କରୋନା ଟିକା ନେଇ ଚୀନରୁ ଆସିଲା ଖୁସି ଖବର: ଡିସେମ୍ୱର ସୁଦ୍ଧା ବଜାରରେ ହେବ ଉପଲବ୍ଧ

ବେଜିଂ: କରୋନା ଭାଇରସର ଭ୍ୟାକ୍ସିନ୍ ନେଇ ଚୀନରୁ ଆସିଛି ଆଶ୍ୱସ୍ତିକର ଖବର । ଗ୍ଳୋବାଲ୍ ଟାଇମ୍ସର ରିପୋର୍ଟ ଅନୁଯାୟୀ ଟିକା ନିର୍ମାଣକାରୀ କମ୍ପାନୀ ସିନୋଫାର୍ମ ଦ୍ୱାରା ପ୍ରସ୍ତୁତ କରାଯାଉଥିବା ଭ୍ୟାକ୍ସିନ୍ ସାଧାରଣ ଲୋକଙ୍କ ପାଇଁ ଡିସେମ୍ୱର ଶେଷ ସୁଦ୍ଧା ବଜାରରେ ଉପଲବ୍ଧ ହେବ । ଯାହାର ଦାମ୍ ରହିଛି ୧୦୦୦ୟୁଆନ୍ ଅର୍ଥାତ ୧୦ ହଜାର ୭୮୦ଟଙ୍କା । ତେବେ ବଜାରକୁ ଆସିବା ପରେ ଏହାର ଦାମ୍ ଅହୁରି କମିବ ।

            ଚୀନର ଜାତୀୟ ଫାର୍ମାସିଟୁକାଲ୍ ଗ୍ରୁପ୍ ସିନୋଫାର୍ମର ଚେୟାରମ୍ୟାନ୍ ଲିୟୁ ଜିଙ୍ଗଜେନ୍ କହିଛନ୍ତି ଯେ, ତୃତୀୟ ପର୍ଯ୍ୟାୟ କ୍ଳିନିକାଲ୍ ଟ୍ରାଏଲ ପୂରା ହେବା ପରେ ଏହାର ମାର୍କେଟିଂର ସମୀକ୍ଷା କରାଯିବ । ଲିୟୁ ପକ୍ଷରୁ କୁହାଯାଇଛି ଯେ, ଏହାର ୨ ଡୋଜର ଦାମ୍ ୧୦୦୦ ୟୁଆନ୍ ରହିଛି । ତେବେ ଏହି ଟିକାକୁ ଚୀନର ସବୁ ନାଗରିକଙ୍କୁ ଦିଆଯିବ ନାହିଁ  ।

            ଲିୟୁ ଜିଙ୍ଗଜେନଙ୍କ ପରାମର୍ଶ ହେଉଛି ଛାତ୍ର ଏବଂ ଯେଉଁମାନେ ସହରରେ ରହୁଛନ୍ତି ସେମାନଙ୍କୁ ଏହି ଟିକା ନେବାର ଆବଶ୍ୟକତା ରହିଛି । କମ୍ ଜନସଂଖ୍ୟା ବିଶିଷ୍ଟ ଗାଁ ଲୋକଙ୍କୁ ଏହି ଟିକା ନେବାର କୌଣସି ଆବଶ୍ୟକତା ନାହିଁ । ବେଜିଂ ଓ ଉହାନରେ ସିନୋଫାର୍ମ ପକ୍ଷରୁ ୨ ଭିନ୍ନ ଭିନ୍ନ ଭ୍ୟାକ୍ସିନ୍ ଦିଆଯାଉଛି । ତୃତୀୟ ଚରଣ କ୍ଳିନିକାଲ୍ ଟ୍ରାଏଲ ପାଇଁ ଭ୍ୟାକ୍ସିନକୁ ଜୁନ ମାସରେ ୟୁଏଇକୁ ପଠାଇଦିଆଯାଇଛି ।

            ତେବେ ଇତିମଧ୍ୟରେ ଲିୟୁ ମଧ୍ୟ ଭ୍ୟାକ୍ସିନର ୨ ଡୋଜ୍ ସେ ଖୋଦ୍ ମଧ୍ୟ ନେଇଛନ୍ତି । ଲିୟୁ କହିଛନ୍ତି ଯେ, ଏହାର କୌଣସି ସାଇଡଇଫେକ୍ଟ  ଦେଖିବାକୁ ମିଳିନାହିଁ । ବେଜିଂରେ ଭ୍ୟାକ୍ସିନର ୧୨ କୋଟି ଡୋଜ୍ ପ୍ରସ୍ତୁତ କରାଯାଉଛି । ଏହା ପୂର୍ବରୁ ସିନୋଫାର୍ମ କମ୍ପାନୀ ପକ୍ଷରୁ ଦାବି କରାଯାଇଥିଲା ଯେ ଇମ୍ୟୁନ୍ ରେସପନ୍ସ ଟ୍ରାଏଲରେ ଏହାର ଭଲ ଫଳାଫଳ ଦେଖିବାକୁ ମିଳିଛି ।