ପୁଣି ଦୁଲୁକିବ ମହାନଦୀ ପଠା । ନଭେମ୍ବର ୫ ତାରିଖରୁ ୧୨ ତାରିଖ ପର୍ଯ୍ୟନ୍ତ ଅୟୋଜିତ ହେବ କଟକ ଐତିହାସିକ ବାଲିଯାତ୍ରା ୨୦୨୫ । ଏଥର କେବଳ ତଳ ପଡିଆର ୬୦ ଏକର ଜମି ଉପରେ ଆୟୋଜିତ ହେବ ଯାତ୍ରା । କଟକ ଜିଲ୍ଲାପାଳଙ୍କ ଅଧ୍ୟକ୍ଷତାରେ ଅନୁଷ୍ଠିତ ହୋଇଥିବା ବାଲିଯାତ୍ରାର ପ୍ରସ୍ତୁତି ବୈଠକରେ ନିଷ୍ପତ୍ତି ହୋଇଛି । ହାଇକୋର୍ଟଙ୍କ ନିର୍ଦ୍ଦେଶରେ ଏଥର ଉପର ପଡିଆରେ ବାଲିଯାତ୍ରା ହେବ ନାହିଁ। ତେବେ ତଳ ପଡିଆର ପରିସର ବୃଦ୍ଧି କରାଯାଇ ବାଲିଯାତ୍ରାର ଆୟୋଜନ କରାଯିବ। ଏଥିପାଇଁ ଶୃଙ୍ଖଳିତ ଢଙ୍ଗରେ ଅନଲାଇନରେ ପ୍ଲଟ ଆବଣ୍ଟନ କରାଯିବ । ସେହିପରି ଓରମାସ ଓ ଅନ୍ୟ ସ୍ଥାନରେ ବେଆଇନ ଭାବେ ବ୍ୟବସାୟୀଙ୍କୁ ବସା ଯାଉଥିବାରୁ ତାକୁ ଜିଲ୍ଲାପାଳ ବନ୍ଦ କରିବାକୁ ଅଧିକାରଙ୍କୁ ତାଗିଦ କରିଥିଲେ । ସେହିପରି ଏଥର ବୈଷ୍ଣବ ପାଣି ଓ ଅକ୍ଷୟ ମହାନ୍ତିଙ୍କ ମଞ୍ଚରେ ଆଠ ଦିନ ଧରି ରଙ୍ଗାରଙ୍ଗ ମ୍ୟୁଜିକାଲ ନାଇଟ ରାତି ୧୧ ଟା ଯାଏ ଆୟୋଜିତ ହେବ। କଟକ ଇନ କଟକକୁ ସୁନ୍ଦର ଭାବେ ଗ୍ରୀନ ଜୋନ କରାଯାଇ ଶିକ୍ଷଣୀୟ ତୋରଣ ଓ କାର୍ଯ୍ୟକ୍ରମ ସେଠାରେ ଆୟୋଜିତ ହେବ । ବାଲିଯାତ୍ରାକୁ ଲୋକମାନେ ଯେପରି ସୁରୁଖୁରୁରେ ଆସିବେ ସେଥି ପାଇଁ ୫୦ଟି ଆମ ବସ ଯୋଗାଇ ଦେବାକୁ ସରକାରଙ୍କୁ କଟକ ଜିଲ୍ଲାପାଳ ଅନୁରୋଧ କରିଛନ୍ତି । ସୁରକ୍ଷା ଦୃଷ୍ଟିକୋଣରୁ ଅଗ୍ନୀଶମ, ପୋଲିସ, ଇଲେକ୍ଟ୍ରିକାଲ, ଜଳ ଯୋଗାଣ ବିଭାଗ ଅଧିକ ଯତ୍ନଶୀଳ ହେବେ।
ଏହି ବୈଠକରେ କଟକ ଡିସିପି ଯୋଗ ଦେଇ ପାର୍କିଂକୁ ଶୃଙ୍ଖଳିତ କରିବା ସହ ଟ୍ରାଫିକ ପରିଚାଳନାକୁ ବ୍ୟବସ୍ଥିତ କରାଯିବ ବୋଲି କହିଥିଲେ। ଭିଡ ନିୟନ୍ତ୍ରଣ ସହ ଚୋରି ଓ ଛିନତାଇ ରୋକିବା ପାଇଁ ଅଧିକ ପୋଲିସ ଫୋର୍ସ ସହ ସ୍ବତନ୍ତ୍ର ଟିମ ରହିବ। ସିସିଟିଭି କ୍ୟାମେରା, ୱାଚ ଟାୱାର କରି ଉପରୁ ସମସ୍ତଙ୍କ ଗତିବିଧି ଉପରେ ନଜର ରଖାଯିବ। ସେପଟେ ଉପର ପଡିଆ ହେଉଛି କଟକ ବାଲିଯାତ୍ରାର ପ୍ରତୀକ। ଏହାର ପରିଚୟ ବଞ୍ଚାଇବା ପାଇଁ ଉପର ପଡିଆରେ ଏହାର ଆୟୋଜନ ହେଲେ ଭଲ ହେବ ବୋଲି କହିଛନ୍ତି କଟକ ମେୟର ସୁବାସ ସିଂ ।
