କୋଭିଡ୍ ନିୟମ ଭାଙ୍ଗିଲେ ବିମାନ ଯାତ୍ରା ମନା
1 min read
ନୂଆଦିଲ୍ଲୀ: ବିମାନ ଯାତ୍ରା ବେଳେ ମାନିବାକୁ ହେବ କୋଭିଡ୍ ନିୟମ । କଟକଣା ନ ମାନିଲେ ହେବ ଦୃଢ଼ କାର୍ଯ୍ୟାନୁଷ୍ଠାନ । କରୋନା କଟକଣା ମାନୁ ନ ଥିବା ଯାତ୍ରୀଙ୍କୁ ତୁରନ୍ତ ବିମାନରୁ ଓହ୍ଲାଇ ଦେବା ସହ ସେମାନଙ୍କୁ ନୋ-ଫ୍ଲାଇ ଲିଷ୍ଟରେ ପକାଇବାକୁ DGCAକୁ ନିର୍ଦ୍ଦେଶ ଦେଇଛନ୍ତି ଦିଲ୍ଲୀ ହାଇକୋର୍ଟ ।
କୋଲକାତାରୁ ଦିଲ୍ଲୀ ଅଭିମୁଖେ ଯାଉଥିବା ଏୟାର ଇଣ୍ଡିଆ ବିମାନରେ ଯାତ୍ରୀମାନେ ମାସ୍କ ନ ପିନ୍ଧିବା ସହ ଅନ୍ୟ କଟକଣା ମାନୁ ନ ଥିବା ଦେଖାଯାଇଥିଲା । ଏହାକୁ ନେଇ ତୀବ୍ର ଅସନ୍ତୋଷ ବ୍ୟକ୍ତ କରିଥିଲେ ଦିଲ୍ଲୀ ହାଇକୋର୍ଟ । ବିମାନ ଯାତ୍ରା ବେଳେ ଯାତ୍ରୀମାନେ ଯେପରି ସମସ୍ତ କଟକଣା କଡ଼ାକଡ଼ି ଭାବେ ପାଳନ କରିବେ ତା’ ଉପରେ ତୀକ୍ଷ୍ଣ ନଜର କରିବାକୁ କୋର୍ଟ ନିର୍ଦ୍ଦେଶ ଦେଇଛନ୍ତି । ଦେଶର ବିଭିନ୍ନ ସ୍ଥାନରେ କରୋନା ସଂକ୍ରମିତଙ୍କ ସଂଖ୍ୟା ବଢୁଥିବା ବେଳେ ଏଭଳି ନିୟମକୁ ବେଖାତିର କରିବା ଆଦୌ ଉଚିତ ନୁହେଁ । କରୋନା କଟକଣା ସମ୍ପର୍କରେ ଓ୍ୱେବ୍ସାଇଟ୍ରେ ସୂଚିତ କରିବା ସହ ଯାତ୍ରୀ ଓ ବିମାନର କାର୍ଯ୍ୟକର୍ତ୍ତା ଏହା ପାଳନ କରିବାକୁ କଡ଼ା ନିର୍ଦ୍ଦେଶ ଦେଇଛନ୍ତି କୋର୍ଟ ।
ଦେଶରେ କରୋନା କଟକଣାକୁ କଡ଼ା କଡ଼ା କରାଯାଉଛି । କାରଣ କରୋନାର ନୂଆ ଷ୍ଟ୍ରେନ୍ ଏବେ ଭାରତରେ ଦେଖିବାକୁ ମିଳିଛି । ବିଭିନ୍ନ ରାଜ୍ୟରେ କରୋନା ସଂକ୍ରମଣ ବଢ଼ିବାରେ ଲାଗିଛି । ଇଂଲଣ୍ଡରେ ନୂଆ ଷ୍ଟ୍ରେନ୍ ଦେଖାଯିବା ପରେ ଭାରତରେ ଅଧିକ ସତର୍କତା ଅବଲମ୍ବନ କରାଯାଉଛି । ତେବେ ଗୋଟିଏ ପଟେ କରୋନା ଭ୍ୟାକ୍ସିନ ଦ୍ୱାରା ସଂକ୍ରମଣ ରୋକା ଯାଉଥିବା ବେଳେ ଅନ୍ୟପଟେ ସାମାଜିକ ଦୂରତା ଓ ମାସ୍କ ପିନ୍ଧିବାକୁ ମଧ୍ୟ ଗୁରୁତ୍ୱ ଦିଆଯାଉଛି ।
