କଟକରେ ଖୋଲିଲା ଧର୍ମାନୁଷ୍ଠାନ, କରୋନା କଟକଣା ଭିତରେ ଦର୍ଶନ ଆରମ୍ଭ
କଟକ: ଦୀର୍ଘ ୯ ମାସ ପରେ ଖୋଲିଲା କଟକର ଆରାଧ୍ୟ ଦେବୀ ମାଆ କଟକ ଚଣ୍ଡିଙ୍କ ମନ୍ଦିର । ଯାହା ଫଳରେ ମାଆଙ୍କ ଦର୍ଶନ ପାଇଲେ ଭକ୍ତ । କରୋନା କଟକଣା ଯୋଗୁଁ ବନ୍ଦ ରହିଥିଲା ମନ୍ଦିର ।
ପ୍ରଶାସନର ନିଷ୍ପତ୍ତି ପରେ କଟକଣା ଭିତରେ ମାଆଙ୍କ ମନ୍ଦିରି ଖୋଲିଛି । ତେବେ ରାଜ୍ୟର ସମସ୍ତ ମନ୍ଦିର ଖୋଲିବା ପାଇଁ ନିର୍ଦ୍ଦେଶ ପରେ ଶେଷରେ କଟକ ଜିଲ୍ଲାରେ ମନ୍ଦିର ଖୋଲିବାକୁ ପ୍ରଶାସନ ନିଷ୍ପତ୍ତି ନେଇଛି । ଖାଲି କଟକ ଚଣ୍ଡି ନୁହେଁ ଜିଲ୍ଲାର ବିଭିନ୍ନ ମନ୍ଦିର ମଧ୍ୟ ଆଜିଠାରୁ ଖୋଲିଛି । ମନ୍ଦିର ପ୍ରଶାସନ ସହ ଆଲୋଚନା ପରେ ନିଷ୍ପତ୍ତି ନେଇଥିଲା ଜିଲ୍ଲା ପ୍ରଶାସନ ।
ମନ୍ଦିର ଗୁଡିକ ବନ୍ଦ ପଡିଥିବାରୁ ସଫାସୁତୁରା କରିବା ସହ ଭକ୍ତଙ୍କୁ ଦର୍ଶନ ଅନୁମତି ଦେବାକୁ କଟକ ମହାନଗର ଶାନ୍ତି କମିଟି ସଂପାଦକ ପରାମର୍ଶ ଦେଇଥିଲା ।
କରୋନା କଟକଣାକୁ ମାନି ଲୋକେ କଟକର ସବୁ ପୂଜା ପାର୍ବଣ ପାଳନ କରିଛନ୍ତି । ଏବେ ପରିସ୍ଥିତିରେ ସୁଧାର ଆସିଛି । ତେଣୁ ଏବେ ମନ୍ଦିର ଖୋଲିବା ପରେ ପୂର୍ବପରି ଲୋକଙ୍କ ସହଯୋଗ କାମନା କରିଛି ଜିଲ୍ଲା ପ୍ରଶାସନ।
ସୂଚନାଯୋଗ୍ୟ, ଦୀର୍ଘ ୯ ମାସ ଧରି ଶ୍ରୀମନ୍ଦିର ବନ୍ଦ ରହିବା ପରେ ଏବେ ସାଧାରଣ ଭାବେ ପୁରୀରେ ଶ୍ରୀଜିଉଙ୍କ ଦର୍ଶନ କରିବାର ସୁଯୋଗ ପାଉଛନ୍ତି ଶ୍ରଦ୍ଧାଳୁ । ହେଲେ ଏବେ ବି ଭକ୍ତ ଆଉ ଭଗବାନଙ୍କ ମଧ୍ୟରେ କରୋନା ବାଡ଼ ସାଜି ରହିଛି । ମନ୍ଦିର ଭିତରକୁ ସବୁଙ୍କୁ ଅନୁମତି ଥିଲେ ମଧ୍ୟ ସଂହଦ୍ୱାରରୁ ନିରାଶ ହୋଇ ଫେରୁଛନ୍ତି ଭକ୍ତ ।
କାରଣ ଶ୍ରୀମନ୍ଦିରକୁ ଆସୁଥିବା ପ୍ରତ୍ୟେକ ଶ୍ରଦ୍ଧାଳୁ ତଥା ଭକ୍ତଙ୍କୁ କୋଭିଡ୍ ନେଗେଟିଭ୍ ରିପୋର୍ଟ ଦେଖାଇବା ବାଧ୍ୟତାମୂଳକ କରାଯାଇଛି । ଯେଉଁମାନଙ୍କ ପାଖରେ କୋଭିଡ୍ ରିପୋର୍ଟ ନାହିଁ ସେମାନଙ୍କୁ ମନ୍ଦିର ଭିତରକୁ ଅନୁମତି ନାହିଁ । କରୋନା ସଂକ୍ରମଣକୁ ଦୃଷ୍ଟିରେ ରଖି ଏଭଳି ନିଷ୍ପତି ନିଆଯାଇଛି । ତେଣୁ ଅନେକ ଭକ୍ତଙ୍କୁ ଶ୍ରୀମନ୍ଦିରରେ ପ୍ରବେଶ ଅନୁମତି ମିଳୁନାହିଁ । ଭକ୍ତ ଆଉ ଶ୍ରଦ୍ଧାଳୁଙ୍କ ଭାବାବେଗକୁ ଦୃଷ୍ଟିରେ ରଖି ପୁରୀରେ ବାହାର ଲୋକଙ୍କ ପାଇଁ କୋଭିଡ୍ ପରୀକ୍ଷା ନେଇ ବ୍ୟବସ୍ଥା କରିବାକୁ ଭକ୍ତ ଓ ସେବାୟତ ଦାବି କରିଛନ୍ତି ।
