ଅବପାତ ରୂପ ନେବ ଘୁର୍ଣ୍ଣିଝଡ଼, ୭ରୁ ପ୍ରବଳ ବର୍ଷା ଆଶଙ୍କା

ଆସୁଛି ବାତ୍ୟା ବୁଲବୁଲ ।  ବଙ୍ଗୋପସାଗର ସୃଷ୍ଟି ହୋଇଥିବା ଲଘୁଚାପ ବାତ୍ୟା ରୁପ ନେଇପାରେ । ଏହା ଓଡିଶା ଉପକୂଳ ଜିଲ୍ଲାରେ ସ୍ଥଳ ଭାଗ ଛୁଇଁବାର ଆଶଙ୍କା ରହିଛି । ସ୍ଥଳ ଭାଗ ଛୁଇଁଲା ବେଳେ ଘଣ୍ଟା ପ୍ରତି ୧୦୦ରୁ ୧୫୦ କିଲୋମିଟର ପବନ ବୋହିବାର ପୂର୍ବାନୁମାନ କରାଯାଉଛି ।  ଆସନ୍ତା ୧୦ ଓ ୧୧ ମଧ୍ୟରାତ୍ରିରେ ସ୍ଥଳ ଭାଗ ଛୁଇଁପାରେ ବୋଲି ସ୍କାଏମେଟ ସୂଚନା ଦେଇଛି । ବିଶେଷ କରି ପୁରୀରୁ ପାରାଦ୍ବୀପ ମଧ୍ୟରେ ସ୍ଥଳ ଭାଗ ଛୁଇଁବାର ଆକଳନ କରାଯାଉଛି । ବାତ୍ୟା ପ୍ରଭାବରେ ଉପକୂଳ ଜିଲ୍ଲା ପୁରୀ ,କଟକ , ଖୋର୍ଦ୍ଧା, ଜଗତସିଂହପୁର, କେନ୍ଦ୍ରାପଡା ଓ ଯାଜପୁରରେ ପ୍ରବଳ ବର୍ଷା ହେବାର ଆଶଙ୍କା କରାଯାଉଛି ।

ସେପଟେ  ବାତ୍ୟା ନେଇ ଆଞ୍ଚଳିକ ପାଣିପାଗ କେନ୍ଦ୍ର କୈାଣସି ସ୍ପଷ୍ଟ ସୂଚନା ଦେଇନାହାନ୍ତି । ଆଗାମୀ ଦୁଇ ଦିନ ପର୍ଯ୍ୟନ୍ତ ପାଗ ଶୁଖିଲା ରହିବ ବୋଲି ସୂଚନା ଦେଇଛନ୍ତି ଆଞ୍ଚଳିକ ପାଣିପାଗ କେନ୍ଦ୍ର ନିର୍ଦ୍ଦେଶକ । ଆସନ୍ତା ୭ ତାରିଖ ବେଳକୁ ବାତ୍ୟାର ସ୍ଥିତି ନେଇ ସ୍ପଷ୍ଟ ସୂଚନା ମିଳିପାରେ । windy.comର ସୂଚନା ଅନୁଯାୟୀ ସମ୍ଭାବିତ ବାତ୍ୟା ବୁଲବୁଲ ବର୍ତ୍ତମାନ ପୋର୍ଟ ବ୍ଲେୟାର ଏବଂ ଏହାର ଆଖପାଖରେ ରହିଛି । ଏହା ଧିରେ ଧିରେ ଗତି କରି ୧୦-୧୧ ତାରିଖ ବେଳକୁ ଓଡିଶାର ପୁରୀ , ଭୁବନେଶ୍ବର , ପାରାଦ୍ବୀପ ଦେଇ ଗତି କରୁଥିବା ଦେଖାଯାଉଛି ।  ସୃଷ୍ଟି ହୋଇଥିବା ଲଘୁଚାପର ସ୍ଥିତି ଉପରେ ତୀକ୍ଷିଣ ନଜର ରହିଥିବା ପାଣିପାଗ ନିର୍ଦ୍ଦେଶକ କହିଛନ୍ତି ।  ସମୁଦ୍ର ଅଶାନ୍ତ ରହୁଥିବାରୁ ଆଜିଠାରୁ ମତ୍ସ୍ୟଜୀବୀଙ୍କୁ ସମୁଦ୍ର ଭିତରକୁ ଯିବା ପାଇଁ ବାରଣ କରାଯାଇଛି । ଯେଉଁ ମତ୍ସ୍ୟଜୀବୀ ସମୁଦ୍ର ଭିତରକୁ ଯାଇଛନ୍ତି ସେମାନଙ୍କୁ ତୁରନ୍ତ ଫେରିବା ପାଇଁ ନିର୍ଦ୍ଦେଶ ଦିଆଯାଇଛି । ଭାରତୀୟ ପାଣିପାଗ ବିଭାଗର ମହାନିର୍ଦ୍ଦେଶକ ମୃତ୍ୟୁଞ୍ଜୟ ମହାପାତ୍ର କହିଛନ୍ତି ଯେ ବର୍ତ୍ତମାନର ସ୍ଥିତି ଉପରେ ନଜର ରହିଛି । ଆସନ୍ତା ୭ ତାରିଖ ବେଳକୁ ସମ୍ଭାବିତ ବାତ୍ୟା ନେଇ ସ୍ପଷ୍ଟ ସୂଚନା ଦିଆଯିବ । ସମ୍ଭାବିତ ବାତ୍ୟା ଉପରେ ରାଜ୍ୟ ସରକାରଙ୍କ ନଜର ରହିଛି ବୋଲି ଏସଆରସି ସୂଚନା ଦେଇଛନ୍ତି । ')}