ସଂକ୍ରମିତ ମାଆଙ୍କଠାରୁ ଜନ୍ମିତ ଶିଶୁଙ୍କୁ କିପରି ପ୍ରଭାବିତ କରୁଛି କରୋନା ?

ନୂଆଦିଲ୍ଳୀ: ସାରା ବିଶ୍ୱରେ ଦୀର୍ଘ ଦୁଇ ବର୍ଷ ହେବ କରୋନା ଆତଙ୍କ ଖେଳାଇଛି । କରୋନାର କଳା ବାଦଲ ଶିଶୁଙ୍କ ଉପରେ ମଧ୍ୟ ପଡ଼ିଛି । କରୋନା ପ୍ରଭାବ ଶିଶୁଙ୍କ ମସ୍ତିଷ୍କ ବିକାଶ ଉପରେ ପଡୁଛି । ଏହା ସହ ସିଧାସଳଖ କିଡନୀକୁ ଏହା ନଷ୍ଟ କରୁଛି ବୋଲି  ଗବେଷଣାରେ କୁହାଯାଇଛି । ଗର୍ଭାବସ୍ଥା ସମୟରେ କରୋନା ସଂକ୍ରମଣ ହୁଏତ ଗର୍ଭସ୍ଥ ଶିଶୁର ମସ୍ତିଷ୍କ ଉପରେ ପ୍ରଭାବ ନ ପକାଇପାରେ ମାତ୍ର ଶିଶୁ ଜନ୍ମ ନେବା ପରେ ଏହାର ପ୍ରଭାବ ଶିଶୁର ମସ୍ତିଷ୍କ ଉପରେ ପଡିଥାଏ ବୋଲି ଜାମା ପେଡିଆଟ୍ରିକ୍ସ ପକ୍ଷରୁ ପ୍ରକାଶିତ ରିପୋର୍ଟରେ କୁହାଯାଇଛି ।

ଗବେଷକମାନେ ନ୍ୟୁୟର୍କର ୨୫୫ ନବଜାତଙ୍କୁ ନେଇ ଏହି ଗବେଷଣା କରିଥିଲେ । ସେମାନଙ୍କ ମଧ୍ୟରୁ ୧୧୪ ଜଣ ଶିଶୁଙ୍କ ମା’ ଗର୍ଭାବସ୍ଥା ସମୟରେ କୋଭିଡରେ ପୀଡିତ ସଂକ୍ରମିତ । ସଂକ୍ରମିତ ମା’ ମାନଙ୍କଠାରୁ ଜନ୍ମିତ ଶିଶୁଙ୍କ କ୍ଷେତ୍ରରେ ଦେଖାଯାଇଥିଲା ଯେ ସେମାନଙ୍କ ମସ୍ତିଷ୍କ ଉପରେ ସେପରି କିଛି ପ୍ରଭାବ ପଡିନାହିଁ । ମାତ୍ର ସଂକ୍ରମଣ ପୂର୍ବରୁ ଜନ୍ମ ନେଇଥିବା ଶିଶୁଙ୍କ କ୍ଷେତ୍ରରେ ଦେଖାଯାଇଥିଲା ଯେ ସେମାନଙ୍କ ମସ୍ତିଷ କରୋନାରେ ପ୍ରଭାବିତ ହୋଇଛି । ଶିଶୁଙ୍କ ବୟସ ବଢିବା ସହ ସେମାନଙ୍କ ମସ୍ତିଷ୍କ ଅଧିକ ପ୍ରଭାବିତ ହୋଇଥିବା କୁହାଯାଇଛି । ସେହିପରି କରୋନା ଭାଇରସର ପ୍ରଭାବ ସିଧାସଳଖ କିଡନୀ ଉପରେ ପଡୁଛି ବୋଲି ଗବେଷଣାରେ କୁହାଯାଇଛି ।