ସେପ୍ଟେମ୍ବର ୩୦ ଯାଏଁ ବଢ଼ିଲା ସ୍ୱର୍ଗଦ୍ୱାରରେ ଶବଦାହ କଟକଣା
ଭୁବନେଶ୍ୱର: ରାଜ୍ୟରେ କରୋନା ସଂକ୍ରମଣ ବଢ଼ିବାରେ ଲାଗିଛି । କରୋନା ନେଇ ରାଜ୍ୟରେ ଆଜିଠୁ ଅନ୍ଲକ୍ ୪ ଲାଗୁ ହୋଇଛି । ଅନ୍ଲକ୍ ୪ରେ ରାଜ୍ୟରେ କିଛି କଟକଣା ଉପରେ କୋହଳ କରାଯାଇଛି । କିନ୍ତୁ, ପୂର୍ବ ଭଳି ପୁରୀ ସ୍ୱର୍ଗଦ୍ୱାରରେ ଯେଉଁ କଟକଣା ଥିଲା ତାହା ଏବେ ପର୍ଯ୍ୟନ୍ତ ବଳବତ୍ତର ରହିଛି । ସ୍ୱର୍ଗଦ୍ୱାରରେ କଟକଣା ଅନୁଯାୟୀ ବାହାର ରାଜ୍ୟରୁ କିମ୍ବା ବାହାର ଜିଲ୍ଲାରୁ ଶବ ଦାହ ଉପରେ ରୋକ ଲାଗିଥିଲା । ଉକ୍ତ କଟକଣାକୁ କରୋନା ପାଇଁ ଆଉ ମାସେ ବଢ଼ାଇ ଦିଆଯାଇଛି । ସେପ୍ଟେମ୍ବର ୩୦ ଯାଏଁ ସ୍ୱର୍ଗଦ୍ୱାରରେ ବାହାରୁ ଆସୁଥିବା ମୃତଦେହ ଦାହ କରାଯାଇ ପାରିବ ନାହିଁ ।
ସେପଟେ ପୁରୀରେ କରୋନା ସଂକ୍ରମଣ ସାଢ଼େ ୩ ହଜାର ପାର ହୋଇଛି । ପ୍ରତିଦିନ ୧୦୦ରୁ ଅଧିକ କରୋନା ସଂକ୍ରମଣ ମାମାଲା ପୁରୀ ଜିଲ୍ଲାରୁ ଚିହ୍ନଟ ହେଉଛି । ଆଜି ୧୩୬ ଜଣ ନୂଆ ସଂକ୍ରମିତ ଚିହ୍ନଟ ହୋଇଛନ୍ତି । ୨୭୦୮ ଜଣ ଏବେ ସୁସ୍ଥ ହୋଇଥିବା ବେଳେ ୯୧୦ ଜଣ ଏବେ ରାଜ୍ୟରେ କରୋନା ସକ୍ରିୟ ରହିଛନ୍ତି । କରୋନାରେ ପୁରୀ ଜିଲ୍ଲାରେ ୧୫ ଜଣଙ୍କର ମୃତ୍ୟୁ ହୋଇଛି ।
