ଦାରିଙ୍ଗବାଡି : ସରୁନି ଦାଦନ ଦୁଃଖ । ପେଟପାଟଣା ପାଇଁ ଦାଦନ ଯାଇ ଦୁଇ ଗୋଡ଼ ହରାଇଲେ ରୋଜଗାରିଆ ପୁଅ । ଚିକିତ୍ସା ପାଇଁ ଅର୍ଥ ସାଜିଛି ବାଧକ । ଏ ହେଉଛନ୍ତି ଦାରିଙ୍ଗବାଡି ବ୍ଲକ ଗ୍ରୀନବାଡି ପଞ୍ଚାୟତ କୁତୁବାଡି ଗାଁର ସନନ୍ତ ପ୍ରଧାନ । ସନନ୍ତ ପରିବାର ଚଳାଇବା ପାଇଁ ତାମଲିନାଡୁ ଯାଇଥିଲେ । ସେଠାକାର ଏକ କମ୍ପାନୀରେ ଯାହା ଯେତିକି ରୋଜଗାର କରୁଥିଲେ ସେତିକିରେ ବିଧବା ମାଆ ସହ ସ୍ତ୍ରୀ ଓ ଦୁଇ ପିଲାଙ୍କୁ କଷ୍ଟେ ମଷ୍ଟେ ଚଳାଉଥିଲେ । ହେଲେ କମ୍ପାନୀରେ କାମ କରିବା ଭିତରେ ସନନ୍ତଙ୍କ ଦୁଇ ଗୋଡ଼ ଅଚଳ ହୋଇପଡିଥିଲା । କାମ ଛାଡି ଘରକୁ ଫେରି ମେଡିକାଲରେ ଦେଖାଇଥିଲେ । ଦୁଇ ଗୋଡ ନଷ୍ଟ ହୋଇଥିବାରୁ ଡାକ୍ତର ଗୋଡ କାଟିଦେଲେ । ହେଲେ ଅର୍ଥ ଅଭାବରୁ ଅଧିକ ଚିକିତ୍ସା ହୋଇ ପାରୁନି ।…
ସନନ୍ତଙ୍କ ଚିକିତ୍ସା ପାଇଁ ପରିବାର ଲୋକେ ବ୍ଲକ କାର୍ଯ୍ୟାଳୟ ଠାରୁ ଜିଲ୍ଲା କାର୍ଯ୍ୟାଳୟ ପର୍ଯ୍ୟନ୍ତ ଦୌଡ଼ି ଦୌଡ଼ି ନୟାନ୍ତ ହେଲେଣି । ହେଲେ ସହାୟତା ମିଳୁନି । ପ୍ରଶାସନ ପକ୍ଷରୁ ହୁଇଲ ଚେୟାର ଖଣ୍ଡେ ବି ଯୋଗାଇ ଦିଆଯାଉନି । ଗାଁ ଲୋକେ ସନନ୍ତଙ୍କୁ ଏକ ହୁଇଲ ଚେୟାର ଯୋଗାଇ ଦେଇଛନ୍ତି । ସେଇଥିଲେ ଚଳୁଛନ୍ତି ସନନ୍ତ । ସେପଟେ ସନନ୍ତଙ୍କ ପରିବାରକୁ କିଛି ସହାୟତା ଯୋଗାଇ ଦେଇଛନ୍ତି ୧୦୮ ଆମ୍ବୁଲାନ୍ସ କର୍ମଚାରୀ । ସନନ୍ତଙ୍କ ଚିକିତ୍ସା ପାଇଁ ପ୍ରଶାସନ ପକ୍ଷରୁ ସହାୟତା ଯୋଗାଇ ଦେବା ଜରୁରୀ ହୋଇପଡିଛି ।
