନେଇ ସରକାର ସେହି ଆପ୍ ଡେଭଲପରଗୁଡିଙ୍କୁ ଅଧିକ ପ୍ରୋତ୍ସାହିତ କରିବା ସହ ନୂଆ ଆଇଟି ଉଦ୍ୟୋଗକୁ ଆପ୍ ନିର୍ମାଣ ପାଇଁ ସୁଯୋଗ ଦେବାକୁ ଚାହୁଁଛି ।
