ଟାଟା ପ୍ରକଳ୍ପରେ ଚାକିରିର ନକଲି ନିଯୁକ୍ତିପତ୍ର ଉପରେ ତନାଘନା କରୁଛି କ୍ରାଇମବ୍ରାଞ୍ଚ

ବ୍ରହ୍ମପୁର : ବ୍ରହ୍ମପୁର ଟାଟା ପ୍ରକଳ୍ପରେ ଚାକିରି ନେଇ ନକଲି ନିଯୁକ୍ତିପତ୍ର ପ୍ରଦାନ ଘଟଣାରେ ତଦନ୍ତ ପାଇଁ ଗଞ୍ଜାମରେ ପହଞ୍ଚିଛି କ୍ରାଇମବ୍ରାଞ୍ଚ । କ୍ରାଇମବ୍ରାଞ୍ଚର ୨ ଇନ୍ସପେକ୍ଟର ପହଞ୍ଚି ନକଲି ନିଯୁକ୍ତିପତ୍ର ନେଇ ଖୋଳତାଡ କରୁଛନ୍ତି । ନକଲି ନିଯୁକ୍ତିପତ୍ର ପାଇଥିବା କିଛି ଆବେଦନକାରୀଙ୍କୁ କାଲି ଗୋପାଳପୁର ଥାନାରେ ପଚରାଉଚରା କରାଯାଇଛି । ନିଲମ୍ବିତ ଆଇଏଫଏସ ଅଭୟକାନ୍ତଙ୍କ ପୁଅ ନିଯୁକ୍ତିପତ୍ର ଦେଇଥିବା ଅଭିଯୋଗ ହୋଇଥିଲା । ଅଭୟକାନ୍ତଙ୍କ ପୁଅ ଆକାଶ ପାଠକଙ୍କ ବିରୋଧରେ ଅଭିଯୋଗ ହୋଇଥିବା ବେଳେ କ୍ରାଇମବ୍ରାଞ୍ଚ ପାଖରେ ଦାଖଲ ଏତଲାକୁ ଭିତ୍ତିକରି ତଦନ୍ତ ଆରମ୍ଭ ହୋଇଥିବା ସୂଚନା ମିଳିଛି ।

ଏହାସହ ଭୁବନେଶ୍ୱରରେ ଥିବା ଆକାଶଙ୍କ ବ୍ୟାଙ୍କ୍‌ ଆକାଉଣ୍ଟରେ ୮ କୋଟି ୪୦ ଲକ୍ଷ ଅଧିକ ଟଙ୍କା ଡିପୋଜିଟ ହୋଇଛି । ଖାଲି ସେତିକି ନୁହେଁ ବ୍ରହ୍ମପୁରରେ ମଧ୍ୟ କ୍ୟାସ୍‌ ଡିପୋଜିଟ ହୋଇଥିଲା । ଲକଡାଉନ ସମୟରେ ଅଭୟ ଏବଂ ତାଙ୍କ ପରିବାର ଲୋକ ଚାଟର ପ୍ଲେନରେ ଫରେନକୁ ଯାଇ ବୁଲାବୁଲି ମଧ୍ୟ କରିଛନ୍ତି । ସେପଟେ ଆକାଶ ଏକ କୋଟି ଟଙ୍କା ଦରମା ପାଉଥିଲେ ବୋଲି ଅଭୟ କହିଥିଲେ । କିନ୍ତୁ ତାକୁ ନେଇ ଆକାଶ କୌଣସି ସାଲାରୀ କାଗଜପତ୍ର ଦେଖାଇ ପାରିନଥିଲେ ।

ପ୍ରଥମେ ଆଇଏଫ୍‌ଏସ୍‌ ଅଫିସର ଅଭୟକାନ୍ତ ପାଠକଙ୍କ ଆୟ ବହିର୍ଭୂତ ସଂପତ୍ତି ଭିଜିଲାନସକୁ ତାଜୁବ କରିଥିଲା  ।  ୧୩ଟି ସ୍ଥାନରେ ରେଡ୍ କରାଯାଇଥିଲା । ଯେଉଁଥିରେ ଭିଜିଲାନ୍ସ ମାଳ ମାଳ ପ୍ଲଟ, କୋଠାବାଡି ସାଙ୍ଗକୁ କୋଟି କୋଟି ଟଙ୍କାର ସମ୍ପତ୍ତି ଖୋଜି ବାହାର କରିଥିଲା  । ଏପରି ଭାବେ ୫୦ କୋଟିରୁ ଅଧିକ ସଂପତ୍ତି ଠାବ ହୋଇଥିବା ଜଣାପଡିଛି  । ତାପରେ ଅଭୟକାନ୍ତଙ୍କ ପୁଅର ହାଇପ୍ରୋଫାଇ ମେଣ୍ଟେନାସ ସମସ୍ତଙ୍କ  ମୁଣ୍ଡକୁ ଟିଣ କରିଥିଲା । ସେ ଟାଟା ମୋଟର୍ସରେ କାମ କରୁଥିବା ଏବଂ ତାଙ୍କ ମାସିକ ଦରମା ୧ କୋଟି ହୋଇଥିବା କହିଥିଲେ । ଏହାପରେ ଚାଲିଥିଲା ତନାଘନା ।

https://youtu.be/FCQX99wsn74