ମୋବାଇଲ ହ୍ୟାକ କରି ୫ ଲକ୍ଷରୁ ଊର୍ଦ୍ଧ୍ବ ଲୁଟି ନେଲେ ସାଇବର ଠକ

ଅନୁଗୁଳ: ପୁଣି ସାଇବର ଠକଙ୍କ ଆତଙ୍କ । ମୋବାଇଲ ହ୍ଯାକ କରି ଲୁଟି ନେଲେ ୫ ଲକ୍ଷ ୨୭ ହଜାର ୩୯୭ ଟଙ୍କା । ଅନୁଗୁଳ ଗାନ୍ଧୀମାର୍ଗ ସ୍ଥିତ ତ୍ରିମୂର୍ତ୍ତୀ ଅଫସେଟ ପ୍ରେସର ମାଲିକ ଚଣ୍ଡିକା ପ୍ରସାଦ ନନ୍ଦ ହୋଇଛନ୍ତି ଠକାମୀର ଶିକାର । ଚଣ୍ଡିକା ପ୍ରସାଦଙ୍କ ୟୁନିଅନ ବ୍ୟାଙ୍କ ଆକାଉଣ୍ଟରେ ପ୍ରାୟ ୫ ଲକ୍ଷ ୨୭ ହଜାର ଟଙ୍କା ଥିଲା । ଆଜି ତାଙ୍କ ଆକାଉଣ୍ଟରୁ ଏକାଧିକ ଥରରେ ୫ ଲକ୍ଷ ଟଙ୍କାରୁ ଅଧିକ ଟଙ୍କା କଟିଥିବା ନେଇ ଅଭିଯୋଗ କରିଛନ୍ତି । ତେବେ ଚଣ୍ଡିକା ଅଜଣା ଫୋନ କଲ ମାଧ୍ୟମରେ ତଥ୍ୟ ଦେଇ ନଥିବା କିମ୍ବା OTP ସେୟାର କରି ନଥିବା କହିଛନ୍ତି ।

ହ୍ଯାକର ମୋବାଇଲ ହ୍ଯାକ କରି ଟଙ୍କା ଲୁଟିଥିବା ନେଇ ସେ ସନ୍ଦେହ କରିଛନ୍ତି । ସେ ସାଇବର ଠକେଇର ଶିକାର ହୋଇଥିବା ଜାଣିବା ପରେ ତୁରନ୍ତ ଅନୁଗୁଳ ସାଇବର ଥାନାରେ ଲିଖିତ ଅଭିଯୋଗ କରିଥିଲେ । ଖବର ପାଇ ଘଟଣାର ତଦନ୍ତ କରୁଛି ପୋଲିସ । ସେପଟେ ଲୋକମାନେ ସଚେତନ ହେଲେ ସାଇବର ଠକେଇକୁ ରୋକା ଯାଇପାରିବ ବୋଲି ଅତିରିକ୍ତ ଆରକ୍ଷୀ ଅଧିକ୍ଷକ କହିଛନ୍ତି ।