ବିସ୍ଫୋରଣରେ ପ୍ରାଣ ହରାଇଲେ ପୁଟିନଙ୍କ ପରାମର୍ଶଦାତାଙ୍କ ଝିଅ, ହତ୍ୟା ସନ୍ଦେହ
କିଭ: ୟୁକ୍ରେନ ଆକ୍ରମଣ ପଛର ମାଷ୍ଟରମାଇଣ୍ଡଙ୍କ ଝିଅ କାର୍ ବିସ୍ଫୋରଣରେ ପ୍ରାଣ ହରାଇଛନ୍ତି । ଋଷ ରାଷ୍ଟ୍ରପତି ଭ୍ଲାଦିମିର ପୁଟିନଙ୍କ ମୁଖ୍ୟ ପରାମର୍ଶଦାତା ଆଲେକଜାଣ୍ଡର ଡୁଗିନଙ୍କ ଝିଅକୁ ହତ୍ୟା । ୨୯ ବର୍ଷ ବୟସ୍କ ଝିଅ ଡାରିୟା ଡୁଗିନଙ୍କ ମୃତ୍ୟୁକୁ ନେଇ ବଢୁଛି ସସପେନ୍ସ । ୟୁକ୍ରେନ ଉପରେ ଋଷର ଆକ୍ରମଣ ଘଟଣାରେ ଆଲେକଜାଣ୍ଡାରଙ୍କ ପ୍ରମୁଖ ଭୂମିକା ରହିଥିଲା ।
ସେ ଋଷରେ ‘ପୁଟିନଙ୍କ ବ୍ରେନ’ ଭାବେ ଜଣାଶୁଣା । ୟୁକ୍ରେନ ଓ କ୍ରିମିଆ ଆକ୍ରମଣ ପଛରେ ଆଲେକଜାଣ୍ଡାରଙ୍କ ସମ୍ପୂର୍ଣ୍ଣ ମାଷ୍ଟରପ୍ଲାନ କାର୍ଯ୍ୟ କରିଥିବା କୁହାଯାଉଛି । କାର୍ ବିସ୍ଫୋରଣ ଘଟଣାରେ କାହାର ହାତ ସେନେଇ କୌଣସି ସ୍ପଷ୍ଟ ହୋଇପାରିନାହିଁ । ୟୁକ୍ରେନ ସହ ଯୁଦ୍ଧ ପ୍ରସଙ୍ଗକୁ ନେଇ ଡାରିୟାଙ୍କ ବିରୋଧରେ ବି ପାଶ୍ଚାତ୍ୟ ରାଷ୍ଟ୍ର କଟକଣା ଜାରି କରିଥିଲେ ।
କାର୍ ବିସ୍ଫୋରଣ ଘଟଣାକୁ ହତ୍ୟା ଯୋଜନା ବୋଲି ବିଭିନ୍ନ ମହଲରୁ କୁହାଯାଇଛି । ସେହି କାର୍ରେ ବାପା ଆଲେକଜାଣ୍ଡାର ଯିବାର ଥିଲା । ମାତ୍ର ଶେଷ ମୁହୂର୍ତ୍ତରେ ସେ ଅନ୍ୟ ଏକ କାର୍ରେ ଯାଇଥିବାରୁ ବର୍ତ୍ତି ଯାଇଥିଲେ । ମସ୍କୋ ନିକଟସ୍ଥ ବୋଲସିୟେ ବ୍ୟାଜୋମି ଠାରେ ଏହି ବିସ୍ଫୋରଣ ଘଟିଥିଲା ।
