ଗଞ୍ଜାମ କୋଭିଡ୍ ସ୍ଥିତି : ସୁଧୁରୁଛି, ଟେଷ୍ଟିଂର ମାତ୍ର ୩ ପ୍ରତିଶତ ସଂକ୍ରମିତ

ଗଞ୍ଜାମ : ଗଞ୍ଜାମରେ ଦିନକରେ  ସମୁଦାୟ ଟେଷ୍ଟିଂର ମାତ୍ର ତିନି ପ୍ରତିଶତ କରୋନା ପଜିଟିଭ୍ ଆସିବା କମ୍ ବଡ଼ କଥା ନୁହେଁ । ଏକଥା ପ୍ରମାଣ କରୁଛି ଯେ ଜିଲ୍ଲାରେ ସ୍ଥିତି ସୁଧୁରୁଛି । ଜିଲ୍ଲାର ଉଭୟ ଗ୍ରାମାଞ୍ଚଳ ଓ ସହରାଞ୍ଚଳର ସ୍ଥିତି ପୂର୍ବପେକ୍ଷା ଯଥେଷ୍ଟ ଭଲ ରହିଛି ବୋଲି ଜିଲ୍ଲାପାଳ ବିଜୟ ଅମୃତ କୁଲାଙ୍ଗେ କହିଛନ୍ତି । ଆଜି ସାମ୍ୱାଦିକ ସମ୍ମିଳନୀର ଆୟୋଜନ କରି ସେ ଗଞ୍ଜାମ ଜିଲ୍ଲାର କରୋନା ସ୍ଥିତି ନେଇ ବିସ୍ତୃତ ସୂଚନା ଦେଇଛନ୍ତି । ମିଳିଥିବା ସୂଚନା ଅନୁଯାୟୀ,  ଗଞ୍ଜାମରେ କରୋନା ସଂକ୍ରମଣ ଅନେକ ମାତ୍ରାରେ କମିଛି ।

ଗତ ଜୁଲାଇ ମାସ ତୁଳନାରେ ଜିଲ୍ଲାରେ ୧୦ ଗୁଣା ଅଧିକ ଟେଷ୍ଟିଂ ହୋଇଛି । ଗ୍ରୀନ ଜୋନର ସଂଖ୍ୟା ମଧ୍ୟ ବଢିଛି । ସହରାଞ୍ଚଳର ଅଧିକାଂଶ ସ୍ଥାନ ପୂର୍ବରୁ ଗ୍ରୀନ ଜୋନ୍ ଭାବେ ଚିହ୍ନଟ ହୋଇଥିବା ବେଳେ ଏବେ ସ୍ଥିତି ବଦଳୁଛି । ସଂକ୍ରମଣ ରୋକିବା ପାଇଁ ସରକାରଙ୍କ ସ୍ୱତନ୍ତ୍ର ଫୋକସ୍ ଯୋଗୁଁ ଏଭଳି ହୋଇଥିବା ଜିଲ୍ଲାପାଳ କହିଛନ୍ତି । ସେ ଆହୁରି ମଧ୍ୟ କହିଛନ୍ତି ଯେ, ୮୪ ପ୍ରତିଶତ ଗ୍ରାମାଞ୍ଚଳ କରୋନା ସଂକ୍ରମଣରୁ ମୁକ୍ତ ରହିଛି । ଅନ୍ୟପକ୍ଷରେ କରୋନାରୁ ସୁସ୍ଥ ହେବା ପରେ ଲୋକେ ସ୍ୱେଚ୍ଛାକୃତ ଭାବେ ପ୍ଲାଜମା ଦାନ କରିବା ପାଇଁ ସରକାର ନିବେଦନ କରିଥିଲେ । ମୁଖ୍ୟମନ୍ତ୍ରୀ ନିଜେ ପ୍ଲାଜମା ଦାନ ପାଇଁ ଅପିଲ କରିଥିଲେ । ଏଣୁ ମୁଖ୍ୟମନ୍ତ୍ରୀଙ୍କ ଅପିଲରେ ଅନୁପ୍ରାଣିତ ହୋଇ ସାଧାରଣ ଲୋକେ ପ୍ଲାଜମା ଦାନ କରିବା ପାଇଁ ଆଗେଇ ଆସିଛନ୍ତି । ଏହି କ୍ରମରେ ରାଜ୍ୟରେ ପ୍ଲାଜମା ଦାତାଙ୍କ ସଂଖ୍ୟା କ୍ରମାଗତ ବଢୁଛି ।

ଜିଲ୍ଲାକୁ ସ୍ୱତନ୍ତ୍ର ଫୋକସ୍ ମିଳିବା ପରଠୁ ଡ଼ାକ୍ତରୀ ସରଞାଜମଠାରୁ ଆରମ୍ଭ କରି ଭିତ୍ତିଭୂମି ପର୍ଯ୍ୟନ୍ତ ସବୁ କ୍ଷେତ୍ରରେ ଜିଲ୍ଲା ସକ୍ଷମ ରହିଛି । ତେବେ ସରକାରଙ୍କ କ୍ଷେତ୍ରରୁ ସବୁ ପ୍ରକାର ପଦକ୍ଷେପ ,ଠିକ ସମୟରେ ନିଆଯାଉଥିବାରୁ ଜିଲ୍ଲାରେ କରୋନାଜନିତ ମୃତ୍ୟୁ ମଧ୍ୟ କମିଥିବା ଜିଲ୍ଲାପାଳ ସୂଚନା ଦେଇଛନ୍ତି । ଉଲ୍ଲେଖଯୋଗ୍ୟ ଜିଲ୍ଲାରେ ସାଧରଣ ଲୋକେ ବହୁ ସଂଖ୍ୟାରେ ସ୍ୱେଚ୍ଛାକୃତ ଭାବେ ଆଗକୁ ଆସି ରକ୍ତ ନମୁନା ପରୀକ୍ଷା କରୁଛନ୍ତି । ଯାହା ଫଳରେ ପ୍ରଶାସନର ଉଦ୍ୟମର ମୂଲ୍ୟ ରହୁଛି  । ସେହିଭଳି ଜିଲ୍ଲାରେ ଏକ ଲକ୍ଷ  ରକ୍ତ ନମୁନା ପରୀକ୍ଷା ହେବା ସହ  ଗତ ଦଶ ଦିନରେ ସଂକ୍ରମଣ କମିଛି ।