ସାହାରା ସାଜିଲା BSKY, ଚାଲିଲା ସାଇ

କଟକ: ପୁନର୍ଜନ୍ମ ଦେଲା BSKY। ବିଜୁ ସ୍ବାସ୍ଥ୍ୟ କଲ୍ୟାଣ ଯୋଜନାରେ ନୂଆ ଜୀବନ ପାଇଲେ ମାଲକାନଗିରିର ୮ ବର୍ଷର ବାଳକ ସାଇ ଗଲରି। ନିଆଁରେ ଗୁରୁତର ହୋଇ ଚାଲିବା ଶକ୍ତି ହରାଇବସିଥିବା ସାଇ ଦେଖିଛି ଜୀବନର ନୂଆ ସକାଳ। କଟକର ଏକ ଘରୋଇ ହସ୍ପିଟାଲରେ ଅପରେସନ ପରେ ସେ ସମ୍ପୂର୍ଣ୍ଣ ସୁସ୍ଥ ହୋଇଛି । ଏବେ ଚାଲିବା ସହିତ ଖେଳିବୁଲି ପୁରୁଣା ଦିନର ମଉଜକୁ ପୁଣି ଉପଭୋଗ କରୁଛି ସାଇ। ବଡ଼କଥା ହେଉଛି ଘରୋଇ ହସ୍ପିଟାଲରେ ଏହି ଚିକିତ୍ସା ବ୍ୟୟବହୁଳ ହୋଇଥିବାବେଳେ ଟଙ୍କାଟିଏ ବି ଖର୍ଚ୍ଚ କରିନାହାନ୍ତି ସାଇଙ୍କ ପରିବାର। ବିଏସକେଓ୍ବାଇରେ ସମ୍ପୂର୍ଣ୍ଣ ମାଗଣାରେ ତାର ଚିକିତ୍ସା କରାଯାଇଛି ।

ପରିବାର ଲୋକଙ୍କ କହିବା ଅନୁସାରେ, ଅଗ୍ନିକାଣ୍ଡରେ ଗୁରୁତର ହୋଇପଡ଼ିଥିଲା ସାଇ । ପରେ ଚାଲିବାର ଶକ୍ତି ହରାଇବସିଥିଲା । ମାଲକାନଗିରି ଜିଲ୍ଲା ମୁଖ୍ୟ ଚିକିତ୍ସାଳୟରେ ପ୍ରଥମେ ଭର୍ତ୍ତି ହେବା ପରେ କଟକ ସ୍ଥାନାନ୍ତରିତ ହୋଇଛି । ବାଲିକୁଦା ସ୍ଥିତ ଏସବିଏମ ହସ୍ପିଟାଲରେ ସାଇର ଅପରେସନ ହୋଇଥିଲା । ବିଶିଷ୍ଟ ପ୍ଲାଷ୍ଟିକ ସର୍ଜନ ଡାକ୍ତର ବିଭୁତି ଭୂଷଣ ନାୟକ ଦୁଇଟି ପର୍ଯ୍ୟାୟରେ ସର୍ଜରୀ କରିଥିଲେ । ଅପରେସନର ସବୁ ଖର୍ଚ୍ଚ ବିଏସକେଓ୍ବାଇରେ ହୋଇଥିଲା । ଚିକିତ୍ସା ପରେ ଏବେ ସାଇ ସୁସ୍ଥ ହୋଇଛି । ଏଥିପାଇଁ ଡାକ୍ତର ଓ ରାଜ୍ୟ ସରକାରଙ୍କୁ କୃତଜ୍ଞତା ଜଣାଇଛନ୍ତି ସାଇଙ୍କ ପରିବାର ।