ନନ୍ଦିଘୋଷ ବ୍ୟୁରୋ: ବାଂଲାଦେଶରୁ କଟକକୁ ନାବାଳିକା ଚାଲାଣ ଅଭିଯୋଗ । ଚାକିରିର ଲୋଭ ଦେଖାଇ ଏଠାକୁ ଆଣିବା ପରେ ମସାଜ ପାର୍ଲର ଓ ବେଆଇନ କାରବାରରେ ଲଗାଯାଇଥିବାର ସଂପୃକ୍ତ ନାବାଳିକା ଜଣକ ଅଭିଯୋଗ କରିଛନ୍ତି। ସେହି ନାବାଳିକାକୁ ଲିଙ୍କ୍ ରୋଡ୍ ରୁ ଉଦ୍ଧାର କରି ସିଡବ୍ଲୁସିକୁ ହସ୍ତାନ୍ତର କରିଛି ପୋଲିସ।
ଗତ ଅକ୍ଟୋବରରେ ଚାକିରି ଖୋଜୁଥିବା ବେଳେ ଫେସବୁକରେ ଜଣକ ସହିତ ବନ୍ଧୁତା ହୋଇଥିଲା। ଚାକିରି ଦେବାକୁ କହି ପ୍ରଥମେ କୋଲକାତା, ସେଠାରୁ ଭୁବନେଶ୍ଵର ଓ ପରେ କଟକରେ ରଖାଯାଇଥିଲା। ସିଡବ୍ଲୁସି କହିଛି, ସେହି ନାବାଳିକା ଜଣକ ପ୍ରକୃତରେ ବାଂଲାଦେଶୀ କି ନାହିଁ, ତାହା ସ୍ପଷ୍ଟ ହୋଇନାହିଁ। ତା ପାଖରେ କୌଣସି ପରିଚୟପତ୍ର ନାହିଁ । ସେ କେଉଁଠି ରହୁଥିଲା, କାହା ସହ ଆସିଥିଲା, ତାହା ବି କହିପାରୁନାହିଁ। ତାର ପରିଚୟ ସ୍ପଷ୍ଟ କରିବାକୁ ସରକାରୀ ସ୍ତରରେ ଚେଷ୍ଟା କରାଯାଉଛି। ବାଂଲାଦେଶ ଦୂତାବାସକୁ ଅବଗତ କରାଯାଇଛି।
