ଦଶପଲ୍ଲା : ପୁଣି ବିବାଦରେ ଦଶପଲ୍ଲା ବିଡ଼ିଓ ଶରତ ଚନ୍ଦ୍ର ମଲ୍ଲିକ। ଦଶପଲ୍ଲା ବ୍ଲକ ପରିସରରେ ମଧୁବାବୁ ପେନସନ ଯୋଜନାରେ ଯୋଡି ହୋଇଥିବା ୧୨୪୯ ଜଣ ହିତାଧିକାରୀଙ୍କୁ ଭତ୍ତା ବଣ୍ଟନ କାର୍ଯ୍ୟକ୍ରମକୁ ତ୍ବରାନ୍ବିତ କରିବା ପାଇଁ ସରକାରଙ୍କ ପକ୍ଷରୁ ପଚାଶ ହଜାର ଟଙ୍କା ପ୍ରତି ବ୍ଲକକୁ ଆସିଥାଏ। ଏବଂ ସେହି ଟଙ୍କାରେ ହିତାଧିକାରୀଙ୍କ ପାଇଁ ଟେଣ୍ଡ, ଭୋଜନର ବ୍ୟବସ୍ଥା କରାଯାଇଥାଏ। କିନ୍ତୁ ଦଶପଲ୍ଲା ବ୍ଲକ ସଭା ଗୃହରେ ବେଲୁନ ଲଗାଇ କାର୍ଯ୍ୟକ୍ରମ କାହିଁକି କରାଗଲା ବୋଲି ସଭାରେ ପ୍ରଶ୍ନ କରିଛନ୍ତି ବ୍ଲକ ଅଧ୍ୟକ୍ଷା ସୁନନ୍ଦା ସାହୁ।
ସରକାରଙ୍କ ପକ୍ଷରୁ ଲୋକଙ୍କ ପାଇଁ ଆସିଥିବା ପଚାଶ ହଜାର ଟଙ୍କାକୁ ଲୋକଙ୍କ କାମରେ ନ ଲଗାଇ ସେହି ଟଙ୍କାକୁ ଆତ୍ମସାତ କରାଯାଉଥିବା ଅଭିଯୋଗ ହୋଇଛି। ପୂର୍ବରୁ ମଧ୍ୟ ଟଙ୍କା ଆତ୍ମ ସାତ କରିଥିବା ନେଇ ବିଡିଓଙ୍କ ନାଁରେ ଭିଜିଲାନ୍ସରେ ମାମଲା ଚାଲିଛି। ଏହାଛଡ଼ା ଗତ କିଛି ଦିନ ତଳେ ମଧ୍ୟ ଦଶପଲ୍ଲା ବ୍ଲକରେ ବିକାଶ କାର୍ଯ୍ୟକୁ ଠପ କରିବା, ପିସି ଆଦାୟ କରିବା ଏବଂ ଲୋକଙ୍କୁ ଧମକ ଦେବା ନେଇ ଅଭିଯୋଗ ହୋଇଥିଲା। ଯାହାକୁ ନେଇ ଦଶପଲ୍ଲା ରାଜନୀତିରେ ବିବାଦ ସୃଷ୍ଟି ହୋଇଥିଲା। ସେପଟେ ବ୍ଲକ ଅଧ୍ୟକ୍ଷାଙ୍କ ଅଭିଯୋଗକୁ ଖଣ୍ଡନ କରିଛନ୍ତି ବିଡିଓ।
