୫ରୁ ୧୨ ବର୍ଷ ପିଲାଙ୍କୁ ଦିଆଯିବ ଟିକା !

ନୂଆଦିଲ୍ଲୀ: କରୋନା କୋପରୁ ପିଲାଙ୍କୁ ଉଦ୍ଧାର କରିବା ପାଇଁ ଶୀଘ୍ର ମିଳିବ ଟିକା । ୫ରୁ ୧୨ ବର୍ଷ ପିଲାଙ୍କୁ ଟିକା ଦେବାକୁ ମିଳିପାରେ ଅନୁମତି । କୋର୍ବେଭାକ୍ସକୁ ଏହି ଅନୁମତି ମିଳିପାରେ । ଔଷଧ ମହାନିୟନ୍ତ୍ରକ ଅନୁମୋଦନ ଦେଇପାରନ୍ତି ।

ହାଇଦ୍ରାବାଦସ୍ଥିତ ବାୟୋଲୋଜିକାଲ-E ପ୍ରସ୍ତୁତ କରିଛି ଏହି କୋର୍ବେଭାକ୍ସ ଟିକା । କମ୍ପାନୀ ୫ରୁ ୧୨ବର୍ଷ ବୟସର ପିଲାଙ୍କୁ ଟିକା ଦେବା ପାଇଁ DCGIରେ ଆବେଦନ କରିଛି । DCGI ପକ୍ଷରୁ ଶୀଘ୍ର ଅନୁମତି ମିଳିବ ବୋଲି କୁହାଯାଉଛି । ନିର୍ଦ୍ଧାରିତ ବ୍ୟବଧାନରେ ୨ଟି ଡୋଜ୍ ଦିଆଯିବ । ୨୦୨୧ ସେପ୍ଟେମ୍ବରରେ କମ୍ପାନୀ ପକ୍ଷରୁ ତୃତୀୟ ପର୍ଯ୍ୟାୟ ପରୀକ୍ଷଣ କରାଯାଇଥିଲା ।

୧୨ ବର୍ଷରୁ ଅଧିକ ପିଲାଙ୍କୁ ଟିକା

ସେପଟେ ଟିକାକରଣ କ୍ଷେତ୍ରରେ ଆଉ ଏକ ବଡ଼ ସଫଳତା । ଜରୁରୀକାଳୀନ ବ୍ୟବହାର ଲାଗି କୋଭାଭାକ୍ସକୁ ମିଳିଲା ଅନୁମତି । କୋଭାଭାକ୍ସକୁ ଅନୁମତି ଦେଲେ DCGI । ସେରମ ଇନଷ୍ଟିଚ୍ୟୁଟ ପକ୍ଷରୁ ପ୍ରସ୍ତୁତ ହୋଇଛି ଟିକା କୋଭାଭାକ୍ସ । ଏହାଦ୍ବାରା 12 ବର୍ଷରୁ ଅଧିକ ବୟସର ପିଲାଙ୍କୁ ଟିକା ଦିଆଯାଇପାରିବ । ବୟସ୍କଙ୍କ ଲାଗି ବି ଏହି ଟିକା ପ୍ରଯୁଜ୍ୟ ହେବ ବୋଲି କମ୍ପାନୀ ପକ୍ଷରୁ କୁହାଯାଇଛି । ଏହାଛଡ଼ା ନୋଭାଭାକ୍ସର ବିଶ୍ବସ୍ତରୀୟ ଟ୍ରାଏଲ ସଫଳ ହୋଇଛି ଏବଂ ଏହାର ପ୍ରଭାବ ୯୦ ପ୍ରତିଶତ ସଫଳତା ଲାଭ କରୁଛି ବୋଲି କହିଛନ୍ତି ସେରମ ଇନଷ୍ଟିଚ୍ୟୁଟ ସିଇଓ ଅଦର ପୁନାଓ୍ବାଲା ।